എംബാപ്പെ മാജിക്: ചാമ്പ്യൻസ് ലീ​ഗിൽ സിറ്റിയെ വീഴ്ത്തി റയൽ

മാഡ്രിഡ് : സാന്റിയാ​ഗോ ബെർണബ്യൂവിൽ റയൽ ആരവം. ചാമ്പ്യൻസ് ലീ​ഗിൽ മാഞ്ചസ്റ്റർ സിറ്റിയെ വീഴ്ത്തി റയൽ മാഡ്രിഡിന്റെ കുതിപ്പ്. ഒന്നിനെതിരെ 3 ​ഗോളുകൾക്കാണ് റയലിന്റെ വിജയം. സൂപ്പർ താരം കിലിയൻ എംബാപ്പെയാണ് റയലിനായി മൂന്ന് ​ഗോളുകളും നേടിയത്. ഇതോടെ 6-3ന്റെ ആധികാരിക വിജയവുമായി റയൽ അവസാന പതിനാറിൽ ഇടം നേടി.

ബയേർ ലെവർകൂസനോ അത്‍ലറ്റികോ മാഡ്രിഡോ ആയിരിക്കും റയലിന്റെ അടുത്ത എതിരാളികൾ. പെപ് ​ഗ്വാർഡിയോളയുടെ കരിയറിൽ ആദ്യമായാണ് പരിശീലിപ്പിക്കുന്ന ഒരു ടീം ചാമ്പ്യൻസ് ലീ​ഗിൽ അവസാന പതിനാറിലെത്താതെ പോകുന്നത്.

കളിയിൽ ആദ്യാവസാനം വ്യക്തമായ ആധിപത്യത്തോടെയായിരുന്നു റയലിന്റെ വിജയം. കളി തുടങ്ങി നാലാം മിനിറ്റിൽ തന്നെ എംബാപ്പെ സ്കോർ ചെയ്തു. രണ്ടാം പകുതിയിലായിരുന്നു മറ്റ് ​ഗോളുകൾ. 33ാം മിനിറ്റിൽ ക്ലോസ് റേഞ്ച് ഷോട്ടിൽ എംബാപ്പെ രണ്ടാം ​ഗോളും 61ാം മിനിറ്റിൽ ബോക്സിന്റെ അറ്റത്തുനിന്നുള്ള ഇടങ്കാലടിയിൽ മൂന്നാം ​ഗോളും നേടി.

കളിയുടെ തുടക്കത്തിൽ തന്നെ പ്രതിരോധക്കാരൻ ജോൺ സ്റ്റോൺസ് പരിക്ക് പറ്റി പുറത്തായത് സിറ്റിയെ ഉലച്ചു. എഡേഴ്സൺ മികച്ച സേവുകൾ നടത്തിയെങ്കിലും റയൽ വയലിൽ ​പന്തെത്തിക്കാൻ സിറ്റി കളിക്കാർക്കായില്ല. ഇഞ്ചുറി ടൈമിന്റെ രണ്ടാം മിനിറ്റിലാണ് നിക്കോ ​ഗോൺസാലസ് സിറ്റിക്കായി ​ഗോൾ നേടുന്നത്. ഒന്നാം പാദത്തിൽ 3-2നായിരുന്നു സിറ്റിയുടെ പരാജയം.

ഇതുവരെ അഞ്ച് തവണയാണ് സിറ്റിയും റയലും പ്രീക്വാർട്ടറിൽ ഏറ്റുമുട്ടുന്നത്. രണ്ടാം തവണയാണ് ആൻസലോട്ടിയുടെ പട സിറ്റിയെ പുറത്താക്കുന്നത്.