print edition എയ്ഡ്സ് രോഗബാധ കൂടുതലും സുരക്ഷിതമല്ലാത്ത ലൈംഗികബന്ധത്തിലൂടെ

മലപ്പുറം: സംസ്ഥാനത്ത് മൂന്ന് വര്‍ഷത്തിനിടെ സ്ഥിരീകരിച്ച എച്ച്ഐവി കേസുകളില്‍ 62.6 ശതമാനവും ഒന്നിലധികം പങ്കാളികളുമായുള്ള സുരക്ഷിതമല്ലാത്ത ലൈംഗികബന്ധം കാരണമാണെന്ന് ആരോഗ്യവകുപ്പിന്റെ റിപ്പോര്‍ട്ട്. 2022–23 സാമ്പത്തികവര്‍ഷംമുതല്‍ 2025 ഒക്‌ടോബര്‍വരെയുള്ള കണക്കനുസരിച്ചാണിത്. ഇക്കാലയളവില്‍ 4447 പേരിലാണ് എച്ച്ഐവി സ്ഥിരീകരിച്ചത്. ഇതില്‍ 2803ഉം സുരക്ഷിതമല്ലാത്ത ലൈംഗികബന്ധത്തിലൂടെയാണ്. 2022–23ല്‍ 779, 2023–24ല്‍ 821, 2024–25ല്‍ 732, 2025ല്‍ 471 എന്നിങ്ങനെയാണ് കേസുകളുടെ എണ്ണം.

1101 പേര്‍ക്ക് (24.6 ശതമാനം) സ്വവര്‍ഗ ലൈംഗികബന്ധത്തിലൂടെയാണ് രോഗബാധയുണ്ടായത്. ഒരേ സിറിഞ്ചിലൂടെ മയക്കുമരുന്ന് കുത്തിവച്ചതിലൂടെയാണ് 361 പേരില്‍ (8.1 ശതമാനം) വൈറസ് എത്തിയത്. അമ്മയില്‍നിന്ന് കുഞ്ഞിലേക്ക് പകര്‍ന്ന 41 കേസുകളും (0.90 ശതമാനം) ഒന്നിലധികം കാരണങ്ങളുള്ള അഞ്ച് കേസുകളുമുണ്ട് (0.1 ശതമാനം). 166 പേരുടെ (3.70 ശതമാനം) കാരണം വ്യക്തമല്ല.

എറണാകുളം ജില്ലയിലാണ് ഏറ്റവും കൂടുതല്‍ കേസുകള്‍ –850. വയനാടാണ് കുറവ് –67. എച്ച്ഐവി ബാധിതരാകുന്നവരില്‍ യുവാക്കളുടെ എണ്ണം വര്‍ധിച്ചിട്ടുണ്ട്. 2022മുതല്‍ 2024വരെ പോസിറ്റീവായവരില്‍ 15നും 24നും ഇടയില്‍ പ്രായമുള്ളവര്‍ യഥാക്രമം ഒമ്പത് ശതമാനം, 12 ശതമാനം, 14.2 ശതമാനം എന്നിങ്ങനെയാണ്. 2025 ഏപ്രില്‍മുതല്‍ ഒക്‌ടോബര്‍വരെ ഇത് 15.4 ശതമാനമാണ്.

പ്രതിരോധപ്രവര്‍ത്തനങ്ങളും സംസ്ഥാനത്ത് ശക്തമാണ്. ഇതിനായി 95:95:95 രീതിയാണ് അവലംബിക്കുന്നത്. 95 ശതമാനം എച്ച്ഐവി ബാധിതരെയും തിരിച്ചറിയുക, രോഗബാധിതരില്‍ 95 ശതമാനം പേര്‍ക്കും ആന്റി റിട്രോ വൈറല്‍ (എആര്‍ടി) ചികിത്സ നല്‍കുക, ചികിത്സയിലുള്ള 95 ശതമാനംപേരിലും വൈറസ് നിയന്ത്രണവിധേയമാക്കുക എന്നതാണ് ലക്ഷ്യം. സംസ്ഥാനത്ത് പ്രതീക്ഷിത കണക്കിന്റെ 83 ശതമാനം രോഗബാധിതരെയും തിരിച്ചറിഞ്ഞു. ഇതില്‍ 95 ശതമാനത്തിലധികം പേര്‍ക്കും ചികിത്സ നല്‍കുന്നുണ്ട്. ഇവരില്‍ 99.8 ശതമാനത്തിലും വൈറസ് നിയന്ത്രണവിധേയമാക്കി.