കേരളത്തിന്‌ രണ്ട്‌ സ്വർണം കൂടി , 42 പോയിന്റുമായി ഒന്നാമത്‌ , ഹരിയാനയ്‌ക്ക്‌ 36
print edition ദേശീയ സീനിയർ സ്‌കൂൾ അത്‌ലറ്റിക്‌ മീറ്റ്‌ ; കേരളം മുന്നോട്ട്‌ വിടാതെ ഹരിയാന
ആൺകുട്ടികളുടെ ഹെെജമ്പിൽ കേരളത്തിന്റെ ജുവൽ തോമസ് സ്വർണം നേടുന്നു/ ഫോട്ടോ പി വി സുജിത്
AKSHAY K P
Published on Nov 29, 2025, 04:42 AM | 2 min read
ഭിവാനി(ഹരിയാന)
ദേശീയ സീനിയർ സ്‌കൂൾ അത്‌ലറ്റിക്‌സിന്റെ മൂന്നാം ദിനം കേരളത്തിന്‌ രണ്ട്‌ സ്വർണം. ആൺകുട്ടികളുടെ ഹൈജമ്പിലും 200 മീറ്റർ ഓട്ടത്തിലുമാണ് നേട്ടം. ഇതോടെ മെഡൽ നേട്ടം പന്ത്രണ്ടായി. ആറ്‌ സ്വർണവും മൂന്ന്‌ വെള്ളിയും മൂന്ന്‌ വെങ്കലവും.
ഓവറോൾ ചാന്പ്യൻഷിപ്പിനായി കേരളവും ആതിഥേയരായ ഹരിയാനയും തമ്മിലാണ്‌ പോരാട്ടം. 42 പോയിന്റുമായി നിലവിലെ ചാന്പ്യൻമാരായ കേരളമാണ്‌ മുന്നിൽ. 36 പോയിന്റുള്ള ഹരിയാന പിന്നാലെയുണ്ട്‌. പഞ്ചാബ്‌, മഹാരാഷ്‌ട്ര ടീമുകൾക്ക്‌ യഥാക്രമം 22, 20 പോയിന്റാണുള്ളത്‌. രണ്ട്‌ ദിവസം ശേഷിക്കെ 16 ഫൈനലുണ്ട്‌.
ആൺകുട്ടികളുടെ 200 മീറ്റർ ഓട്ടത്തിൽ ജെ നിവേദ് കൃഷ്ണ 21.68 സെക്കൻഡിൽ പൊന്നണിഞ്ഞു. പാലക്കാട്‌ ചിറ്റൂർ ജിഎച്ച്‌എസ്‌എസിലെ പ്ലസ് ടുക്കാരന്റെ രണ്ടാം മെഡലാണ്‌. 100 മീറ്ററിൽ വെങ്കലമുണ്ടായിരുന്നു. ഫൈനലിലെത്തിയ 4x100 മീറ്റർ റിലേ ടീം അംഗമാണ്‌.
ഹൈജന്പിൽ കോട്ടയം മുരിക്കുംവയൽ ജിവിഎച്ച്‌എസ്‌എസിലെ പ്ലസ് ടു വിദ്യാർഥിയായ ജുവൽ തോമസാണ്‌ സ്വർണം നേടിയത്‌. 2.09 മീറ്ററാണ്‌ ചാടിയ ഉയരം. തുടർച്ചയായ മൂന്നാം തവണയാണ്‌ ദേശീയ മീറ്റിൽ സ്വർണം നേടുന്നത്‌. അഞ്ചുവർഷമായി ഹൈജന്പ്‌ പരിശീലിക്കുന്നു. അച്ഛൻ സി ജെ തോമസ് വോളിബോളിൽ ദേശീയ താരമായിരുന്നു. സഹോദരൻ ജീവൻ തോമസ് ബാസ്‌ക്കറ്റ്‌ബോൾ സംസ്ഥാന തലത്തിലും മത്സരിച്ചു.
ഹൈജമ്പിൽ രണ്ടാമതെത്തിയതും മലയാളിയാണ്‌. പ്രതിനിധീകരിക്കുന്നത്‌ സിബിഎസ്‌ഇയെ ആണെന്ന്‌ മാത്രം. കോഴിക്കോട് ചേവായൂർ ഭാരതീയ വിദ്യാഭവൻ സ്‌കൂളിൽ പ്ലസ് ടു വിദ്യാർത്ഥിയായ ദേവക് ഭൂഷണാണ്‌ 2.05 മീറ്റർ ഉയരം ചാടി വെള്ളി സ്വന്തമാക്കിയത്‌. സിബിഎസ്ഇ ദേശീയ അത്‌ലറ്റിക്‌ മീറ്റിൽ സ്വർണം നേടിയിട്ടുണ്ട്‌. സൗദി അറേബ്യയിലെ ദമാമിൽ നടന്ന അണ്ടർ 18 യൂത്ത് ഏഷ്യൻ ചാമ്പ്യൻഷിപ്പിൽ ഇന്ത്യയ്‌ക്കായി വെള്ളി കരസ്ഥമാക്കി.
