സ്ത്രീകളിലെ ഫംഗസ്ബാധ, കാലാവസ്ഥാ വ്യതിയാനത്തിനും പങ്കെന്ന് പഠനം

മിക്ക സ്ത്രീകളും ജീവിതത്തിൽ ഒരു തവണയെങ്കിലും അനുഭവിക്കുന്ന യോനി യീസ്റ്റ് അണുബാധ (യോനി കാൻഡിഡിയസിസ്) പ്രശ്നം വർധിക്കുന്നതിൽ കാലാവസ്ഥാ വ്യതിയാനവും പ്രേരകമാവുന്നതായി പഠനം.

 കാൻഡിഡ എന്ന ഫംഗസ് മൂലമുണ്ടാകുന്ന ഈ ഫംഗസ് അണുബാധ ഒരു സാധാരണ രോഗമാണ്. എന്നാൽ ഇന്ത്യയിൽ ഈ ഫംഗസ് അണുബാധകൾ വർദ്ധിക്കുന്നതിന് പിന്നിൽ കാലാവസ്ഥാ വ്യതിയാനം സ്വാധീനമാവുന്നതായി വിദഗ്ദ്ധർ പറയുന്നു. രോഗത്തിന്റെ മാറുന്ന പാറ്റേണുകൾ അപകടസാധ്യത വർദ്ധിപ്പിക്കുകയും ചികിത്സ പ്രയാസകരമാക്കുകയും ചെയ്യുന്നു.

ഇന്ത്യയിലും വിവിധ വിദേശ രാജ്യങ്ങളിലും നടന്ന പഠനങ്ങൾ കാലാവസ്ഥാ വ്യതിയാനത്തിന്റെ ഫലങ്ങളെ ഇതുമായി ബന്ധിപ്പിക്കുന്നു. മുഖ്യമായ പഠനങ്ങൾ വൈറസുകളെയും ബാക്ടീരിയകളെയും അധികരിച്ചായിരുന്നു എങ്കിലും ഫംഗസുകളുടെ കാര്യത്തിൽ ഇത് താരതമ്യേന തീവ്രമാണ് എന്നാണ് ഇപ്പോഴത്തെ നിഗമനങ്ങൾ

യോനിയിലെ യീസ്റ്റ് അണുബാധകൾ യോനിയിൽ ചൊറിച്ചിലും അസ്വസ്ഥതയും ഉണ്ടാക്കുന്നു. കത്തുന്ന സംവേദനവും ദൈനംദിന ജീവിതത്തിൽ മടുപ്പും തീർക്കുന്നു. യോനിയിലെ സ്രവങ്ങളിൽ മാറ്റങ്ങൾ വരുത്തുന്നു. പലപ്പോഴും വ്യത്യസ്തമായ ഡിസ്ചാർജ് ഉൾപ്പെടെ ഉണ്ടാക്കുന്നതാണിത്.

കാൻഡിഡ എന്ന ഫംഗസ് സാധാരണയായി ശരീരത്തിൽ വസിക്കുന്നതാണ്. എന്നാൽ ഒരു സന്തുലിതാവസ്ഥ നിലനിൽക്കുമ്പോൾ അത് പ്രശ്‌നങ്ങൾക്ക് കാരണമാകില്ല. ഈ സന്തുലിതാവസ്ഥ തകിടം മറിഞ്ഞാൽ അത് വേഗത്തിൽ വളരുകയും പെരുകുകയും ചെയ്യും. കൂടുതലായാൽ യീസ്റ്റ് അണുബാധയ്ക്ക് കാരണമാവുകയും ചെയ്യും.

