ആപ്പിളിൽ ഇനി ടെർണസ്‌ യുഗം; ടിം കുക്ക് സിഇഒ സ്ഥാനം ഒഴിയുന്നു

വാഷിംഗ്ടൺ: ടെക് ലോകത്തെ വമ്പന്മാരായ ആപ്പിളിന്റെ അമരത്തുനിന്ന് ടിം കുക്ക് പടിയിറങ്ങുന്നു. ആപ്പിളിന്റെ ഹാർഡ്‌വെയർ എഞ്ചിനീയറിംഗ് സീനിയർ വൈസ് പ്രസിഡന്റ് ജോൺ ടെർണസിനെ പുതിയ ചീഫ് എക്സിക്യൂട്ടീവ് ഓഫീസറായി (CEO) കമ്പനി പ്രഖ്യാപിച്ചു. സെപ്റ്റംബർ 1-ന് പുതിയ മാറ്റങ്ങൾ നിലവിൽ വരും. സിഇഒ സ്ഥാനം ഒഴിയുന്ന ടിം കുക്ക് കമ്പനിയുടെ എക്സിക്യൂട്ടീവ് ചെയർമാൻ സ്ഥാനത്തേക്ക് മാറും.

2011-ൽ സ്റ്റീവ് ജോബ്സിന്റെ വിയോഗത്തെത്തുടർന്നാണ് ടിം കുക്ക് ആപ്പിളിന്റെ സിഇഒ ആയി ചുമതലയേറ്റത്. കഴിഞ്ഞ 15 വർഷത്തിനിടയിൽ ആപ്പിളിനെ ലോകത്തിലെ ഏറ്റവും മൂല്യമുള്ള കമ്പനിയായി നിലനിർത്തുന്നതിൽ അദ്ദേഹം നിർണ്ണായക പങ്കുവഹിച്ചു. ടിം കുക്കിന്റെ ഭരണകാലത്ത് ആപ്പിളിന്റെ വിപണി മൂല്യം 20 ഇരട്ടിയിലധികം വർധിച്ച് 4 ട്രില്യൺ ഡോളർ എന്ന ചരിത്രനേട്ടത്തിൽ എത്തിയിരുന്നു.

ഐഫോൺ, ഐപാഡ്, മാക് തുടങ്ങിയ ഉൽപ്പന്നങ്ങളുടെ രൂപകൽപ്പനയിലും വികസനത്തിലും നിർണ്ണായക പങ്ക് വഹിച്ച വ്യക്തിയാണ് ജോൺ ടെർണസ്‌. ആപ്പിളിന്റെ ഭാവിയിലേക്കുള്ള ചുവടുവെപ്പിൽ ടെർണസിന്റെ നേതൃത്വം വലിയ മാറ്റങ്ങൾ കൊണ്ടുവരുമെന്നാണ് വിപണി നിരീക്ഷകർ വിലയിരുത്തുന്നത്.