പറഞ്ഞാൽ മതി , ഇനി കമ്പ്യൂട്ടറിൽ എല്ലാ കാര്യങ്ങളും ആന്ത്രോപിക് ക്ലോഡ് ചെയ്തോളും

ആർട്ടിഫിഷ്യൽ ഇന്റലിജൻസ് വെറുമൊരു ചാറ്റ്ബോട്ട് മാത്രമായി ഒതുങ്ങുന്ന കാലം അവസാനിച്ചു. ഉപയോക്താക്കളുടെ നിർദ്ദേശാനുസരണം കമ്പ്യൂട്ടറിലെ മൗസും കീബോർഡും നേരിട്ട് നിയന്ത്രിക്കാൻ കഴിയുന്ന ഫീച്ചർ ആന്ത്രോപിക് അവതരിപ്പിച്ചു. അവരുടെ 'ക്ലോഡ് 3.5 സോണറ്റ്' (Claude 3.5 Sonnet) എന്ന മോഡലിലാണ് ഈ അപ്‌ഡേറ്റ് ലഭ്യമാക്കിയിരിക്കുന്നത്.

ക്ലോഡിൽ പുതിയ ശേഷികൾ സന്നിവേശിപ്പിച്ച് വിജയം വരിച്ചതായി ആർട്ടിഫിഷ്യൽ ഇന്റലിജൻസ് രംഗത്തെ പ്രമുഖരായ ആന്ത്രോപിക് പ്രഖ്യാപിച്ചു. തിങ്കളാഴ്ചയാണ് ആന്ത്രോപിക് ഈ പുത്തൻ സാങ്കേതികവിദ്യ പുറത്തെത്തിച്ചത്. കമ്പ്യൂട്ടറിലെ ഫയലുകൾ കണ്ടെത്താനും, ഇമെയിലുകൾ അയക്കാനും, വിവിധ ആപ്പുകൾ ഉപയോഗിക്കാനും ഇനി ക്ലോഡിന്റെ സഹായം തേടാം.

നേരത്തെ ഏജൻസി വര്‍ക്കുകൾ മുഴുവനും ചെയ്യാനുള്ള ശേഷി പ്രഖ്യാപിച്ചിരുന്നു. ടിക്കറ്റ് ബുക്കിങ് പോലുള്ള കാര്യങ്ങളാണ് ഇതുവഴി സാധ്യമായിരുന്നത്. ആന്ത്രോപിക് പുറത്തിറക്കിയ ഈ പുത്തൻ സംവിധാനം എഐയെ ഒരു വെർച്വൽ സഹായി എന്നതിലുപരി ഒരു സജീവ ഏജന്റായി മാറ്റിയിരിക്കുകയാണ്.

ഗൂഗിൾ കലണ്ടർ, സ്ലാക്ക് (Slack) തുടങ്ങിയ ആപ്പുകളുമായി ബന്ധിപ്പിച്ച് ജോലികൾ വേഗത്തിൽ തീർക്കാൻ ക്ലോഡിന് കഴിയും. നേരിട്ടുള്ള കണക്ഷൻ ഇല്ലാത്ത ആപ്പുകളിൽ, ഒരു മനുഷ്യൻ ചെയ്യുന്നത് പോലെ മൗസ് ചലിപ്പിച്ചും ടൈപ്പ് ചെയ്തും ക്ലോഡ് പ്രവർത്തിക്കും. ഫോൺ വഴി നൽകുന്ന നിർദ്ദേശങ്ങൾക്കനുസരിച്ച് കമ്പ്യൂട്ടറിൽ 'മോണിംഗ് ബ്രീഫിംഗ്' തയ്യാറാക്കാനോ ടെസ്റ്റുകൾ റൺ ചെയ്യാനോ ഈ ഫീച്ചർ സഹായിക്കും.

ഓരോ ഘട്ടത്തിലും ഉപയോക്താവിന്റെ അനുവാദം വാങ്ങിയ ശേഷമേ ക്ലോഡ് പ്രവർത്തിക്കൂ. കൂടാതെ, ഹാക്കിംഗ് തടയാനുള്ള പ്രത്യേക സുരക്ഷാ സംവിധാനങ്ങളും ഇതിൽ ഒരുക്കിയിട്ടുണ്ട്.

എന്തൊക്കെ ചെയ്യും ഈ ചങ്ങാതി

1. വിവരങ്ങൾ ശേഖരിക്കലും ഫോം പൂരിപ്പിക്കലും (Data Entry & Form Filling)

ഒരു വെബ്സൈറ്റിൽ നിന്നോ പിഡിഎഫ് (PDF) ഫയലിൽ നിന്നോ വിവരങ്ങൾ ശേഖരിച്ച് അവ മറ്റൊരു എക്സൽ ഷീറ്റിലേക്കോ ഓൺലൈൻ ഫോമിലേക്കോ മാറ്റാൻ ക്ലോഡിന് സാധിക്കും. നിങ്ങൾ ഓരോ ഡാറ്റയും കോപ്പി-പേസ്റ്റ് ചെയ്യേണ്ടതില്ല, ക്ലോഡ് അത് സ്വയം ചെയ്തുകൊള്ളും.

