യുഎസ് ഓപ്പൺ വനിതാ ഡബിൾസ്; സിനിയാകോവ–ടൗൺസെൻഡ് സഖ്യത്തിന് കിരീടം

ന്യൂയോർക്ക് : യുഎസ് ഓപ്പൺ ടെന്നീസ് വനിതാ ഡബിൾസ് കിരീടം കത്രീന സിനിയാകോവ - ടെയ്ലർ ടൗൺസെൻഡ് സഖ്യത്തിന്. ഇതോടെ കരിയർ ഡബിൾസ് ഗ്രാൻഡ്സ്ലാം എന്ന അപൂർവനേട്ടം സ്വന്തമാക്കാൻ സഖ്യത്തിന് കഴിഞ്ഞു. ഫൈനലിൽ അമേരിക്കയുടെ ആഷ്ലിൻ ക്രൂ​ഗർ - റോബിൻ മോണ്ട്​ഗോമറി സഖ്യത്തെ പരാജയപ്പെടുത്തിയാണ് കിരീടം നേടിയത്. ആദ്യ സെറ്റ് നഷടപ്പെടുത്തിയെങ്കിലും ​ഗംഭീര തിരിച്ചുവരവോടെയാണ് സഖ്യം യുഎസ് ഓപ്പൺ കിരീടമുയർത്തിയത്. സ്കോർ : 5-7, 6-0, 6-2.

ഡ​ബിൾസിൽ നാല് ​ഗ്രാൻഡ്സ്ലാം കിരീടങ്ങളും ഒരുമിച്ച് നേടുന്നതാണ് കരിയർ ഡബിൾസ് ​ഗ്രാൻഡ്സ്ലാം എന്നത്. 2024ൽ വിംബിൾഡൺ, 2025ലെ ഓസ്ട്രേലിയൻ ഓപ്പൺ, 2026ലെ ഫ്രഞ്ച് ഓപ്പൺ എന്നീ കിരീടങ്ങൾ സഖ്യം ഇതിനോടകം നേടിയിരുന്നു.

ചെക്ക് താരമായ കത്രീന സിനിയാകോവയുടെ കരിയറിലെ 12ാമത്തെ ​ഗ്രാൻഡ്സ്ലാം ഡബിൾസ് കിരീടമാണിത്. ഈ സീസൺ അവസാനിക്കുമ്പോൾ ഡബിൾസിൽ ഒന്നാം റാങ്ക് നിലനിർത്താനായാൽ ഏറ്റവും കൂടുതൽ തവണ ഈ നേട്ടം കൈവരിക്കുന്ന താരമായി, മാർട്ടിന നവരത്തിലോവയുടെ റെക്കോഡ് സിനിയാകോവ മറികടക്കും. അമേരിക്കൻ താരമായ ടൗൺസെൻഡിന്റെ ആദ്യ യുഎസ് ഓപ്പൺ ഡബിൾസ് കിരീടമാണിത്. കഴിഞ്ഞ വർഷം സിനിയാകോവക്കൊപ്പം ഫൈനലിലെത്തിയെങ്കിലും പരാജയപ്പെട്ടു.

യുഎസ് ഓപ്പണിൽ ഒരു സെറ്റ് പോലും വിട്ടുകൊടുക്കാതെയാണ് സിനിയാകോവ - ടൗൺസെൻഡ് ഫൈനലിലെത്തിയത്. ഫൈനലിൽ ആദ്യ സെറ്റിലെ അവസാന ​ഗെയിമിൽ സിനിയാകോവ മൂന്ന് തവണ ഡബിൾ ഫോൾട്ട് വരുത്തി. തുടർന്ന് രണ്ടാം സെറ്റിൽ ​ഗംഭീര തിരിച്ചുവരവാണ് സഖ്യം നടത്തിയത്. അവസാന സെറ്റിലും സഖ്യം മുന്നേറി കിരീടത്തിലേക്ക് കുതിക്കുകയായിരുന്നു.