'ഓരോ പോരാട്ടവും വ്യത്യസ്തം, ഒന്നായി അതിജീവിക്കാം'; ഇന്ന് ലോക ക്യാൻസർ ദിനം

ഇന്ന് ലോക ക്യാന്‍സര്‍ ദിനം. ഓരോ വ്യക്തിയുടെയും ക്യാൻസർ അനുഭവങ്ങൾ വ്യത്യസ്തമാണെന്നും എന്നാൽ ആ വൈവിധ്യങ്ങളെ ഉൾക്കൊണ്ടുകൊണ്ട് നാം ഒറ്റക്കെട്ടായി നിൽക്കണമെന്നുമാണ് ഈ വർഷത്തെ ലോക ക്യാൻസർ ദിനം നമ്മെ ഓർമ്മിപ്പിക്കുന്നത്. 'യുണൈറ്റഡ് ബൈ യുണീക്' എന്നതാണ് ഈ വർഷത്തെ സന്ദേശം. 'വ്യത്യസ്തതകൾക്കിടയിലും അതിജീവനത്തിനായി നമുക്ക് ഒന്നായി നിൽക്കാം' എന്നാണ് ഇതുകൊണ്ട് അർത്ഥമാക്കുന്നത്.

ഡബ്ല്യുഎച്ച്ഒയും അന്താരാഷ്ട്ര കാൻസർ ഗവേഷണ ഏജൻസിയും പുറത്തുവിട്ട 2022-ലെ കണക്കുകൾ പ്രകാരം, ഓരോ വർഷവും ലോകത്ത് ഏകദേശം 2 കോടി പുതിയ ക്യാൻസർ കേസുകൾ റിപ്പോർട്ട് ചെയ്യപ്പെടുന്നുണ്ട്. ഏകദേശം 9.7 ദശലക്ഷം ആളുകൾ വർഷം തോറും ഈ രോഗം മൂലം മരണപ്പെടുന്നു എന്നാണ് കണക്ക്.

ഇന്ത്യയിൽ ഓരോ വർഷവും ഏകദേശം 1.4 ദശലക്ഷത്തിലധികം (14 ലക്ഷം) പുതിയ ക്യാൻസർ കേസുകൾ റിപ്പോർട്ട് ചെയ്യപ്പെടുന്നു. നിലവിൽ രാജ്യത്ത് 2.7 ദശലക്ഷത്തിലധികം ആളുകൾ ഈ രോഗവുമായി ജീവിക്കുന്നുണ്ടെന്നാണ് ഔദ്യോഗിക കണക്കുകൾ സൂചിപ്പിക്കുന്നത്.

ക്യാൻസറിനെ പലപ്പോഴും വളരെ ഭീതിയോടെയാണ് നമ്മൾ നോക്കിയിട്ടുള്ളത്. അതേസമയം ചില മുൻകരുതലുകളും ശ്രദ്ധയും ഒരു പരിധിവരെ ഈ അസുഖം വരാതെ നോക്കാൻ നമുക്കാകും. രോഗത്തെക്കുറിച്ചുള്ള അനാവശ്യ ഭീതികൾ അകറ്റുകയും വസ്തുതകൾ മനസ്സിലാക്കുകയുമാണ് ആദ്യം വേണ്ടത്. ക്യാൻസർ എന്നത് എല്ലാ പ്രായക്കാരെയും ബാധിക്കാവുന്ന ഒന്നാണ്. കുട്ടികളിലും യുവാക്കളിലും പണ്ടും ഈ രോഗം കണ്ടുവന്നിട്ടുണ്ടെങ്കിലും, ഇന്ന് രോഗനിർണ്ണയത്തിനുള്ള അത്യാധുനിക സൗകര്യങ്ങൾ ലഭ്യമായതോടെ കൂടുതൽ കേസുകൾ പ്രാരംഭ ഘട്ടത്തിൽ തന്നെ തിരിച്ചറിയാൻ സാധിക്കുന്നുണ്ട് എന്നത് വലിയൊരു മാറ്റമാണ്.

ജനിതകപരമായ കാരണങ്ങളാൽ പലരിലും രോഗം ഉണ്ടാകാമെങ്കിലും, ആധുനിക കാലത്തെ ജീവിതരീതികൾ പലപ്പോഴും ക്യാൻസർ സാധ്യത വർധിപ്പിക്കുന്ന ഘടകങ്ങളായി മാറാറുണ്ട്. പുകയിലയുടെ ഉപയോഗം, അമിതമായ മദ്യപാനം, വായുമലിനീകരണം, പോഷകാഹാരക്കുറവ് എന്നിവ ഇതിൽ പ്രധാനമാണ്. എന്നാൽ ഇതിനെയെല്ലാം പ്രതിരോധിക്കാൻ കരുത്തുറ്റ ചികിത്സാ സംവിധാനങ്ങൾ ഇന്ന് നമുക്കുണ്ട് എന്നതാണ് പ്രത്യാശ നൽകുന്ന കാര്യം.