ഇന്ന്‌ 11 ഇനങ്ങളിൽ ഫൈനൽ നടക്കും. 400 മീറ്റർ ഹർഡിൽസ്‌, 800 മീറ്റർ ഓട്ടം, 4x100 മീറ്റർ റിലേ മത്സരങ്ങൾ ഇതിൽ ഉൾപ്പെടും.
നൂറിലെ നിരാശ മായ്‌ച്ച്‌ നിവേദ്
വേഗക്കാരെ നിശ്‌ചയിക്കുന്ന 100 മീറ്റർ ഓട്ടത്തിൽ വെങ്കലം നേടിയെങ്കിലും പാലക്കാടുകാരൻ ജെ നിവേദ് കൃഷ്ണയുടെ മുഖത്ത്‌ നിരാശ പ്രകടമായിരുന്നു. സ്വർണം പ്രതീക്ഷിച്ചതായിരുന്നു. ഹീറ്റ്‌സ്‌ 10.66 സെക്കൻഡിലും സെമി 10.61 സെക്കൻഡിലും ഫിനിഷ് ചെയ്‌ത നിവേദിന്‌ ഫൈനലിൽ 10.79 സെക്കൻഡ്‌ വേണ്ടിവന്നതാണ്‌ തിരിച്ചടിയായത്‌. ആ നിരാശ 200ൽ മറികടന്നു. 21.68 സെക്കൻഡിൽ കുതിച്ചെത്തിയാണ്‌ സ്വർണം. സംസ്ഥാന മീറ്റിൽ ഡബിൾ നേടിയാണ്‌ ഭിവാനിയിലേക്കുള്ള വരവ്‌. 200 മീറ്ററിൽ 14 വർഷം പഴക്കമുള്ള റെക്കോഡ്‌ തകർത്തിരുന്നു.
ചിറ്റൂർ പാലോട്ട്‌ രാഗത്ത്‌ റെയിൽവേ ഉദ്യോഗസ്ഥനായ ജ്യോതി പ്രകാശിന്റെയും ലിസയുടെയും മകനാണ്‌. അത്‌ലറ്റിക്‌സിൽ ദേശീയ മെഡൽ ജേതാവുകൂടിയായ അച്ഛൻ കൂടെയുണ്ട്‌. എം അരവിന്ദാക്ഷനാണ്‌ പരിശീലകൻ. ദേശീയ ജൂനിയർ മീറ്റിൽ 200 മീറ്ററിലെ വെള്ളിയും ഖേലോ ഇന്ത്യ മീറ്റിൽ വെങ്കലവുമാണ്‌ പ്രധാനനേട്ടം.
200 മീറ്ററിൽ ചാമ്പ്യനായ നിവേദ് കൃഷ്ണയുടെ ആഹ്ലാദം
ഹരിയാനക്ക്‌ ആരതി ഡബിൾ
കേരളത്തിന്‌ വെല്ലുവിളി ഉയർത്തുന്ന ഹരിയാനക്കായി സ്‌പ്രിന്റ്‌ ഡബിൾ തികച്ച്‌ ജജ്ജറിൽ നിന്നുള്ള പ്ലസ് ടുക്കാരി ആരതി സിവാച്‌. 100, 200 മീറ്റർ ഓട്ടത്തിലാണ്‌ സ്വർണം കുതിപ്പ്. 11.98 സെക്കൻഡിലാണ്‌ 100 മീറ്റർ ഫിനിഷ്. 200 മീറ്ററിൽ മികച്ച വ്യക്തിഗത സമയമായ 24.02 സെക്കൻഡിൽ ഒന്നാമതെത്തി. 4x100 മീറ്റർ റിലേയിലുമുണ്ട്‌. കഴിഞ്ഞ തവണ റിലേയിൽ വെള്ളി മാത്രമാണ്‌ നേടാനായത്‌.
ഏഷ്യൻ യൂത്ത് ചാമ്പ്യൻഷിപ്പിൽ 100, 200 മീറ്ററിൽ വെങ്കലം കരസ്ഥമാക്കി. ഭുവനേശ്വറിൽ നടന്ന ദേശീയ ജൂനിയർ മീറ്റിൽ ഇരട്ട സ്വർണം നേടാനുമായി. മോനു വർമയാണ് പരിശീലകൻ. അടുത്തവർഷം നടക്കുന്ന ലോക ജൂനിയർ മീറ്റാണ്‌ ലക്ഷ്യം.
Related News
Dont Miss it
0 comments