നീരജ് ചോപ്ര ഫൈനലിൽ; ജാവലിൻ ത്രോയിൽ മെഡൽ പ്രതീക്ഷയുമായി ഇന്ത്യ

​ഗ്ലാസ്​ഗോ : കോമൺവെൽത്ത് ​ഗെയിംസിൽ ജാവലിൻ ത്രോയിൽ ഫൈനലിലേക്ക് യോ​ഗ്യത നേടി ഇന്ത്യയുടെ അഭിമാന താരം നീരജ് ചോപ്ര. യോ​ഗ്യതാ റൗണ്ടിൽ അഞ്ചാം സ്ഥാനത്തെത്തിയാണ് നീരജ് ഫൈനലിലേക്ക് പ്രവേശിച്ചത്. ഇന്ത്യയുടെ മെഡൽ പ്രതീക്ഷകൾ ഇരട്ടിയാക്കി നീരജിന് പുറമെ രോഹിത് യാദവ്, യാഷ് വീർ സിം​ഗ് എന്നീ താരങ്ങളും ഫൈനലിലേക്ക് ഇടം നേടി.

കാലാവസ്ഥ അനുകൂലമല്ലാതിരുന്നതിനാൽ യോ​ഗ്യതാ റൗണ്ടിൽ മത്സരിച്ച താരങ്ങൾക്ക് നേരിട്ടുള്ള യോ​ഗ്യതാ മാർക്ക് ആയ 84 മീറ്റർ മറികടക്കാനായില്ല. ഇതോടെയാണ് മികച്ച ദൂരം മറികടന്ന ആദ്യ 12 പേർ ഫൈനലിലേക്ക് യോ​ഗ്യത നേടിയത്. രണ്ടാം ശ്രമത്തിൽ 79.61 മീറ്റർ ദൂരമെറിഞ്ഞാണ് നീരജ് അഞ്ചാമതായി യോ​ഗ്യത നേടിയത്.

ഇന്ത്യയുടെ മറ്റു താരങ്ങളായ രോഹിത് യാദവ് 78.37 മീറ്ററോടെ ഒൻപതാം സ്ഥാനവും, യാഷ് വീർ സിം​ഗ് 78.36 മീറ്ററോടെ പത്താം സ്ഥാനവും നേടിയാണ് യോ​ഗ്യത റൗണ്ട് കടന്നത്.

ശ്രീലങ്കൻ താരമായ റുമേഷ് പതിരജെയാണ് 82.84 മീറ്റർ എറിഞ്ഞ് യോ​ഗ്യതാ റൗണ്ടിൽ ഒന്നാം സ്ഥാനത്തെത്തിയത്. ഗ്രെനഡയുടെ ആൻഡേഴ്‌സൺ പീറ്റേഴ്‌സാണ് 81.29 മീറ്ററോടെ തൊട്ടുപിന്നിൽ. 2024ലെ ഒളിമ്പിക്‌സിൽ സ്വർണ മെഡൽ ജേതാവായ പാകിസ്ഥാന്റെ അർഷാദ് നദീം 78.63 മീറ്റർ എറിഞ്ഞ് ഏഴാം സ്ഥാനത്തോടെയാണ് ഫൈനലിലേക്ക് യോ​ഗ്യത നേടിയത്.