print edition എറണാകുളം; ട്രെൻഡ്‌ വികസനത്തിനൊപ്പം
എറണാകുളം പള്ളുരുത്തി -കച്ചേരിപ്പടിയിൽ എൽഡിഎഫ് പ്രവർത്തകന്റെ കെെയിൽനിന്ന് ചുവന്ന ബലൂൺ ആഹ്ലാദത്തോടെ വാങ്ങുന്ന കുരുന്ന് /ഫോട്ടോ: വി കെ അഭിജിത്
എം എസ്‌ അശോകൻ
Published on Nov 30, 2025, 12:01 AM | 1 min read
കൊച്ചി: തദ്ദേശസ്ഥാപനങ്ങളിൽ യുഡിഎഫിന്‌ നേരിയ മേൽക്കൈയാണുള്ളതെങ്കിലും ജില്ലയുടെ പൊതുവികസനരംഗത്ത്‌ അതുണ്ടാക്കിയ പിന്നോട്ടടി ചെറുതല്ല. തൃക്കാക്കര നഗരസഭ ലൈഫ്‌ പദ്ധതിയിൽ 380 അപേക്ഷകരുണ്ടായിട്ടും അഞ്ചുവർഷത്തിനിടെ ഒരാൾക്കുപോലും വീട്‌ നൽകിയില്ല. ജില്ലാപഞ്ചായത്തിൽ രണ്ടു പ്രസിഡന്റുമാരും മൂന്നു വൈസ്‌ പ്രസിഡന്റുമാരും വന്നതല്ലാതെ എടുത്തുപറയാൻ നേട്ടങ്ങളില്ല. ഇതിനെല്ലാമിടയിലും സംസ്ഥാന സർക്കാർ രാഷ്‌ട്രീയവിവേചനമില്ലാതെ നടപ്പാക്കിയ പദ്ധതികളാണ്‌ ജില്ലയെ പൊതുധാരയ്-ക്കൊപ്പം നിലനിർത്തിയത്‌. ലൈഫ്‌ പദ്ധതിയിൽ 41,887 വീടുകൾ പൂർത്തിയാക്കിയതും 250 കോടിയോളം ചെലവിട്ട്‌ എൺപതോളം പൊതുവിദ്യാലയങ്ങൾ പുതുമോടിയിലാക്കിയതും ചിലതുമാത്രം.
പത്തുവർഷത്തെ യുഡിഎഫ്‌ ഭരണം അവസാനിപ്പിച്ച്‌ എൽഡിഎഫ് അധികാരത്തിലിരുന്ന കൊച്ചി കോർപറേഷനിൽ മുന്പൊന്നുമില്ലാത്ത വികസനമാണ്‌ നടപ്പായത്‌. 2040 വരെയുള്ള കൊച്ചിയുടെ മാസ്റ്റർപ്ലാൻ തയ്യാറാക്കിയതുമുതൽ പുതിയ ആസ്ഥാനമന്ദിരവും ബ്രഹ്മപുരത്തെ സിബിജി പ്ലാന്റ്‌ പദ്ധതിവരെ അതിലുൾപ്പെടും.
വികസനത്തിനും ജനക്ഷേമത്തിനുമൊപ്പമെന്ന സന്ദേശവുമായാണ്‌ ജില്ലയിൽ എൽഡിഎഫ് രംഗത്തുള്ളത്‌. പൊതുജനങ്ങളുടെ നിർദേശങ്ങൾകൂടി ഉൾപ്പെടുത്തി പ്രകടനപത്രിക തയ്യാറാക്കി. ബൂത്തുകൾവരെയുള്ള കൺവൻഷനുകൾ പൂർത്തിയാക്കി പ്രചാരണരംഗത്തു മുന്നേറി.
യുഡിഎഫിൽ സീറ്റുവിഭജനചർച്ച ആരംഭിച്ചപ്പോൾത്തന്നെ കലഹങ്ങളുടെ കടന്നൽക്കൂടിളകി. സ്ഥാനാർഥിനിർണയത്തോടെ അടി തെരുവിലേക്കു പടർന്നു. അവഗണനയിൽ പ്രതിഷേധിച്ച്‌ കോൺഗ്രസ്‌, യൂത്ത്‌ ഭാരവാഹികൾ കൂട്ടത്തോടെ പാർടി വിട്ടു. 111 തദ്ദേശസ്ഥാപനങ്ങളിലായി നൂറ്റന്പതിലേറെപ്പേരാണ്‌ യുഡിഎഫ്‌ വിമതർ. വിമതരുള്ളിടത്ത്‌ എസ്‌ഡിപിഐ, വെൽഫെയർ പാർടി, ബിജെപി എന്നിവയുമായി ധാരണയിലാണ്‌ യുഡിഎഫ്‌. പ്രതിപക്ഷനേതാവ്‌ വി ഡി സതീശന്റെ മണ്ഡലത്തിൽ യുഡിഎഫിലെ രണ്ടാംകക്ഷി വെൽഫെയർ പാർടിയാണ്‌. കൊച്ചി കോർപറേഷനിലെ രണ്ട്‌ യുഡിഎഫ്‌ ക‍ൗൺസിലർമാർ ബിജെപി സ്ഥാനാർഥികളായി. കടമക്കുടി ജില്ലാപഞ്ചായത്ത്‌ ഡിവിഷനിൽ കോൺഗ്രസ്‌ സ്ഥാനാർഥിയുടെ പത്രിക തള്ളി. ഇവിടെ ഡമ്മി സ്ഥാനാർഥിപോലുമില്ല.
യുഡിഎഫുമായി ഒളിഞ്ഞും തെളിഞ്ഞും സീറ്റ്‌ പങ്കിടുന്ന ബിജെപിക്ക്‌ ജില്ലയിൽ മുന്നൂറോളം വാർഡുകളിൽ സ്ഥാനാർഥികളില്ല. വ്യവസായി സാബു ജേക്കബിന്റെ ട്വന്റി 20 മത്സരരംഗത്തുണ്ടെങ്കിലും അടിത്തറയിളകിയ നിലയിലാണ്‌.
0 comments