പണ്ട് ശസ്ത്രക്രിയയും കഠിനമായ കീമോതെറാപ്പിയും മാത്രമായിരുന്നു പോംവഴിയെങ്കിൽ, ഇന്ന് ശാസ്ത്രം ഏറെ മുന്നിലാണ്. ടാർഗറ്റഡ് തെറാപ്പി, ഇമ്മ്യൂണോതെറാപ്പി തുടങ്ങിയ ചികിത്സകൾ വഴി ക്യാൻസർ കോശങ്ങളെ മാത്രം കൃത്യമായി നശിപ്പിക്കാൻ ഡോക്ടർമാർക്ക് സാധിക്കുന്നു. ഇത് ചികിത്സയുടെ പാർശ്വഫലങ്ങൾ കുറയ്ക്കാനും രോഗിയുടെ ജീവിതനിലവാരം മെച്ചപ്പെടുത്താനും സഹായിക്കുന്നു. അതോടൊപ്പം കൃത്യസമയത്തുള്ള സ്ക്രീനിംഗും പരിശോധനകളും വഴി രോഗം നേരത്തെ കണ്ടെത്തുന്നത് ചികിത്സാ വിജയം ഉറപ്പാക്കുന്നു.

ക്യാൻസർ പ്രതിരോധം നമ്മുടെ അടുക്കളയിൽ നിന്നും ശീലങ്ങളിൽ നിന്നുമാണ് തുടങ്ങേണ്ടത്. അതിനായി ശ്രദ്ധിക്കേണ്ട ചില പ്രധാന കാര്യങ്ങൾ ഇവയാണ്:

ഭക്ഷണരീതിയിലെ മാറ്റം: ചുവന്ന മാംസം, സംസ്കരിച്ച ഇറച്ചി വിഭവങ്ങൾ (Processed Meat) എന്നിവയുടെ ഉപയോഗം കുറയ്ക്കുക. പകരം ധാരാളം നാരുകളടങ്ങിയ പച്ചക്കറികൾ, പഴവർഗ്ഗങ്ങൾ, തവിടു കളയാത്ത ധാന്യങ്ങൾ എന്നിവ ഭക്ഷണത്തിൽ ഉൾപ്പെടുത്തുക. കൃത്രിമ മധുരവും നിറങ്ങളും ചേർത്ത ഭക്ഷണങ്ങൾ ഒഴിവാക്കുന്നത് നല്ലതാണ്.

ലഹരിയോട് 'നോ' പറയാം: പുകയിലയുടെ ഏത് രൂപത്തിലുള്ള ഉപയോഗവും (സിഗരറ്റ്, പുകയില ഉൽപ്പന്നങ്ങൾ) പൂർണ്ണമായും ഒഴിവാക്കുക. മദ്യപാനം നിയന്ത്രിക്കുന്നതും ക്യാൻസർ സാധ്യത ഗണ്യമായി കുറയ്ക്കാൻ സഹായിക്കും.

വ്യായാമവും ശാരീരികക്ഷമതയും: ശാരീരിക അധ്വാനവും കൃത്യമായ വ്യായാമവും അനിവാര്യമാണ്. ദിവസവും കുറഞ്ഞത് 30 മിനിറ്റ് വ്യായാമം ചെയ്യുന്നത് ശരീരത്തിന്റെ പ്രതിരോധശേഷി വർദ്ധിപ്പിക്കാനും കോശങ്ങളുടെ ആരോഗ്യം നിലനിർത്താനും സഹായിക്കും. സജീവമായ ഒരു ജീവിതശൈലി പിന്തുടരുന്നത് രോഗങ്ങളെ പ്രതിരോധിക്കാനുള്ള ശരീരത്തിന്റെ സ്വാഭാവിക ശേഷി വർദ്ധിപ്പിക്കുന്നു.

പരിശോധനകൾ മുടക്കാതിരിക്കുക: പ്രത്യേകിച്ച് കുടുംബത്തിൽ ക്യാൻസർ പാരമ്പര്യമുള്ളവർ കൃത്യമായ ഇടവേളകളിൽ മാമോഗ്രാം, പാപ് സ്മിയർ തുടങ്ങിയ സ്ക്രീനിംഗ് പരിശോധനകൾക്ക് വിധേയരാകണം. ചെറിയ ലക്ഷണങ്ങൾ പോലും (ഉണങ്ങാത്ത വ്രണങ്ങൾ, മുഴകൾ, ശബ്ദവ്യത്യാസം) അവഗണിക്കാതെ ഡോക്ടറെ കാണുക.

പരിസ്ഥിതിയും സംരക്ഷണവും: അമിതമായ വെയിൽ ഏൽക്കുന്നത് ഒഴിവാക്കുന്നതും വായുമലിനീകരണം കുറഞ്ഞ സാഹചര്യങ്ങളിൽ കഴിയുന്നതും ചർമ്മത്തെയും ശ്വാസകോശത്തെയും സംരക്ഷിക്കാൻ സഹായിക്കും.