രാജ്യത്ത് എട്ട് ശതമാനം അധികം പെയ്തു, കേരളത്തിൽ ജൂൺ മുതൽ 13 ശതമാനം കുറഞ്ഞു

തിരുവനന്തപുരം: നാല് മാസത്തെ തെക്കുപടിഞ്ഞാറൻ മൺസൂൺ കാലയളവിൽ രാജ്യത്ത് സാധാരണയേക്കാൾ കൂടുതൽ മഴ രേഖപ്പെടുത്തി. എട്ട് ശതമാനം വർധനയാണ് അനുഭവപ്പെട്ടത്. എന്നാൽ കേരളത്തിൽ ഈ  സീസണിൽ ലഭിക്കേണ്ട മഴ കണക്കിൽ 13% കുറവ് രേഖപ്പെടുത്തി.

ഈ വർഷം ഇന്ത്യയൊട്ടാകെ സാധാരണയെക്കാൾ 8% കൂടുതൽ (ദീർഘകാല ശരാശരിയുടെ 108%) മൺസൂൺ മഴ ലഭിച്ചു. 2001 ന് ശേഷമുള്ള അഞ്ചാമത്തെ ഉയർന്നതും 1901 ന് ശേഷമുള്ള 38-ാമത്തെ ഉയർന്നതുമാണ് ഈ കണക്കെന്ന് ഇന്ത്യൻ കാലാവസ്ഥാ വകുപ്പ് (IMD) ഡാറ്റകൾ പറയുന്നു.

വടക്കുപടിഞ്ഞാറൻ ഇന്ത്യ 27%, മധ്യ ഇന്ത്യ 15%, ദക്ഷിണ ഉപദ്വീപ് 10% എന്നിങ്ങനെ സീസണൽ ശരാശരിയേക്കാൾ കൂടുതൽ മഴ ലഭിച്ചു. ജലസംഭരണികളും ഭൂജലനിരപ്പും സമ്പന്നമായപ്പോൾ കൃഷിക്കും ജീവജാലങ്ങൾക്കും ദുരിത ദുഖങ്ങൾ നൽകി. ദുരന്തങ്ങൾ ആവർത്തിച്ചു.

ചിറാപുഞ്ചി പിന്നിലായി

അപ്പോഴും കിഴക്കൻ, വടക്കുകിഴക്കൻ ഇന്ത്യയിലെ വിവിധ സംസ്ഥാനങ്ങൾ ഉൾപ്പെട്ട പ്രദേശങ്ങളിൽ സാധാരണയായി ലഭിച്ചിരുന്നതിന്റെ 80% മാത്രമായിരുന്നു പെയ്തത്. ജൂൺ 1 മുതൽ സെപ്റ്റംബർ 30 വരെ ചിറാപുഞ്ചിയിൽ ഇത്തവണ ലഭിച്ചത് ഇതുവരെ ഉണ്ടായതിൽ ഏറ്റവും കുറഞ്ഞ മഴ 4355 mm ആണ്. അതേ സമയത്ത് കേരളത്തിലെ കോഴിക്കോട് കക്കയത്ത് ലഭിച്ചത് 5553 mm മഴയാണ്.

വടക്കു കിഴക്കൻ മേഖലയിൽ ഇതുവരെ 1089.3 മില്ലി മീറ്റർ മഴയാണ് ലഭിച്ചത്. മഴയിൽ 20 ശതമാനം കുറവാണ് രേഖപ്പെടുത്തിയത്. അരുണാചൽ പ്രദേശ്, അസം, മേഘാലയ തുടങ്ങിയ സംസ്ഥാനങ്ങളിലാണ് മഴ കുറവ് ഏറ്റവുമധികം പ്രകടമായത്. ഇന്ത്യയുടെ ഭൂരിഭാഗം പ്രദേശങ്ങളിലും സാധാരണയേക്കാൾ കൂടുതൽ മഴ ലഭിക്കുമ്പോൾ, വടക്കുകിഴക്കൻ സംസ്ഥാനങ്ങളിൽ സാധാരണയേക്കാൾ കുറഞ്ഞ മഴയാണ് ഇപ്പോൾ ലഭിക്കുന്നതെന്ന് കാലാവസ്ഥ വിദഗ്ധർ ചൂണ്ടിക്കാണിക്കുന്നു. കഴിഞ്ഞ രണ്ട് വർഷങ്ങളിലായി ഈ പ്രതിഭാസം തുടരുന്നുണ്ടെന്നും കാലാവസ്ഥ വിദഗ്ധർ വ്യക്തമാക്കി