സ്ത്രീകളിൽ ഇത് സാധാരണയായി കാണപ്പെടുന്നുണ്ടെങ്കിലും പുരുഷന്മാർക്കും രോഗം പിടിപെടാമെന്ന് ഡോക്ടർമാർ പറയുന്നു. ലൈംഗിക ബന്ധത്തിലൂടെ പങ്കാളികളിൽ നിന്ന് ഈ അണുബാധകൾ പരസ്പരം കൈമാറ്റം ചെയ്യപ്പെടാം. ലൈംഗിക ബന്ധത്തിന്റെ അഭാവത്തിലും അണുബാധ പിടിപെടാം.

അനാവശ്യമായ ആൻറിബയോട്ടിക് ഉപയോഗം, ദുർബലമായ രോഗപ്രതിരോധ ശേഷി, അനിയന്ത്രിതമായ പ്രമേഹം അല്ലെങ്കിൽ ഈസ്ട്രജന്റെ അളവ് വർദ്ധിപ്പിക്കുന്ന ഏതെങ്കിലും മരുന്നുകളുടെ ഉപയോഗം എന്നിവയുൾപ്പെടെ നിരവധി കാരണങ്ങളാൽ ഇത് ആവർത്തിക്കാം.

പ്രാഥമികമായി വ്യക്തിപരമായ ശുചിത്വത്തിനുള്ള സാഹചര്യം ഇല്ലായ്മ, സിന്തറ്റിക് അടിവസ്ത്രങ്ങളുടെ ഉപയോഗം, ശരിയായ ചികിത്സയുടെ അഭാവം എന്നിവ ഇത് സാധാരണ ഗതിയിൽ ആവർത്തിച്ച് വരുന്നതിന് കാരണമാവുന്നു.

കാലാവസ്ഥാ വ്യതിയാനത്തിന് എന്താണ് പങ്ക്

കഴിഞ്ഞ ദശകത്തിലേറെയായി ആഗോളതലത്തിലും ഇന്ത്യയിലും കാലാവസ്ഥാ വ്യതിയാനം പ്രത്യക്ഷമാണ്. വർദ്ധിച്ചുവരുന്ന താപനിലയാണ് ഇതിൽ പ്രധാനം. കൂടുതൽ കഠിനമായ ചൂടിന്റെ നീണ്ട ദൈർഘ്യം ഈ വ്യതിയാനത്തിന്റെ പ്രകടമായ ഫലങ്ങളിൽ ഒന്നാണ്. രാജ്യത്തിന്റെ പല ഭാഗങ്ങളിലും ഉയർന്ന അളവിലുള്ള ഈർപ്പവും ഉയരുന്ന താപനിലയും കടുത്ത ഫലങ്ങൾ ഉണ്ടാക്കുന്നു. ഈ സാഹചര്യം സ്ത്രീകളിൽ യോനിയിലെ അണുബാധകളുടെ വർദ്ധനവിന് കാരണമാകുന്നു.

വർദ്ധിച്ചുവരുന്ന താപനിലയും ഇതോടൊപ്പം ചേരുന്ന ഈർപ്പവും ഫംഗസ് ജീവികൾക്ക്, പ്രത്യേകിച്ച് കാൻഡിഡയ്ക്ക് വളരാൻ അനുയോജ്യമായ അന്തരീക്ഷം സൃഷ്ടിക്കുന്നു. ചൂടുള്ളതും ഈർപ്പമുള്ളതുമായ സാഹചര്യങ്ങൾ ചർമ്മത്തിലും സ്നിഗ്ദ്ധ പ്രദേശങ്ങളിലും ദ്രുതഗതിയിലുള്ള ഫംഗസ് വളർച്ചയെ പ്രോത്സാഹിപ്പിക്കുന്നു.

ഇത്തരത്തിൽ കാലാവസ്ഥയും ഫംഗസ് രോഗവും തമ്മിൽ ബന്ധപ്പെട്ടിരിക്കുന്നെന്ന് പിംപ്രി പൂനെയിലെ ഡിപിയു സൂപ്പർ സ്പെഷ്യാലിറ്റി ഹോസ്പിറ്റലിലെ പ്രസവചികിത്സ/ഗൈനക്കോളജി പ്രൊഫസറും മേധാവിയുമായ ഹേമന്ത് ദേശ്പാണ്ഡെ പറയുന്നു.  

