print edition ദേശീയ സ്കൂൾ അത്ലറ്റിക് മീറ്റ് ; ഹാട്രിക്ക്‌ കുതിപ്പിന്‌ കേരളം

തൃശൂർ

ദേശീയ സ്‌കൂൾ അത്‌ലറ്റിക്‌ മീറ്റിൽ വിജയകുതിപ്പ്‌ തുടരാൻ കേരളത്തിന്റെ കായിക താരങ്ങൾ അവസാനവട്ട ഒരുക്കത്തിൽ. തൃശൂർ കുന്നംകുളം ഗവ. ബോയ്സ് ഹയർ സെക്കൻഡറി സ്കൂളിലെ സിന്തറ്റിക്‌ ട്രാക്കിലാണ്‌ പരിശീലനം. കഴിഞ്ഞ രണ്ടു വർഷവും സീനിയർ വിഭാഗത്തിൽ(അണ്ടർ 19) ജേതാക്കളായ കേരളം ഹാട്രിക്ക്‌ കിരീടം ലക്ഷ്യമിട്ടാണ്‌ തയ്യാറെടുക്കുന്നത്‌. 69 അംഗ സംഘമാണ്‌ ഹരിയാനയിലെ ഭിവാനിയിൽ നടക്കുന്ന സീനിയർ മീറ്റിൽ പങ്കെടുക്കുക. 38 ആൺകുട്ടികളും 31 പെൺകുട്ടികളും. 12 അംഗ ഒഫീഷ്യൽസും ഒപ്പമുണ്ട്‌.

100 മീറ്റർ ഹർഡിൽസിൽ ആദിത്യ അജി, 100, 200 മീറ്റർ ഓട്ടത്തിൽ ജെ നിവേദ്‌ കൃഷ്ണ, ഹൈജമ്പിൽ ജുവൽ തോമസ്‌, 400 മീറ്റർ ഹഡിൽസിൽ മുഹമ്മദ്‌ മൂസ, ഹാമർ ത്രോയിൽ പല്ലവി സന്തോഷ്‌, 400 മീറ്ററിൽ നവ്യ‍, വിഷ്‌ണു ശ്രീ തുടങ്ങി ഉറച്ച മെഡൽ പ്രതീക്ഷയുള്ള ഒരുപിടി താരങ്ങളാണ്‌ കേരളത്തിനായി ട്രാക്കിൽ ഇറങ്ങുന്നത്‌. 110 മീറ്റർ ഹർഡിൽസിൽ ഫസലുദീൻ ഹഖ്‌ റെക്കോഡ്‌ ലക്ഷ്യമിടുന്നു.

ട്രാക്ക്‌ ഇനങ്ങൾക്കൊപ്പം ജമ്പിലും മികച്ച പ്രകടനം പ്രതീക്ഷിക്കാമെന്ന്‌ മുഖ്യകോച്ച്‌ കെ എസ്‌ അജിമോൻ പറഞ്ഞു. ഇക്കുറി സ്‌പ്രിന്റ്‌ ഇനങ്ങളിൽ നല്ല പ്രകടനമുണ്ടാകും. കിരീടം നിലനിർത്താനുള്ള എല്ലാ ഒരുക്കവും നടത്തിയിട്ടുണ്ടെന്ന്‌ അജിമോൻ പറഞ്ഞു.

ടീം 22ന്‌ മംഗള എക്‌സ്‌പ്രസിൽ പുറപ്പെടും. അജിമോനെകൂടാതെ പരിശീലകസംഘത്തിൽ കെ നന്ദഗോപാൽ, അരവിന്ദാക്ഷൻ, നധീഷ്‌ ചാക്കോ, കെ സൂര്യമോൾ, കെ സുരേന്ദ്രൻ എന്നിവരാണുള്ളത്‌. ജിക്കു സി ചെറിയാനാണ്‌ ജനറൽ മാനേജർ. പി പി മുഹമ്മദ്‌ അലി, മിനി കുമാരിയമ്മ, എസ്‌ ശാന്തി, ശ്രീനേഷ്‌, അജു സക്കറിയ എന്നിവർ മാനേജർമാരായുണ്ട്‌.

രണ്ട്‌ വീതം ഡോക്ടർമാരും ഫിസിയോമാരുമുണ്ട്‌. കായിക താരങ്ങൾക്ക്‌ ആവശ്യമായ ഭക്ഷണം തയ്യാറാക്കാൻ രണ്ട്‌ പാചകക്കാരും പോകുന്നുണ്ട്‌.