വടക്കുപടിഞ്ഞാറൻ ഇന്ത്യയിൽ ആണ് ഏറ്റവും കൂടുതൽ പെയ്തത്. 74.79 സെന്റീമീറ്റർ മഴ ലഭിച്ചു, 2001 ന് ശേഷമുള്ള ഏറ്റവും ഉയർന്ന മഴയും 1901 ന് ശേഷമുള്ള ആറാമത്തെ ഉയർന്ന മഴയുമാണ് ഇത്. എന്നാൽ കിഴക്കൻ, വടക്കുകിഴക്കൻ ഇന്ത്യയിൽ 108.9 സെന്റീമീറ്റർ മഴയാണ് ലഭിച്ചത്. ഇത് 1901 ന് ശേഷമുള്ള രണ്ടാമത്തെ ഏറ്റവും കുറഞ്ഞ മഴയാണ്. ഭൂപ്രദേശങ്ങളെ അപേക്ഷിച്ച് വ്യാപനത്തിൽ പരമ്പരാഗത പ്രദേശങ്ങളെ മഴ മാറ്റിപ്പിടിച്ചു.

രാജ്യത്തെ മൺസൂൺ മഴയുടെ ദീർഘകാല ശരാശരി 87 സെന്റിമീറ്ററാണ്. ഇത്തവണ ഇത് 93.7 സെന്റീമീറ്റർ ആയിരുന്നു. സെപ്റ്റംബർ 29 വരെ രാജ്യത്ത് ഇതുവരെ 93.52 മില്ലിമീറ്റർ മഴ പെയ്തിറങ്ങി.

നേരത്തെ എത്തി നേരത്തെ വ്യാപിച്ചു

മാസങ്ങളുടെ അടിസ്ഥാനത്തിൽ വിശകലനം ചെയ്യുമ്പോൾ, രാജ്യത്ത് ജൂണിൽ സാധാരണ ലഭിക്കുന്നതിനേക്കാൾ 9% കൂടുതൽ ലഭിച്ചു. ജൂലൈ, ഓഗസ്റ്റ് മാസങ്ങളിൽ 5% കൂടുതൽ പെയ്തിറങ്ങി. സെപ്റ്റംബറിൽ നേരത്തെ ലഭിച്ചതിനേക്കാൾ 15% കൂടുതലുമാണ് പെയ്തത്.

തെക്കുപടിഞ്ഞാറൻ മൺസൂൺ 2025 മെയ് 13 ന് തെക്കൻ ആൻഡമാൻ കടലിലും നിക്കോബാർ ദ്വീപുകളിലും സാധാരണ ഷെഡ്യൂളിനേക്കാൾ ഏകദേശം ഒമ്പത് ദിവസം മുമ്പേ എത്തി.  ജൂൺ 1 ന് സാധാരണ ആരംഭിക്കേണ്ട തീയതിക്ക് മുമ്പ് മെയ് 24 ന് കേരളത്തിൽ പെയ്ത് നിറഞ്ഞു. ജൂലൈ 8 ന് ഇതര പ്രദേശങ്ങളിലേക്ക് മുന്നേറിയിരുന്നത് ജൂൺ 29 ന് തന്നെ രാജ്യം മുഴുവൻ വ്യാപിച്ചു.

ന്യൂന മർദ്ദങ്ങളുടെ കടന്ന കൈ

ജൂൺ മുതൽ സെപ്റ്റംബർ വരെയുള്ള കാലവർഷ സീസണിൽ ബംഗാൾ ഉൾക്കടലിലും അറബിക്കടലിലും കരയിലുമായി ഇത്തവണ രൂപപ്പെട്ടത് 18 ന്യുന മർദ്ദങ്ങളാണ്. സാധാരണയായി ഇത് 15 വരെയാണ് ഉണ്ടാവാറുള്ളത്. ഇത്തവ ഉണ്ടായവയിൽ തന്നെ ആറെണ്ണം തീവ്ര ന്യുന മർദ്ദമായും( Depression) ഒരെണ്ണം അതി തീവ്ര ന്യുന മർദ്ദമായി( Deep Depression) മാറി.

