ഭൂമി കുംഭകോണ കേസ്: ഷെയ്ഖ് ഹസീനയ്ക്ക് അഞ്ച് വർഷം തടവുശിക്ഷ വിധിച്ച് കോടതി

ധാക്ക : ഭൂമി കുംഭകോണ കേസിൽ മുൻ പ്രധാനമന്ത്രി ഷെയ്ഖ് ഹസീനയെ അഞ്ച് വർഷം തടവിന് ശിക്ഷിച്ച് ബംഗ്ലാദേശ് കോടതി. ഇതേ കേസിൽ ധാക്കയിലെ സ്‌പെഷ്യൽ ജഡ്ജിസ് കോടതി-4 ലെ ജഡ്ജി എംഡി റബിയുൾ ആലം, ഹസീനയുടെ സഹോദരി ഷെയ്ഖ് റെഹാനയ്ക്ക് ഏഴ് വർഷത്തെ തടവും അനന്തരവൾ ബ്രിട്ടീഷ് പാർലമെന്റേറിയൻ തുലിപ് സിദ്ദിഖിന് രണ്ട് വർഷത്തെ തടവും വിധിച്ചതായി ദി ഡെയ്‌ലി സ്റ്റാർ പത്രം റിപ്പോർട്ട് ചെയ്തു. അഴിമതി വിരുദ്ധ കമീഷൻ (എസിസി) ഫയൽ ചെയ്ത അഴിമതി കേസുകളിൽ ഹസീന ഉൾപ്പെട്ട നാലാമത്തെ വിധിയാണിതെന്ന് റിപ്പോർട്ടിൽ പറയുന്നു. പർബച്ചൽ ന്യൂ ടൗൺ പദ്ധതി പ്രകാരം പ്ലോട്ടുകൾ അനുവദിച്ചതിൽ ക്രമക്കേടുകൾ ആരോപിച്ച് ജനുവരി 12 നും 14 നും ഇടയിൽ ധാക്ക ഇന്റഗ്രേറ്റഡ് ഡിസ്ട്രിക്റ്റ് ഓഫീസ് -1 ൽ ആറ് വ്യത്യസ്ത കേസുകളാണ് എസിസി ഫയൽ ചെയ്തത്.

മുതിർന്ന ഉദ്യോഗസ്ഥരുമായി ചേർന്ന്, ഹസീനയും മകൻ സജീബ് വാസദ് ജോയ്, മകൾ സൈമ വാസദ് പുട്ടുൾ എന്നിവരുൾപ്പെടെയുള്ള ബന്ധുക്കളും പുർബച്ചൽ ന്യൂ ടൗൺ പ്രോജക്റ്റിന്റെ സെക്ടർ 27 ലെ നയതന്ത്ര മേഖലയിൽ 7,200 ചതുരശ്ര അടി വീതമുള്ള ആറ് പ്ലോട്ടുകൾ നിയമവിരുദ്ധമായി സ്വന്തമാക്കിയതായി ധാക്ക ട്രിബ്യൂൺ പത്രം റിപ്പോർട്ട് ചെയ്തു.

ബംഗ്ലാദേശിലെ സർക്കാർ സഹായത്തോടെയുള്ള കെട്ടിടങ്ങളുടെ ആസൂത്രണം മുതൽ നിർമാണം വരെയുള്ള കാര്യങ്ങൾ നിരീക്ഷിക്കുന്നതിന് ചുമതലയുള്ള സർക്കാർ ഏജൻസിയാണ് രാജധാനി ഉന്നയാൻ കർതൃപഖ (രാജുക്). ജൂലൈ 31 ന് ഹസീന, രഹന, ജോയ്, പുട്ടുൽ, തുലിപ് എന്നിവരുൾപ്പെടെ 29 പേർക്കെതിരെ കേസുകളിൽ കുറ്റപത്രം സമർപ്പിച്ചു. നവംബർ 27 ന്, ഭൂമി കുംഭകോണവുമായി ബന്ധപ്പെട്ട് ഫയൽ ചെയ്ത മൂന്ന് കേസുകളിൽ ഏഴ് വർഷം വീതം 21 വർഷത്തെ കഠിനതടവിന് ഹസീനയെ ശിക്ഷിച്ചു. ജോയിയ്ക്കും പുട്ടുലിനും വ്യത്യസ്ത കേസുകളിൽ അഞ്ച് വർഷത്തെ തടവും വിധിച്ചു.