കണ്ടാൽ എലി കരണ്ടത് പോലെ, അക്ഷയ് കുമാറിന്റെ പുത്തൻ ലുക്ക് വൈറൽ

മുംബൈ: ബോളിവുഡ് താരം അക്ഷയ്കുമാറിന്റെ കോസ്റ്റ്യൂമാണ് ഇപ്പോള്‍ സോഷ്യല്‍ മീഡിയയിലെ ചർച്ചാ വിഷയം. പ്രിയദർശൻ സംവിധാനം ചെയ്യുന്ന ‘ഭൂത് ബംഗ്ല’യുടെ ട്രെയിലർ ലോഞ്ചിന് താരം ധരിച്ച ഷർട്ടാണ് വൈറലായത്. ഒറ്റനോട്ടത്തിൽ ചിതലരിച്ചതെന്നോ എലി കരണ്ടതെന്നോ തോന്നാം. കീറിപ്പറിഞ്ഞ രീതിയിലാണ് ഷർട്ടിന്റെ താഴ്ഭാ​ഗം ഡിസൈൻ ചെയ്തിരിക്കുന്നത്. ഈ വിചിത്രമായ ഫാഷന്‍ കണ്ട് ഞെട്ടിയിരിക്കുകയാണ് സോഷ്യല്‍ ലോകം.

പരിപാടിയിലെ വീഡിയോകൾ പുറത്തുവന്നതിന് പിന്നാലെ ചിരിപടർത്തുന്ന കമന്റുകളും നിരവധി ട്രോളുകളും നിറഞ്ഞു. '2500 കോടിയുടെ ആസ്തിയുണ്ട്. 100 കോടി മുതലാണ് ഒരു സിനിമയ്ക്ക് വാങ്ങുന്ന പ്രതിഫലം. എന്നിട്ടും ഒരു ഷർട്ട് വാങ്ങാൻ ​​ഗതിയില്ലേ‘, എലി കരണ്ട വസ്ത്രങ്ങൾ ഇനി സൂക്ഷിച്ചു വച്ച് നടന് കൊടുക്കാം’ എന്നിങ്ങനെയുള്ള കമന്റുകളാണ് ചിത്രങ്ങൾക്കും വീഡിയോയ്ക്കും ലഭിക്കുന്നത്. എന്നാൽ സിനിമയുമായി ബന്ധപ്പെട്ട കോസ്റ്റ്യൂമാണ് ഇതെന്നായിരുന്നു താരത്തിന്റെ പ്രതികരണം.

ഒരിടവേളയ്ക്ക് ശേഷം അക്ഷയ് കുമാറും പ്രിയദർശനം ഒന്നിക്കുന്ന ചിത്രം കൂടിയാണ് ഭൂത് ബം​ഗ്ല. ചിത്രം ഹൊറർ കോമഡി ഗണത്തിൽപെടുന്നു. ഇത് ഏഴാം തവണയാണ് അക്ഷയ്കുമാറും പ്രിയദർശനും ഒന്നിച്ചെത്തുന്നത്. 2010ൽ പുറത്തിറങ്ങിയ ‘ഖാട്ടാ മീട്ട’യാണ് ഇരുവരും അവസാനം ഒന്നിച്ച ചിത്രം.