2. ഇമെയിൽ, സന്ദേശ കൈമാറ്റം (Communication Management)-Slack/Discord: സ്ലാക്കിലെ സന്ദേശങ്ങൾ വായിക്കാനും അതിന് മറുപടി നൽകാനും ക്ലോഡിന് കഴിയും. നിങ്ങളുടെ നിർദ്ദേശാനുസരണം ഇമെയിലുകൾ ഡ്രാഫ്റ്റ് ചെയ്യാനും അയക്കാനും ഫയലുകൾ അറ്റാച്ച് ചെയ്യാനും സാധിക്കും.

3. കലണ്ടർ ക്രമീകരിക്കൽ (Scheduling)

നിങ്ങളുടെ ഗൂഗിൾ കലണ്ടർ പരിശോധിച്ച ശേഷം മീറ്റിംഗുകൾ നിശ്ചയിക്കാനും, വരാനിരിക്കുന്ന പരിപാടികളെക്കുറിച്ച് ഓർമ്മിപ്പിക്കാനും ക്ലോഡിന് സാധിക്കും. ഫോണിലൂടെ നിങ്ങൾ നൽകുന്ന നിർദ്ദേശങ്ങൾ കമ്പ്യൂട്ടറിലെ കലണ്ടറിൽ അത് രേഖപ്പെടുത്തും.

4. ബ്രൗസർ വഴിയുള്ള ഗവേഷണം (Web Research)

ഒരു പ്രത്യേക വിഷയത്തെക്കുറിച്ച് ഇന്റർനെറ്റിൽ തിരയാനും (Searching), വ്യത്യസ്ത വെബ്സൈറ്റുകൾ സന്ദർശിച്ച് അതിലെ പ്രധാന വിവരങ്ങൾ ക്രോഡീകരിച്ച് ഒരു റിപ്പോർട്ട് തയ്യാറാക്കി നിങ്ങളുടെ ഡെസ്ക്ടോപ്പിൽ സേവ് ചെയ്യാനും ക്ലോഡിന് കഴിയും.

5. സോഫ്റ്റ്‌വെയർ ടെസ്റ്റിംഗും കോഡിംഗും (Coding & Testing)

ഡെവലപ്പർമാർക്ക് ഇത് വളരെ ഉപകാരപ്രദമാണ്. Claude Code ഉപയോഗിച്ച് കോഡുകളിലെ പിഴവുകൾ കണ്ടെത്താനും (Debugging), വെബ്സൈറ്റുകൾ ശരിയാണോ എന്ന് ബ്രൗസർ തുറന്ന് നേരിട്ട് പരിശോധിക്കാനും (UI Testing) ക്ലോഡിന് സാധിക്കും.

6. ഫയൽ മാനേജ്‌മെന്റ് (File Management)

നിങ്ങളുടെ കമ്പ്യൂട്ടറിലെ ഒരു ഫോൾഡറിൽ നിന്ന് ഫയലുകൾ കണ്ടെത്തുക, അവയുടെ പേര് മാറ്റുക, അല്ലെങ്കിൽ ഒരു പ്രത്യേക ഫോൾഡറിലേക്ക് അവ നീക്കുക തുടങ്ങിയ കാര്യങ്ങൾ ക്ലോഡ് ചെയ്യും.

7. മോണിംഗ് ബ്രീഫിംഗ് (Morning Briefing)

നിങ്ങൾ ഉറക്കമെഴുന്നേൽക്കുന്നതിന് മുൻപ് തന്നെ ക്ലോഡിനെക്കൊണ്ട് നിങ്ങളുടെ ഇമെയിലുകൾ, വാർത്തകൾ, കലണ്ടർ എന്നിവ പരിശോധിപ്പിക്കാം. നിങ്ങൾ ലാപ്ടോപ്പ് തുറക്കുമ്പോഴേക്കും അന്നത്തെ പ്രധാനപ്പെട്ട കാര്യങ്ങളുടെ ഒരു ചുരുക്കം ക്ലോഡ് തയ്യാറാക്കി വെച്ചിട്ടുണ്ടാകും.

ഈ ജോലികളെല്ലാം ക്ലോഡ് ചെയ്യുന്നത് ഒരു മനുഷ്യൻ മൗസും കീബോർഡും ഉപയോഗിക്കുന്നത് പോലെയാണ്. നിലവിൽ ഒരു പരീക്ഷണാടിസ്ഥാനത്തിലാണ് (Research Preview) ഈ സേവനം ലഭ്യമാകുക.

1. ക്ലോഡ് പ്രോ (Claude Pro), ക്ലോഡ് മാക്സ് (Claude Max) വരിക്കാർക്ക് മാത്രമേ ഇത് ഉപയോഗിക്കാൻ കഴിയൂ.

2. നിലവിൽ MacOS (ആപ്പിൾ കമ്പ്യൂട്ടറുകൾ) പ്ലാറ്റ്‌ഫോമിൽ മാത്രമാണ് ഈ സൗകര്യം.

3. അതീവ രഹസ്യസ്വഭാവമുള്ള വിവരങ്ങൾ കൈകാര്യം ചെയ്യുന്ന ആപ്പുകളിൽ ഈ ഫീച്ചർ ഉപയോഗിക്കരുതെന്ന് ആന്ത്രോപിക് മുന്നറിയിപ്പ് നൽകുന്നു.