print edition ഭയക്കാതെ കടന്നുവരാം ; സഹായത്തിന് വനിതാസെൽ കൗൺസലിങ് സെന്ററുണ്ട്

കണ്ണൂർ

ഭർത്താവിന്റെ പീഡനവും വീട്ടുകാരുടെ ഉപദ്രവവും സഹിക്കാനാവാതെ കടലിൽച്ചാടി ജീവനൊടുക്കാൻ പുറപ്പെട്ട കണ്ണൂർ സ്വദേശിനിയെ ജീവിതത്തിലേക്ക്‌ ചേർത്തുപിടിക്കാനായതിന്റെ സന്തോഷത്തിലാണിന്നും കരിവെള്ളൂരിലെ റിട്ട. സിഐ പി വി നിർമല. പയ്യാമ്പലത്തേക്ക്‌ പോകാനായി ബസിൽ കയറിയ അവൾ വഴിയിൽ വനിതാസെല്ലിന്റെ ബോർഡ് കണ്ടാണ്‌ ഇറങ്ങിയത്‌. സിഐയായ എന്നോട്‌ സങ്കടം പറഞ്ഞു. സ്വന്തം വീട്ടിൽ പൊയ്‌ക്കൂടെ എന്ന് ചോദിച്ചപ്പോൾ കുടുംബമാകുമ്പോൾ പ്രശ്‌നങ്ങളുണ്ടാകും അഡ്‌ജസ്റ്റ് ചെയ്യണമെന്നാണ് വീട്ടുകാർ പറഞ്ഞതെന്നായിരുന്നു മറുപടി. ഉടനെ വീട്ടുകാരെ വിളിച്ചുവരുത്തി. കാര്യങ്ങൾ ധരിപ്പിച്ചു.

മകൾ ഇവിടെ ഇറങ്ങിയില്ലായിരുന്നെങ്കിൽ നിങ്ങൾക്ക് ജീവനോടെ കാണാൻ കഴിയില്ലായുരുന്നെന്ന്‌ പറഞ്ഞപ്പോഴാണ് അവൾ അനുഭവിക്കുന്ന വേദന അവർക്ക്‌ മനസിലായത്. നിരന്തരം കൗൺസലിങ് നൽകിയാണ്‌ ജീവിതത്തിലേക്ക് തിരിച്ചെത്തിച്ചത്. ഉന്നതവിദ്യാഭ്യാസം നേടിയ അവളിപ്പോൾ നല്ല നിലയിൽ ജീവിക്കുന്നു– നിർമല പറഞ്ഞു.

സ്ത്രീകൾക്ക് സുരക്ഷിതമായി പരാതി നൽകാൻ ഇ കെ നായനാർ മുഖ്യമന്ത്രിയായപ്പോൾ തുടങ്ങിയതാണ് വനിതാസെല്ലുകൾ. ഭയം മൂലം അതുവരെ പൊലീസ് സ്റ്റേഷനുകളിലേക്ക് കടന്നുവരാത്ത സ്ത്രീകൾക്ക് നിർഭയമായി കയറിച്ചെല്ലാൻ പറ്റുന്ന ഇടമായി അതു മാറി. ലക്ഷക്കണക്കിന് യുവതികൾക്ക് പ്രതിരോധ പരിശീലനം നൽകാനും കഴിഞ്ഞു.

പിങ്ക് പ്രൊട്ടക്‌ഷൻ

സ്ത്രീധനവുമായി ബന്ധപ്പെട്ട പ്രശ്‌നങ്ങൾ, സൈബർലോകത്തിലെ അതിക്രമങ്ങൾ, പൊതുയിടങ്ങളിലെ അവഹേളനങ്ങൾ തുടങ്ങിയവ നേരിടുന്നതിനായി പൊലീസ് ആരംഭിച്ച പദ്ധതിയാണ് പിങ്ക് പ്രൊട്ടക്‌ഷൻ പ്രോജക്ട്. പിങ്ക് പട്രോൾ, പിങ്ക് ജനമൈത്രി ബീറ്റ്, പിങ്ക് കൺട്രോൾ റൂം, പിങ്ക് ഷാഡോ, സ്ത്രീകളെ ശല്യം ചെയ്യുന്നവരെ പിടികൂടാൻ പിങ്ക് റോമിയോ, കൗൺസലിങ് എന്നിവയാണ്‌ പദ്ധതിയുടെ ഭാഗം. സ്ത്രീകൾക്കെതിരെയുള്ള അതിക്രമങ്ങൾ തടയാൻ എല്ലാ സ്റ്റേഷനുകളിലും വനിതാ സുരക്ഷാ ഡിവിഷനും ആരംഭിച്ചിട്ടുണ്ട്.

കാവലുണ്ട് വനിതാ സ്ക്വാഡ്

സംസ്ഥാനത്ത് കൂടുതൽ വനിതകളെ പൊലീസ് സേനയിലേക്ക് നിയമിച്ചതും വനിതാ ബറ്റാലിയൻ രൂപീകരിച്ചതും എൽഡിഎഫ് സർക്കാർ. 2017ൽ ഒന്നാം പിണറായി സർക്കാരിന്റെ കാലത്താണ് തിരുവനന്തപുരം ആസ്ഥാനമായി സായുധ വനിതാ പൊലീസ് ബറ്റാലിയൻ രൂപീകരിച്ചത്. ആർ നിശാന്തിനിയായിരുന്നു ആദ്യ കമാൻഡന്റ്. വനിതാ ബറ്റാലിയന് മികച്ച പരിശീലനം ലഭിച്ച വനിതാ കമാൻഡോ ടീമുമുണ്ട്.

ഇതുവരെ 1869 പേർക്ക്‌ പിഎസ്‍സി വഴി നിയമനശുപാർശ നൽകി. വനിതാ കമാൻഡോ, പിങ്ക്‌ പൊലീസ്‌, വനിതാ എസ്‌എച്ച്‌ഒ തുടങ്ങി പൊലീസിൽ സ്‌ത്രീശാക്തീകരണത്തിനായി ഒട്ടേറെ നടപടി സ്വീകരിച്ചു. ചരിത്രത്തിലാദ്യമായി 2024ൽ ഫയർ ആൻഡ് റെസ്ക്യൂ സർവീസസിൽ 100 വനിതാ ഓഫീസർമാരെ നിയമിച്ചു.

രാജ്യത്ത് ആദ്യമായി വനിതകളുടെ സ്‌ക്യൂബ ഡൈവിങ് ടീം രൂപീകരിച്ചു. ഈമാസം അഗ്നിരക്ഷാസേന വനിതാ സ്റ്റേഷൻ ഓഫീസർമാരായി 12 പുതിയ തസ്തിക സൃഷ്ടിച്ചു. നിയമന നടപടികൾ പുരോഗമിക്കുകയാണ്.