എൻവിഡിയയുടെ 'ആർടിഎക്സ് സ്പാർക്ക്' ചിപ്പുമായി ലെനോവോയുടെ പുതിയ ലാപ്ടോപ്പ്; വരുന്നു 'യോഗ പ്രോ 9എൻ'

തിരുവനന്തപുരം : ടെക് ലോകത്ത് വലിയ ചർച്ചയായ എൻവിഡിയയുടെ പുതിയ 'ആർടിഎക്സ് സ്പാർക്ക്' (RTX Spark) പ്രോസസറുമായി ലെനോവോ പുതിയ ലാപ്ടോപ്പ് അവതരിപ്പിക്കുന്നു. ലെനോവോ 'യോഗ പ്രോ 9'എൻ എന്ന് പേരിട്ടിരിക്കുന്ന ഈ ലാപ്ടോപ്പ്, ലെനോവോയുടെ ആദ്യ എൻവിഡിയ സ്പാർക്ക് അധിഷ്ഠിത ഉപകരണമായിരിക്കും. നിലവിൽ വിപണിയിലുള്ള ലെനോവോ യോഗ പ്രോ 9ഐ-യുടെ അതേ മെറ്റൽ ബോഡിയിലായിരിക്കും ഈ പുതിയ ലാപ്ടോപ്പും പുറത്തിറങ്ങുക.

പ്രധാന സവിശേഷതകൾ (പ്രതീക്ഷിക്കുന്നത്):

അത്യുഗ്രൻ പ്രകടനം: എൻവിഡിയയുടെ കരുത്തുറ്റ 'ബ്ലാക്ക്‌വെൽ' ആർടിഎക്സ് ജിപിയുവും 20-കോർ ഗ്രേസ് സിപിയുവുമാണ് ഈ ലാപ്ടോപ്പിന്റെ പ്രധാന സവിശേഷതകൾ. 6,144 കുഡാ (CUDA) കോറുകളും അഞ്ചാം തലമുറ ടെൻസർ കോറുകളും ഇതിന്റെ പ്രത്യേകതയാണ്. 1 പെറ്റാഫ്ലോപ്സ് (petaflops) FP4 AI പെർഫോമൻസ് ഇത് നൽകുന്നു.

മെമ്മറിയും ഡിസ്‌പ്ലേയും: 128 ജിബി വരെ റാം സൗകര്യമുണ്ട്. 15 ഇഞ്ച് പ്യുവർസൈറ്റ് പ്രോ (PureSight Pro), ഡോൾബി വിഷൻ ഡിസ്‌പ്ലേ എന്നിവയാണ് ലാപ്ടോപ്പിന്റെ ദൃശ്യാനുഭവം മെച്ചപ്പെടുത്തുന്നത്.

ബാറ്ററിയും സൗകര്യങ്ങളും: 'ഓൾ-ഡേ' ബാറ്ററി ലൈഫ് കമ്പനി വാഗ്ദാനം ചെയ്യുന്നു. വിൻഡോസ് 11 ഓപ്പറേറ്റിങ് സിസ്റ്റത്തിൽ പ്രവർത്തിക്കുന്ന ലാപ്ടോപ്പിൽ കോപൈലറ്റ് കീയും സ്റ്റൈലസ് പിന്തുണയുള്ള ടച്ച്പാഡുമുണ്ട്. ഡോൾബി അറ്റ്‌മോസ് പിന്തുണയുള്ള ആറ് സ്പീക്കറുകൾ (4 വൂഫറുകൾ + 2 ട്വീറ്ററുകൾ) ഇതിൽ ഉൾപ്പെടുത്തിയിട്ടുണ്ട്.

കണക്റ്റിവിറ്റി: തണ്ടർബോൾട്ട് 4 പോർട്ടുകൾ, എച്ച്ഡിഎംഐ 2.1, എസ്ഡി കാർഡ് റീഡർ, യുഎസ്ബി ടൈപ്പ്-സി, ടൈപ്പ്-എ പോർട്ടുകൾ എന്നിവ ലാപ്ടോപ്പിലുണ്ടാകും.

2026ന്റെ അവസാനത്തോടെ ലാപ്ടോപ്പ് വിപണിയിലെത്തുമെന്നാണ് സൂചന. 'തണ്ടർ ഗ്രേ' നിറത്തിലായിരിക്കും ഇത് ആദ്യമെത്തുക. ഓൺ-ഡിവൈസ് എഐ പേഴ്സണൽ ഏജന്റുകൾക്ക് പിന്തുണ നൽകുന്ന ഈ 'സൂപ്പർചിപ്പ്' ലാപ്ടോപ്പ് മേഖലയിൽ പുതിയ വിപ്ലവത്തിന് വഴിയൊരുക്കുമെന്നാണ് ടെക് വിദഗ്ധരുടെ വിലയിരുത്തൽ.