ഒരു ഗോൾ നേടി ഞെട്ടിച്ചു, പക്ഷേ രക്ഷയായില്ല; ഇന്ത്യയെ 6–1ന് തകർത്ത് ഉറുഗ്വായ്

കൊൽക്കത്ത: സ‍ൗഹൃദ ഫുട്‌ബോൾ മത്സരത്തിൽ മുൻ ലോക ചാമ്പ്യന്മാരായ ഉറുഗ്വായ്‌‍യുടെ കരുത്തറിഞ്ഞ് ഇന്ത്യ. കൊൽക്കത്ത സാൾട്ട്‌ലേക്ക്‌ സ്‌റ്റേഡിയത്തിൽ നടന്ന മത്സരത്തിൽ പ്രഥമ ലോകകപ്പ്‌ ജേതാക്കളായ ഉറുഗ്വായ്‌ ഇന്ത്യയെ 6-1നാണ് തകർത്തത്. ആവേശം നിറഞ്ഞ മത്സരത്തിൽ അനിരുദ്ധ്‌ ഥാപ്പ ഇന്ത്യയ്ക്കായി ​ഗോൾ നേടി. ഇടിമിന്നലും കനത്ത മഴയും കാരണം മത്സരം മുക്കാൽ മണിക്കൂർ മുടങ്ങി.

ലോകകപ്പിലെ മോശം പ്രകടനത്തിനുശേഷം ദ്യേഗോ ഫോർലാന്റെ കീഴിൽ അണിനിരന്ന ഉറുഗ്വായ് കളിയുടെ തുടക്കത്തിൽ തന്നെ ലീഡ് നേടി. 11-ാം മിനിറ്റിൽ ലഭിച്ച പെനാൽറ്റി ഡാർവിൻ ന്യൂനെസ്‌ ​ഗോളാക്കി മാറ്റി. പത്ത് മിനിറ്റിന് ശേഷം ഉറു​ഗ്വായ്‍യെ ഞെട്ടിച്ച് ഇന്ത്യ ​​ഗോൾ മടക്കി. 22-ാം മിനിറ്റിലായിരുന്നു സമനില ഗോൾ. റയാൻ വില്യംസ്‌ തൊടുത്ത ശക്തമായ ഷോട്ട് ഉറു​ഗ്വായ് ​ഗോൾകീപ്പർ തടഞ്ഞെങ്കിലും റീബൗണ്ടായിവന്ന പന്ത് അനിരുദ്ധ്‌ ഥാപ്പ ​ഗോളാക്കി മാറ്റുകയായിരുന്നു.

27–ാം മിനിറ്റിൽ ഹൈഡ്രേഷൻ ഇടവേളയ്‌ക്ക്‌ പിരിയുന്ന ഘട്ടത്തിൽ ഇടിമിന്നൽ കാരണം കളിക്കാർ തിരിച്ചുകയറി. പിന്നീട് കളിയാരംഭിച്ച ശേഷം ആക്രമിച്ചു കളിച്ച ഉറുഗ്വായ് അഞ്ചു ​ഗോളുകൾ കൂടി നേടി. അ‍റ‍ൗഹോ (29, 59), സലാസർ (53), സനാബ്രിയ (71), അഗ്വയ്‌റേ (86) എന്നിവരാണ് ഉറുഗ്വായ്‌ക്കായി ലക്ഷ്യം കണ്ടത്.