ഹോങ്കോങ്‌ ഓപ്പൺ ബാഡ്‌മിന്റൺ : പി വി സിന്ധു പുറത്ത്‌

കോവ്‌ലൂൺ

ഹോങ്കോങ്‌ ഓപ്പൺ ബാഡ്‌മിന്റണിൽ പി വി സിന്ധുവിന്‌ അപ്രതീക്ഷിത തോൽവി. വനിതാ സിംഗിൾസിൽ സീഡ്‌ ചെയ്യപ്പെടാത്ത ഡെൻമാർക്കിന്റെ ലിനെ ക്രിസ്റ്റഫേഴ്‌സണോട്‌ 21-–15, 16–-21, 19–-21ന്‌ തോറ്റു. കഴിഞ്ഞ മാസം നടന്ന ലോക ചാമ്പ്യൻഷിപ്പിൽ ക്വാർട്ടറിലെത്തിയിരുന്നു സിന്ധു. പുരുഷൻമാരിൽ മലയാളി താരങ്ങളായ എച്ച്‌ എസ്‌ പ്രണോയിയും കിരൺ ജോർജും പ്രീക്വാർട്ടറിലെത്തി.

34–ാം റാങ്കുകാരനായ പ്രണോയ്‌ 14–ാമതുള്ള ചൈനയുടെ ലു ഗുവാങ്‌ സുവിനെ 44 മിനിറ്റിനുള്ളിൽ തോൽപ്പിച്ചു. സ്‌കോർ: 21-–17, 21-–14. കിരൺ സിംഗപ്പുരിന്റെ ജിയ ഹെങ്‌ ജാസണെ 21–16, 21–11ന്‌ മറികടന്നു. ലക്ഷ്യ സെൻ തായ്‌വാന്റെ വാങ്‌ സു വെയ്‌യെ തോൽപ്പിച്ച്‌ അവസാന പതിനാറിലെത്തി (22–20, 16–21, 21–15). പ്രീക്വാർട്ടറിൽ പ്രണോയ്‌–ലക്ഷ്യ പോരാട്ടം ഇന്ന്‌ നടക്കും.