ഏഷ്യാ കപ്പ്‌ ഹോക്കി ; ജപ്പാൻ കടന്ന്‌ ഇന്ത്യ

രാജ്‌ഗിർ

ക്യാപ്‌റ്റൻ ഹർമൻപ്രീത്‌ സിങ്ങിന്റെ ഗോളടി ഒരിക്കൽക്കൂടി ഇന്ത്യയെ തുണച്ചു. ഏഷ്യാ കപ്പ്‌ ഹോക്കിയിൽ ജപ്പാനെതിരെ ഇന്ത്യ 3–2ന്റെ ജയം കുറിച്ചപ്പോൾ രണ്ടെണ്ണം ഹർമന്റെ വകയായിരുന്നു. ആദ്യ കളിയിൽ ചൈനയ്‌ക്കെതിരെ ക്യാപ്‌റ്റൻ ഹാട്രിക്‌ നേടിയിരുന്നു.

രണ്ട്‌ ജയത്തോടെ ഇന്ത്യ പൂൾ എയിൽ ഒന്നാമതാണ്‌. ആദ്യ കളിയെ അപേക്ഷിച്ച്‌ ഭേദപ്പെട്ട പ്രകടനമായിരുന്നു ഇന്ത്യയുടേത്‌. പെനൽറ്റി കോർണറിൽനിന്നായിരുന്നു ഹർമൻപ്രീതിന്റെ രണ്ട്‌ ഗോളും. മറ്റൊന്ന്‌ മൻദീപ്‌ സിങ്‌ നേടി.

മറ്റൊരു മത്സരത്തിൽ ചൈന 13–1ന്‌ കസാഖ്‌സ്ഥാനെ തകർത്തു. അവസാന കളിയിൽ ഇന്ന്‌ ഇന്ത്യ കസാഖിനെ നേരിടും. ജപ്പാനും ചൈനയും തമ്മിലാണ്‌ മറ്റൊരു മത്സരം.

രണ്ട്‌ കളിയും തോറ്റ കസാഖ്‌സ്ഥാൻ പുറത്തായി.