ചൂടിനൊപ്പം ഹ്യുമിഡിറ്റിയും ചേർന്ന് വിയർപ്പും കൂടുതൽ നനവും സൃഷ്ടിക്കുന്നു. യോനി പ്രദേശത്തെ ദീർഘനേരം ഈർപ്പമുള്ളതാക്കുകയും വായുസഞ്ചാരം കുറയ്ക്കുകയും ചെയ്യുന്ന അന്തരീക്ഷം ഉണ്ടാക്കുന്നു. യീസ്റ്റ് അണുബാധകൾ വളരാൻ സഹായിക്കുന്ന സ്വാഭാവിക യോനി മൈക്രോബയോമിനെ ഇത് തടസ്സപ്പെടുത്തുകയും ചെയ്യുന്നു. ഈ സാഹചര്യം രോഗബാധ വർധിപ്പിക്കുന്നതായും അദ്ദേഹം പറഞ്ഞു.

75%-ത്തിലധികം സ്ത്രീകളും ജീവിതത്തിൽ കുറഞ്ഞത് ഒരു തവണയെങ്കിലും യോനിയിലെ യീസ്റ്റ് അണുബാധ അനുഭവിക്കുന്നുണ്ടെന്ന് ഡോ. ദേശ്പാണ്ഡെ പറഞ്ഞു.

“ചൂടുള്ളതും ഈർപ്പമുള്ളതുമായ മാസങ്ങളിൽ ഉയർന്ന ഫംഗസ് അണുബാധ നിരക്ക് സ്ഥിരമായി റിപ്പോർട്ട് ചെയ്യുന്നു. കാലാവസ്ഥ മൂലമുണ്ടാകുന്ന താപനില വർദ്ധനവും സ്ഥിരമായ ഈർപ്പവും യോനിയിലെ യീസ്റ്റ് അണുബാധയുടെ സ്വാഭാവിക വികാസവും ആവർത്തനവും ഗണ്യമായി വർദ്ധിപ്പിക്കുന്നു,"

 “ഇത് സ്ത്രീയുടെ പ്രശ്നമാണെന്ന് ഒരു സ്റ്റീരിയോടൈപ്പ് ഉണ്ട്, പുരുഷന്മാർ ചിലപ്പോൾ മരുന്നുകൾ കഴിക്കാൻ ആഗ്രഹിക്കുന്നില്ല, കാരണം അവർക്ക് രോഗലക്ഷണങ്ങൾ ഉണ്ടാകണമെന്നില്ല, പക്ഷേ പലപ്പോഴും അണുബാധ അവരിൽ ഒളിഞ്ഞിരിക്കാം. അതിനാൽ സ്ത്രീ ചികിത്സ തേടിയാലും, പങ്കാളിയുമായുള്ള ലൈംഗിക ബന്ധത്തിന് ശേഷം അവൾക്ക് ആവർത്തിച്ചുള്ള അണുബാധ ഉണ്ടാകാനുള്ള സാധ്യത കൂടുതലാണ്,”

ആൻറിബയോട്ടിക്കുകൾ യീസ്റ്റ് അണുബാധകളിൽ ഫലപ്രദമല്ല. കാരണം അവ ഒരു ഫംഗസ് മൂലമാണ് ഉണ്ടാകുന്നത്. ആൻറിബയോട്ടിക്കുകൾ യോനിയിലെ 'നല്ല' ബാക്ടീരിയകളെ കൊല്ലാനാണ് ഇടയാക്കുക. അതുവഴി ഫംഗസ് അളവിൽ അസന്തുലിതാവസ്ഥ ഉണ്ടാക്കും. അത് സാഹചര്യം കൂടുതൽ രൂക്ഷമാക്കാം.

