ബ്രെയിൻറോട്ട് പിടിപെട്ടോ

ഭാഷാ-‐സാംസ്കാരിക തലങ്ങളിൽ ചർച്ചചെയ്യപ്പെട്ട ഏറ്റവും പ്രധാനപ്പെട്ട വാക്ക് കണ്ടെത്തി ഓക്സ്ഫഡ്‌ യൂണിവേഴ്സിറ്റിപ്രസ്‌ എല്ലാവർഷവും പ്രസിദ്ധീകരിക്കാറുണ്ട്‌. അത്തരത്തിൽ കഴിഞ്ഞ വർഷം തെരഞ്ഞെടുത്തത് ‘BRAIN ROT' എന്ന വാക്കായിരുന്നു. ഒരുപക്ഷേ, നാമറിയാതെതന്നെ നമ്മിൽ സ്വാധീനം ചെലുത്തിക്കൊണ്ടിരിക്കുന്ന ഒരുതരം വ്യത്യസ്തമായ രോഗാവസ്ഥ. സോഷ്യൽ മീഡിയയിലും റീൽസിലും കൂടുതലായി സമയം ചെലവഴിക്കുന്നവർക്ക്‌ ജീവിതത്തിൽ മറ്റൊന്നിലും അൽപ്പസമയംപോലും ശ്രദ്ധ കേന്ദ്രീകരിക്കാനാകാത്ത സ്ഥിതിവിശേഷം. പ്രത്യേകിച്ച്‌ പുതുതലമുറയിൽപ്പെട്ടവർക്ക്‌.

ഇടവേളകളില്ലാതെ മൊബൈൽഫോണും സോഷ്യൽമീഡിയയും ഒക്കെ ഉപയോഗിക്കുന്നവരാണോ. എന്നാൽ, ഒന്നോ രണ്ടോ മണിക്കൂർ വെറുതെ ഒന്നും ചെയ്യാതെ, ഒരിടത്തു ഇരിക്കാൻ ശ്രമിച്ചുനോക്കൂ! അതിന് പൂർണമായും കഴിയുമോ എന്നകാര്യം സംശയമാണ്. അറിയാതെ അടുത്തിരിക്കുന്ന മൊബൈൽ ഫോണിലേക്ക്‌ കൈകൾ നീളും. അത്രമേൽ നമ്മിൽ പലരും മൊബൈൽ ഫോണിനും സോഷ്യൽ മീഡിയക്കും അടിമയായി മാറിയിരിക്കുന്നു.

തലച്ചോറിൽ ആവശ്യത്തിലധികം വിവരങ്ങളുള്ള അവസ്ഥയ്ക്ക് ഇൻഫോബേസിറ്റി (Infobesity) എന്നും ഇൻഫർമേഷൻ ഓവർലോഡ് എന്നും പറയാറുണ്ട്. ഇത്തരത്തിൽ അപ്രധാനവും അനാവശ്യവുമായ വിവരങ്ങൾ തലച്ചോറിൽ കൂടുതലായി ശേഖരിക്കപ്പെടുമ്പോൾ അനുഭവപ്പെടുന്ന ക്ഷീണം ബ്രെയിൻ റോട്ടിന്റെ ഭാഗമാണ്.

ഇത്തരത്തിൽ സോഷ്യൽ മീഡിയയുടെ അമിതമായ സ്വാധീനംമൂലം നമ്മുടെ ശ്രദ്ധയിൽ സമൂലമായ കുറവ്‌ വരികയും നാം ചെയ്യുന്ന കാര്യങ്ങളിലും മറ്റും ശ്രദ്ധ കേന്ദ്രീകരിക്കാൻ കഴിയാതെയും വരുന്ന അവസ്ഥ. ശാസ്ത്രലോകം ഈ അവസ്ഥയെ ‘ബ്രെയിൻ റോട്ട്' (Brain Rot) എന്നാണ് പറയുന്നത്. ശ്രദ്ധ ഇല്ലാതാകുന്നു എന്നുമാത്രമല്ല, ആഴത്തിലുള്ള തുറന്നചിന്ത സാധ്യമാകാതെ വരിക, കാര്യങ്ങൾ ഓർത്തിരിക്കാൻ സാധിക്കാതെ വരിക, സൃഷ്ടിപരമാകാൻ കഴിയാതിരിക്കുക തുടങ്ങിയവയൊക്കെ ബ്രെയിൻ റോട്ടിന്റെ പരിണതഫലങ്ങളാണ്. ബ്രെയിൻ റോട്ട് കുറയ്ക്കാൻ നാം ഈ അവസ്ഥയെ നന്നായി മനസ്സിലാക്കുക എന്നതാണ് ആദ്യം ചെയ്യേണ്ടത്.

ഡോപ്പാമിൻ ഫാസ്റ്റിങ്‌ (Dopamine Fasting) നല്ലരീതിയാണ്. അതായത്‌, നമുക്ക് അമിതമായ സന്തോഷവും ഊർജവും തരുന്ന നല്ലതല്ലാത്ത പ്രവർത്തനങ്ങൾക്ക് ഒരു ദിവസമെങ്കിലും അവധിനൽകുക. ഒന്നും ആലോചിക്കാതെ പൂർണമായും മനസ്സിനെ സ്വതന്ത്രമാക്കിവിടുക.