ലാവ 'വിരാട് വി1 5ജി' ഉടൻ എത്തും; ആകർഷകമായ ഫീച്ചറുകളുമായി പുതിയ സ്മാർട്ട്‌ഫോൺ സീരീസ്

ന്യൂഡൽഹി : ഇന്ത്യൻ സ്മാർട്ട്‌ഫോൺ നിർമാതാക്കളായ ലാവ തങ്ങളുടെ ഏറ്റവും പുതിയ സ്മാർട്ട്‌ഫോൺ സീരീസായ 'വിരാട്' ഇന്ത്യൻ വിപണിയിൽ അവതരിപ്പിക്കുന്നു. ലാവ വിരാട് വി1 5ജി (Lava Virat V1 5G), ലാവ വിരാട് വി1 4ജി (Lava Virat V1 4G) എന്നീ രണ്ട് മോഡലുകളാണ് ഈ സീരീസിൽ ആദ്യമായി പുറത്തിറക്കുന്നത്. ജൂലൈ 2ന് ഫോണുകൾ ഇന്ത്യയിൽ ഔദ്യോഗികമായി പുറത്തിറക്കുമെന്ന് കമ്പനി അറിയിച്ചു. പ്രമുഖ ഇ-കോമേഴ്സ് പ്ലാറ്റ്‌ഫോമായ ഫ്ലിപ്കാർട്ടിലൂടെയാകും ഫോണുകളുടെ വിൽപ്പന നടക്കുക.

ഡിസൈനിന്റെ കാര്യത്തിൽ ഇരു ഫോണുകളും ഏറെക്കുറെ സമാനമാണെങ്കിലും ക്യാമറ മോഡ്യൂളിൽ നേരിയ വ്യത്യാസങ്ങളുണ്ട്. ലാവ വിരാട് വി1 4ജി മോഡലിന് പിന്നിൽ രണ്ട് ലെൻസുകളുള്ള ചതുരാകൃതിയിലുള്ള ക്യാമറ മോഡ്യൂളാണ് നൽകിയിരിക്കുന്നത്. ഇതിൽ എൽഇഡി ഫ്ലാഷോട് കൂടിയ 13 മെഗാപിക്സൽ പ്രൈമറി ക്യാമറ ഉൾപ്പെടുന്നു. ജൂൺ 25ന് 9,999 രൂപ പ്രാരംഭ വിലയിൽ പുറത്തിറങ്ങിയ 'ലാവ സ്മാർട്ട് 4 പ്ലസ്' ഫോണിന് സമാനമായ ഡിസൈനാണ് 4ജി മോഡലിനുള്ളത്.

ലാവ വിരാട് വി1 5ജി മോഡലിന്റെ പിൻഭാഗത്തെ ക്യാമറ മോഡ്യൂൾ ഡിസൈനിലും ബാക്ക് പാനലിലെ പാറ്റേണിലും ചെറിയ മാറ്റങ്ങളുണ്ട്. ഇതിലും രണ്ട് ക്യാമറ ലെൻസുകളും എൽഇഡി ഫ്ലാഷും അടങ്ങിയിരിക്കുന്നു. ഫ്ലാറ്റ് റിയർ പാനലുമായി എത്തുന്ന ഇരു ഫോണുകളും ബ്ലൂ, ഗോൾഡ് എന്നീ രണ്ട് ആകർഷകമായ നിറങ്ങളിൽ ലഭ്യമാകും.

ഫോണിന്റെ വലതുവശത്തായി പവർ ബട്ടണും വോളിയം കൺട്രോളുകളും നൽകിയിട്ടുണ്ട്. താഴെ ഭാഗത്തായി യുഎസ്ബി ടൈപ്പ്-സി പോർട്ട്, സ്പീക്കർ ഗ്രില്ല്, 3.5 എംഎം ഓഡിയോ ജാക്ക്, മൈക്രോഫോൺ കട്ടൗട്ട് എന്നിവയും ഉൾപ്പെടുത്തിയിട്ടുണ്ട്. ഫോണിന്റെ മറ്റ് സവിശേഷതകളും വില വിവരങ്ങളും ജൂലൈ 21ലെ ലോഞ്ചിന് ശേഷം വ്യക്തമാകും.