മൺസൂൺ കാലത്തെ 122 ദിവസങ്ങളിൽ 69 ദിവസവും ന്യുന മർദ്ദ ദിനങ്ങളായിരുന്നു. മൺസൂൺ വിടപറയുന്നതിന്റെ തൊട്ട് തലേ ദിവസവും ഭീഷണിയുമായി എത്തിയിരുന്നു. സെപ്തംബർ 30 ന് ബംഗാൾ ഉൾകടലിൽ ന്യുന മർദ്ദം രൂപപ്പെട്ടു. വെള്ളിയാഴ്ച യോടെ തീവ്ര ന്യുന മർദ്ദമായി ആന്ധ്രാ ഒഡിഷ തീരത്തേക്ക് മാറി.

കേരളത്തിൽ കനത്ത തുടക്കം നേർത്ത പിൻമാറ്റം

കേരളത്തിൽ ഈ വർഷം, ജൂൺ, ജൂലൈ മാസങ്ങളിൽ തെക്കുപടിഞ്ഞാറൻ മൺസൂൺ മഴയുടെ ഭൂരിഭാഗവും രേഖപ്പെടുത്തി. ഓഗസ്റ്റ്, സെപ്റ്റംബർ മാസങ്ങളിൽ മഴയുടെ അളവിൽ ക്രമേണ കുറവുണ്ടായി.

കേരളത്തിൽ ഈ വർഷം തീവ്രവും അതിശക്തവുമായ മഴയുടെ എണ്ണം താരതമ്യേന കുറവായിരുന്നു. മൂന്ന് ദിവസം മാത്രം അതിശക്തമായ മഴ (24 മണിക്കൂറിൽ 21 സെന്റിമീറ്ററിൽ കൂടുതൽ) 16 ദിവസം അതിശക്തമായ മഴ (24 മണിക്കൂറിൽ 11–20 സെന്റീമീറ്റർ) 37 ദിവസം കനത്ത മഴ (24 മണിക്കൂറിൽ 7–11 സെന്റീമീറ്റർ) എന്നിങ്ങനെയാണ് തിമിർത്ത് പെയ്ത കണക്ക്.

പിന്നിലായത് മൺസൂൺ

ദിനങ്ങളുടെ കണക്കിൽ മാത്രം

ജൂൺ ഒന്ന് മുതൽ സെപ്റ്റംബർ 30 വരെയാണ് കേരളത്തിൽ തെക്കുപടിഞ്ഞാറൻ മൺസൂൺ ആയി കണക്കാക്കുന്നത്. കാലാവസ്ഥാ നിരീക്ഷണ കേന്ദ്രത്തിന്റെ കണക്ക് പ്രകാരം ജൂൺ ഒന്ന് മുതൽ സെപ്റ്റംബർ 30 വരെ ലഭിച്ചത് 1752.7 മില്ലി മീറ്റർ മഴയാണ്. സാധാരണ ലഭിക്കേണ്ടതിനേക്കാൾ 13ശതമാനം മഴ കുറഞ്ഞു. 2018.6 മില്ലി മീറ്റർ മഴ ലഭിക്കേണ്ടിടത്താണ് 1752.7 മില്ലി മീറ്റർ മഴ ലഭിച്ചത്. ഇത് നിശ്ചിത തീയതിക്ക് അകത്ത് പരമ്പരാഗതമായി കണക്കു കൂട്ടി വരുന്നതാണ്.

എന്നാൽ, കാലവർഷം ഇത്തവണ മെയ് 24ന് തന്നെ കേരളത്തിൽ എത്തിയിരുന്നു. മെയ് 24 മുതൽ മെയ് 31 വരെയുള്ള ദിവസങ്ങളിൽ 440.5 മില്ലി മീറ്റർ മഴയാണ് ലഭിച്ചത്. ഈ മഴയളവ് കണക്ക് പ്രകാരം വേനൽമഴയിലാണ് രേഖപ്പെടുത്തുന്നത്. ഇത് കൂടി ഉൾപ്പെടുത്തിയാൽ കേരളത്തിൽ തുലാവർഷത്തിൽ റെക്കോർഡ് മഴയാണ് ലഭിച്ചത്.

നാല് വർഷമായി തീവ്രത കുറയുന്നു

2018-ൽ 33 തവണ അതിശക്തമായ മഴയും 163 തവണ അതിശക്തമായ മഴയും 607 തവണ പ്രളയ വർഷവും ലഭിച്ചിരുന്നു. രണ്ടും താരതമ്യം ചെയ്യുമ്പോൾ 2020 മുതൽ കേരളത്തിൽ മൺസൂൺ തീവ്രതയിൽ ക്രമേണ കുറവ് ഉണ്ടായി തുടങ്ങിയതായും വിലയിരുത്തുന്നു.

