print edition അയ്യൻകാളി വിജയഗാഥ

പയ്യന്നൂർ: 369 രൂപ കൂലി; കുറഞ്ഞത്‌ 100 തൊഴിൽ ദിനം. നഗരത്തിലെ നിർധന കുടുംബാംഗങ്ങൾക്ക്‌ അതിജീവിക്കാൻ അയ്യങ്കാളി തൊഴിലുറപ്പ്‌ പദ്ധതിയിലൂടെ സംസ്ഥാന സർക്കാർ നൽകിയത്‌ കോടികൾ. കോർപറേഷനിലും മുനിസിപ്പാലിറ്റിയിലും നടപ്പാക്കുന്ന അയ്യൻകാളി തൊഴിലുറപ്പ്‌ പദ്ധതിയുടെ സുരക്ഷയിൽ അതീജിവിക്കുന്നവരുടെ സന്തോഷജീവിതം തൊട്ടറിയാം പയ്യന്നൂരിലെത്തിയാൽ. പയ്യന്നൂർ നഗരസഭയിലെ 1240 തൊഴിലാളികളാണ്‌ അയ്യങ്കാളി പദ്ധതിയിൽ ഉപജീവനം നടത്തുന്നത്‌. സ്ത്രീകൾക്കും പുരുഷന്മാർക്കും തുല്യ ജോലിക്ക് തുല്യ വേതനം നൽകുന്നു.

തുല്യനീതി എന്താണെന്നത്‌ മനസ്സിലാക്കാൻ ഇ‍ൗ പദ്ധതി വഴിവച്ചുവെന്ന്‌ നഗരസഭാ കണ്ടോത്ത് വാർഡിൽ 50 പേരടങ്ങിയ തൊഴിലുറപ്പ്‌ സംഘത്തിന്റെ ടീം മേറ്റ് കണ്ടോത്തെ പി സിന്ധു പറഞ്ഞു. മരുന്നു വാങ്ങാനും മറ്റുചിലവുകൾക്കുമുള്ള തുക തൊഴിലുറപ്പിലൂടെ കിട്ടുന്നതായി പങ്ങടത്തെ പി വി പത്മാവതി പറയുന്നു. കഴിഞ്ഞവർഷം അരലക്ഷത്തോളം തൊഴിൽ ദിനങ്ങൾ നൽകിയ പയ്യന്നൂർ നഗരസഭയിൽ ഇ‍ൗ വർഷം 13,882 തൊഴിൽ നൽകി.

കേരളത്തിലെ എല്ലാ കോർപ്പറേഷനിലും മുനിസിപ്പാലിറ്റിയിലും അയ്യൻകാളി തൊഴിലുറപ്പ്‌ പദ്ധതിയുണ്ട്‌. മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ സമാനമാണ്‌ പ്രവർത്തനം. രണ്ടു പശുവിൽ കൂടുതലുള്ള, അവശത അനുഭവിക്കുന്ന ക്ഷീരകർഷകരെയും പദ്ധതിയിൽ ഉൾപ്പെടുത്തിയിട്ടുണ്ട്‌. 2015–-16 കാലത്ത്‌ മൂന്ന് ലക്ഷം തൊഴിൽ ദിനത്തിൽ 7.48 കോടി നൽകിയ പദ്ധതി, 2022– -23 ആയപ്പോൾ 41.11 ലക്ഷം തൊഴിൽ ദിനങ്ങൾ നൽകി. 113.93 കോടി രൂപ ആ വർഷം ചെലവിട്ടു.