ഗ്രീസിലും യുപിഐ സേവനം; ഇന്ത്യൻ സഞ്ചാരികൾക്ക് എളുപ്പത്തിൽ പണമിടപാടുകൾ നടത്താം

ഏഥൻസ് : ഗ്രീസിലേക്ക് യാത്ര തിരിക്കുന്ന ഇന്ത്യൻ സഞ്ചാരികൾക്ക് ഇനി പണമിടപാടുകൾ കൂടുതൽ എളുപ്പമാകും. യൂറോപ്പിലുടനീളം ഇന്ത്യയുടെ അതിവേഗം വളരുന്ന ഡിജിറ്റൽ പേയ്‌മെന്റ് ശൃംഖല വ്യാപിപ്പിച്ചുകൊണ്ട് ഇന്ത്യയുടെ യുപിഐ സേവനം ഇപ്പോൾ ഗ്രീസിലും പ്രവർത്തനമാരംഭിച്ചു.

ഫ്രാൻസിലെ പ്രശസ്തമായ ടൂറിസ്റ്റ് കേന്ദ്രങ്ങളായ പാരീസിലെ ഈഫൽ ടവർ, നീസിലെ ഗാലറീസ് ലഫായെറ്റ് എന്നിവിടങ്ങളിൽ അടുത്തിടെ യുപിഐ വിജയകരമായി ലഭ്യമാക്കിയതിന് പിന്നാലെയാണ് ഈ നീക്കം. ആഗോളതലത്തിലെ പ്രധാന വിനോദസഞ്ചാര കേന്ദ്രങ്ങളിൽ ഇന്ത്യയുടെ യുപിഐ പേയ്‌മെന്റ് സംവിധാനം കൂടുതൽ സ്വീകരിക്കപ്പെടുന്നു എന്നതിന്റെ വ്യക്തമായ സൂചനയാണിത്.

ഇന്ത്യൻ വിനോദസഞ്ചാരികളെ സംബന്ധിച്ചിടത്തോളം നാട്ടിലുള്ള സൗകര്യം വിദേശത്തും കിട്ടുക എന്നത് ആശ്വാസമുള്ള കാര്യമാണ്. ഒരു സാധാരണ ചായക്കടയിൽ നിന്ന് ക്യുആർ കോഡ് സ്കാൻ ചെയ്യുന്നത് പോലെ ലളിതമായി ഇനി വിദേശത്തും പണമിടപാടുകൾ നടത്താമെന്ന് ചുരുക്കം.

ഏഥൻസ് സന്ദർശനത്തിനിടെയാണ് വാണിജ്യ വ്യവസായ മന്ത്രി പിയൂഷ് ഗോയൽ ഇക്കാര്യം പ്രഖ്യാപിച്ചത്. യൂറോബാങ്കും (Eurobank) എൻപിസിഐ ഇന്റർനാഷണൽ പേയ്‌മെന്റ്‌സ് ലിമിറ്റഡും (NIPL) തമ്മിൽ ചേർന്നാണ് ഇത് നടപ്പാക്കുന്നത്.

ഇന്ത്യയുടെ യുപിഐ സംവിധാനം താഴെ പറയുന്ന രാജ്യങ്ങളിൽ ഔദ്യോഗികമായി സ്വീകരിക്കുന്നുണ്ട്.

* ഗ്രീസ്

* സിംഗപ്പൂർ

* യുണൈറ്റഡ് അറബ് എമിറേറ്റ്സ്

* ഫ്രാൻസ്

* മൗറീഷ്യസ്

* നേപ്പാൾ

* ഭൂട്ടാൻ

* ഖത്തർ

* ശ്രീലങ്ക

* കംബോഡിയ