സമാനമായ പഠനങ്ങൾ

പ്രീപ്രിന്റ് പ്ലാറ്റ്‌ഫോമായ റിസർച്ച് സ്‌ക്വയറിൽ പ്രസിദ്ധീകരിച്ചഒരു പുതിയ പഠനത്തിൽ, അണുബാധയ്ക്ക് കാരണമാകുന്ന ഫംഗസുകളിൽ താപനില ഉയരുന്നത് അനുകൂല ഫലങ്ങൾ ഫലങ്ങൾ സൃഷ്ടിക്കുന്നതായി പറയുന്നു. കാലാവസ്ഥാ മോഡലിംഗും പ്രവചനങ്ങളും ഉപയോഗിച്ച്, മാഞ്ചസ്റ്റർ സർവകലാശാലയിലെ ഡോ. നോർമൻ വാൻ റിജും സഹപ്രവർത്തകരും മൂന്ന് ഫംഗസ് രോഗകാരികളുടെ (ആസ്‌പർജില്ലസ് ഫ്ലേവസ്, ആസ്പർജില്ലസ് ഫ്യൂമിഗാറ്റസ്, ആസ്പർജില്ലസ് നൈഗർ) ആഗോള വിതരണങ്ങൾ മാപ്പ് ചെയ്തിട്ടുണ്ട്.

" രോഗകാരിയായ ഫംഗസുകളുടെ വർദ്ധനവ് ഒരു യഥാർത്ഥ ആശങ്കയാണ്, കാലാവസ്ഥാ വ്യതിയാനം ഇതിന് കാരണമാവുകയും ചെയ്യുന്നുണ്ട്. ഫംഗസ് അവിശ്വസനീയമാംവിധം പൊരുത്തപ്പെടാൻ കഴിയുന്ന ജീവികളാണ്. വലുതും വഴക്കമുള്ളതുമായ ജീനോമുകൾ ഉള്ളതിനാൽ അവ പുതിയ സാഹചര്യങ്ങളെ കോളനിവൽക്കരിക്കാനും പരിസ്ഥിതി മാറുന്നതിനനുസരിച്ച് അതിജീവിക്കാനും വേഗം കഴിവ് നേടുന്നു" ഡോ. നോർമൻ വാൻ റിജൻ പറയുന്നു.

വർദ്ധിച്ചുവരുന്ന താപനില കാരണം കാൻഡിഡ ഓറിസ് എന്ന ഫംഗസിന്റെ വർധനവ് ഞങ്ങൾ ഇതിനകം കണ്ടെത്തിയിട്ടുണ്ട്. എന്നാൽ ഇതുവരെ, പരിസ്ഥിതിയിലെ ഈ മാറ്റത്തോട് മറ്റ് ഫംഗസുകൾ എങ്ങനെ പ്രതികരിക്കുമെന്ന് വളരെക്കുറച്ച് വിവരങ്ങൾ മാത്രമേ ഉണ്ടായിരുന്നുള്ളൂ. വൈറസുകളെയും പരാദങ്ങളെയും അപേക്ഷിച്ച് ഫംഗസ് വ്യാപനം സംബന്ധിച്ച ഗവേഷണം അത്ര കൂടുതലായി ഉണ്ടായിരുന്നില്ല.

എന്നാൽ ഭാവിയിൽ ലോകത്തിലെ മിക്ക പ്രദേശങ്ങളെയും ഫംഗസ് രോഗകാരികൾ പെരുകുമെന്ന് കാണിക്കുന്നു. ഇതിന്റെ അനന്തരഫലങ്ങൾ ലഘൂകരിക്കുന്നതിന് ഫംഗസ് രോഗകാരികൾക്ക് എതിരെയുള്ള അവബോധം വളർത്തുന്നതും ഫലപ്രദമായ ഇടപെടലുകൾ വികസിപ്പിക്കുന്നതിനും നപടികൾ അത്യാവശ്യമാണ്- എന്നും അദ്ദേഹം വ്യക്തമാക്കുന്നു.