ഹോക്കി ലോകകപ്പിന് ഇന്ന് തുടക്കം; 51 വർഷത്തെ കാത്തിരിപ്പ് അവസാനിപ്പിക്കാൻ ഇന്ത്യ

ആംസ്റ്റൽവീൻ : ഹോക്കി ലോകകപ്പ് പോരാട്ടത്തിന് ഇന്ന് തുടക്കം. ബെൽജിയവും നെതർലൻഡ്സും സംയുക്തമായി വേദിയാകുന്ന ഹോക്കി ലോകകപ്പിന് ഓഗസ്റ്റ് 15 മുതൽ 30 വരെയാണ് നടക്കുന്നത്. പുരുഷ, വനിതാ ലോകകപ്പുകൾ ഒരേസമയം നടക്കുന്ന ടൂർണമെന്റിൽ ഇരു ടീമുകളും കിരീട പ്രതീക്ഷകളുമായാണ് ഇറങ്ങുന്നത്.

ഇന്ത്യയുടെ പുരുഷ ടീം ഇന്ന് പൂൾ ഡിയിലെ ആദ്യ മത്സരത്തിൽ വെയിൽസിനെ നേരിടും. നെതർലൻഡ്സിലെ ആംസ്റ്റൽവീനിലുള്ള വാഗ്നർ സ്റ്റേഡിയത്തിൽ ഇന്ത്യൻ സമയം വൈകിട്ട് 4.30നാണ് മത്സരം. ക്യാപ്റ്റൻ ഹർമൻപ്രീത് സിങ്ങിന്റെ നേതൃത്വത്തിലാണ് ഇന്ത്യ ലോകകപ്പ് പോരാട്ടത്തിനിറങ്ങുന്നത്.

പുരുഷ വിഭാഗത്തിൽ 16 ടീമുകളും വനിതാ വിഭാഗത്തിൽ 16 ടീമുകളും മത്സരിക്കും. ആംസ്റ്റൽവീൻ, വാവ്രെ എന്നിവിടങ്ങളിലാണ് മത്സരങ്ങൾ നടക്കുന്നത്. പുരുഷ ഫൈനൽ ഓഗസ്റ്റ് 30നും വനിതാ ഫൈനൽ ഓഗസ്റ്റ് 29നും നടക്കും.

1975ന് ശേഷം ലോകകപ്പിൽ കിരീടം നേടാനാകാത്ത ഇന്ത്യ, ഇത്തവണ 51 വർഷത്തെ കാത്തിരിപ്പ് അവസാനിപ്പിക്കുകയെന്ന ലക്ഷ്യത്തോടെയാണ് ഇറങ്ങുന്നത്. 1975ൽ മലേഷ്യയിലെ ക്വാലാലംപൂരിൽ നടന്ന ലോകകപ്പിലാണ് ഇന്ത്യ അവസാനമായി കിരീടം നേടിയത്. അതിന് ശേഷം ലോകകപ്പിന്റെ സെമിഫൈനലിൽ പോലും എത്താൻ ഇന്ത്യൻ പുരുഷ ടീമിന് സാധിച്ചിട്ടില്ല.

2023 ലോകകപ്പിന് പിന്നാലെ രണ്ടാം തവണയാണ് ഹർമൻപ്രീത് സിങ് ഇന്ത്യയെ നയിക്കുന്നത്. 1971ലും 1975ലും ഇന്ത്യയെ ലോകകപ്പിൽ നയിച്ച അജിത് പാൽ സിങിന് ശേഷം രണ്ട് ലോകകപ്പുകളിൽ ഇന്ത്യയെ നയിക്കുന്ന രണ്ടാമത്തെ ക്യാപ്റ്റനാണ് ഹർമൻപ്രീത്.

വനിതാ ടീമും പുതിയ ചരിത്രം കുറിക്കാനുള്ള ലക്ഷ്യത്തോടെയാണ് ടൂർണമെന്റിലേക്ക് എത്തുന്നത്. ലോകകപ്പിൽ ഇതുവരെ കിരീടം നേടാൻ ഇന്ത്യക്ക് കഴിഞ്ഞിട്ടില്ല. 1974ലെ പ്രഥമ വനിതാ ലോകകപ്പിൽ നാലാം സ്ഥാനത്തെത്തിയതാണ് ഇന്ത്യയുടെ ഏറ്റവും മികച്ച പ്രകടനം. ഓഗസ്റ്റ് 16ന് ചൈനയ്ക്കെതിരെയാണ് വനിതാ ടീമിന്റെ ആദ്യ മത്സരം.

ഇന്ത്യയുടെ പൂൾ മത്സരങ്ങൾ

പുരുഷ ടീം

ഓഗസ്റ്റ് 15 - ഇന്ത്യ vs വെയിൽസ് — വൈകിട്ട് 4.30

ഓഗസ്റ്റ് 17 - ഇന്ത്യ vs ഇംഗ്ലണ്ട് — വൈകിട്ട് 6.30

ഓഗസ്റ്റ് 19 - ഇന്ത്യ vs പാകിസ്ഥാൻ — വൈകിട്ട് 6.30

വനിതാ ടീം

ഓഗസ്റ്റ് 16 - ഇന്ത്യ vs ചൈന — വൈകിട്ട് 4.30

ഓഗസ്റ്റ് 18 - ഇന്ത്യ vs ദക്ഷിണാഫ്രിക്ക — വൈകിട്ട് 6.30

ഓഗസ്റ്റ് 20 - ഇന്ത്യ vs ഇംഗ്ലണ്ട് — വൈകിട്ട് 6.30