തേരോട്ടം തുടർന്ന് തിരുവനന്തപുരം; ആയിരം പോയിന്റ് കഴിഞ്ഞു, രണ്ടാം സ്ഥാനക്കാർ അടുത്തുപോലുമില്ല

തിരുവനന്തപുരം: സംസ്ഥാന സ്‌കൂൾ ഒളിമ്പിക്‌സിൽ ആതിഥേയരായ തിരുവനന്തപുരം തേരോട്ടം തുടരുന്നു. 115 സ്വർണം ഉൾപ്പെടെ 1015 പോയിന്റുമായി ഒന്നാമത്‌ തുടരുകയാണ്. നീന്തൽക്കുളത്തിൽനിന്ന്‌ മാത്രം 38 സ്വർണം ഉൾപ്പെടെ 336 പോയിന്റാണ്‌ തലസ്ഥാന ന​ഗരം നേടിയത്‌. രണ്ടാം സ്ഥാനക്കാരായ തൃശൂരിന് 479 പോയിന്റുമാത്രമാണുള്ളത്. 443 പോയിന്റുമായി കണ്ണൂർ ജില്ല മൂന്നാമതുണ്ട്.

എറണാകുളം- 424, കോഴിക്കോട്- 415, പാലക്കാട്- 410, മലപ്പുറം- 358, കൊല്ലം- 226, കാസർകോട്- 196, ആലപ്പുഴ- 96, വയനാട്- 77, കോട്ടയം- 74, ഇടുക്കി- 64, പത്തനംതിട്ട- 22 എന്നിങ്ങനെയാണ് ഇതുവരെയുള്ള ജില്ലകളുടെ പോയിന്റ് നില.

അത്‌ലറ്റിക്സിൽ 96 ഇനങ്ങളിൽ 12 എണ്ണം പൂർത്തിയായപ്പോൾ അഞ്ച്‌ സ്വർണമുൾപ്പെടെ 39 പോയിന്റുമായി പാലക്കാടാണ്‌ മുന്നിൽ.