ഒക്ടോബർ മധ്യത്തോടെ ആരംഭിച്ച് ഡിസംബർ അവസാനം വരെ നീണ്ടുനിൽക്കുന്ന തുലാവർഷം എന്ന വടക്കുകിഴക്കൻ മൺസൂൺ കാലയളവിൽ സാധാരണയേക്കാൾ കൂടുതൽ മഴ ലഭിക്കും എന്ന പ്രതീക്ഷയാണ്. തെക്കുപടിഞ്ഞാറൻ മൺസൂണിലെ 13 ശതമാനം കുറവ് ഇതോടെ നികത്തപ്പെടുമെന്ന് സംസ്ഥാനം പ്രതീക്ഷിക്കുന്നു.

വടക്കുകിഴക്കൻ മൺസൂൺ കാലയളവിൽ കേരളത്തിൽ അധിക മഴ ലഭിക്കുമെന്ന ഇന്ത്യൻ കാലാവസ്ഥാ വകുപ്പ് (ഐഎംഡി) പുറപ്പെടുവിച്ച ദീർഘകാല പ്രവചനം മുന്നറിയിപ്പ് ഈ പ്രതീക്ഷ ശരിവെക്കുന്നു. കഴിഞ്ഞ വേനൽ ഇടമഴയുടെ ലഭ്യതയാലും മൺസൂണിന്റെ നേരത്തെയുള്ള വരവിനാലും തീവ്രത കുറഞ്ഞാണ് അനുഭവപ്പെട്ടത്. വരൾയുടെ രൂക്ഷത പതിവ് പോലെ ഉണ്ടായില്ല.

ലഭ്യമായ ഡാറ്റയിൽ ഇത്തവണത്തെ കാലവർഷത്തിൽ (മെയ്‌ 24 മുതൽ സെപ്റ്റംബർ 30 വരെ) കൂടുതൽ മഴ ലഭിച്ച സ്ഥലങ്ങൾ (5000 mm കൂടുതൽ )

കക്കയം 6594 mm

വളാംതോട് 5651

ബാണസുര 5514

പുളിങ്ങോം 5425

പൈനാവ് 5183

നിരവിൽപുഴ 5109

കുഞ്ഞോം 5091

പയ്യാവൂർ 5053

കേരളത്തിൽ കഴിഞ്ഞ രണ്ട വർഷത്തെ പ്രവണത നോക്കുമ്പോൾ. 2024 കേരളത്തിൽ മൺസൂൺ എത്തിയത് മെയ്‌ 30 നാണ്. ജൂൺ തുടക്കത്തിൽ ഇത് ദുർബലമായിരുന്നു. പക്ഷെ പിന്നീട് ജൂലൈയിൽ ശക്തമായി. മുണ്ടക്കൈ ചൂരൽ മല, വിലങ്ങാട് ദുരന്തങ്ങൾക്ക് ഇടയാക്കി. ഇതിൽ നിന്നും വ്യത്യസ്തമായി 2025 ൽ മെയ്‌ 24.ന് നേരത്ത തുടങ്ങി. 24 ൽ നിന്ന് വ്യത്യസ്തമായി തുടക്കം അതി ഗംഭീരമായിരുന്നു. ജൂണിലും ജൂലൈ ആഗസ്ത് പകുതി വരെ ചെറിയ ഇടവേളകളൊഴിച് തുടർച്ചയായ ദിവസങ്ങളിൽ മഴ ലഭിച്ചു.വലിയ പ്രശ്നങ്ങൾ ഇല്ലാതെ തുലാവർഷത്തിലേക്ക് വരുന്നു.

പ്രതീക്ഷയോടെ തുലാവർഷത്തിലേക്ക്

ഒക്ടോബർ 19 ന് എട്ട് ദിവസത്തെ സ്റ്റാൻഡേർഡ് ഡീവിയേഷനോടെ വടക്കുകിഴക്കൻ മൺസൂൺ കേരളത്തിൽ എത്തേണ്ടതുണ്ട്. അതായത് ഒക്ടോബർ 11 നും 27 നും ഇടയിൽ ആരംഭിക്കുന്നത് സാധാരണ ആരംഭമായി കണക്കാക്കപ്പെടുന്നു.