ചെൽസിയുടെ നീലാകാശം

ന്യൂയോർക്ക്‌

മെറ്റ്‌ലൈഫ്‌ സ്‌റ്റേഡിയത്തിലെ കനത്ത ചൂടിലും പിഎസ്‌ജി തണുത്തുറഞ്ഞു. വൻകരകൾ കീഴടക്കിയെത്തിയ പാരീസുകാരെ വല വിരിച്ച്‌ കാത്തുനിന്ന ചെൽസിയുടെ യുവനിര തോൽവിയുടെ വേദനയിലേക്ക്‌ ഇടിച്ചുതാഴ്‌ത്തി. രൂപമാറ്റം നടത്തിയ ക്ലബ്‌ ഫുട്‌ബോൾ ലോകകപ്പിൽ ചെൽസി അതിമനോഹര ജയത്തോടെ കിരീടമുയർത്തി. മൂന്ന്‌ ഗോളിനാണ്‌ ജയം. രണ്ട്‌ ഗോളടിക്കുകയും മറ്റൊന്നിന്‌ അവസരമൊരുക്കുകയുംചെയ്‌ത കോൾ പാൽമർ ജയത്തിന്‌ അടിത്തറയിട്ടു.

പിഎസ്‌ജിയായിരുന്നു സാധ്യതകളിൽ മുന്നിൽ. ഏപ്രിൽ ആദ്യവാരം ഫ്രഞ്ച്‌ ലീഗുമായി കുതിച്ച ലൂയിസ്‌ എൻറിക്വെയും കൂട്ടരും മേയിൽ ഇന്റർ മിലാനെ ചാരമാക്കി ചാമ്പ്യൻസ്‌ ലീഗും സ്വന്തമാക്കി. ക്ലബ്‌ ലോകകപ്പിലും സമാനമായിരുന്നു കാര്യങ്ങൾ. ഒമ്പതുപേരായി ചുരുങ്ങിയിട്ടും ക്വാർട്ടറിൽ ബയേൺ മ്യൂണിക്കിനെ വീഴ്‌ത്തി. സെമിയിൽ റയൽ മാഡ്രിഡിനെ നാല്‌ ഗോളിന്‌ പറത്തിവിട്ടു. 16 ഗോളടിച്ചപ്പോൾ വഴങ്ങിയത്‌ ഒരെണ്ണം മാത്രം.

മറുവശത്ത്‌ ചെൽസി വലിയ പരീക്ഷണമൊന്നും നേരിടാതെയാണ്‌ ഫൈനലിലേക്ക്‌ മുന്നേറിയത്‌.

കിരീടപ്പോരിന്‌ പിഎസ്‌ജി ആത്മവിശ്വാസത്തോടെ ഇറങ്ങി. ചെൽസിയെ എളുപ്പത്തിൽ മറികടക്കാമെന്ന്‌ കണക്കുകൂട്ടി. പക്ഷേ, എൺസോ മറെസ്‌കയെന്ന ചെൽസി പരിശീലകന്‌ തന്ത്രങ്ങളേറെയുണ്ടായിരുന്നു. വജ്രായുധമായ പാൽമറിനെ തേച്ചുമിനുക്കിയാണ്‌ ഇറക്കിയത്‌. 18 മത്സരങ്ങളിൽ ഗോൾ നേടാനാകാതെ ഉഴറിയ പാൽമർ ലോകകപ്പിലാണ്‌ വീണ്ടും മികവിലേക്ക്‌ ഉയർന്നത്‌. ആക്രമണനിരയുടെ വലതുവശത്ത്‌ ഇരുപത്തിമൂന്നുകാരൻ നിലകൊണ്ടതോടെ പന്തൊഴുകി.

പിഎസ്‌ജിക്കാർക്ക്‌ ഇടംകൊടുക്കാതിരിക്കുക എന്നതായിരുന്നു മറെസ്‌കയുടെ തന്ത്രം. കടുത്ത ആക്രമണമാണ്‌ അതിന്‌ സ്വീകരിച്ചമാർഗം. പിഎസ്‌ജി പ്രതിരോധത്തിന്റെ ഇടതുവശം കേന്ദ്രീകരിച്ച്‌ ആക്രമണമൊരുക്കി. ഫ്രഞ്ചുകാരുടെ മുന്നേറ്റങ്ങൾക്ക്‌ വേഗത പകരുന്ന ന്യൂനോ മെൻഡെസായിരുന്നു ലക്ഷ്യം. പാൽമറും മുന്നേറ്റക്കാരൻ ജോയോ പെഡ്രോയും ഒരേസമയം കുതിച്ചു. മെൻഡെസ്‌ കാര്യമായി പരീക്ഷിക്കപ്പെട്ടു. ചെൽസിയുടെ രണ്ട്‌ ഗോളും പോർച്ചുഗീസുകാരന്റെ പിഴവിൽനിന്നാണ്‌ എത്തിയത്‌. പാൽമർ മെൻഡസിനെ മറികടന്ന്‌ കുതിച്ചു. ബോക്‌സിന്‌ പുറത്തുനിന്ന്‌ അടിതൊടുക്കുകയുംചെയ്‌തു. ആദ്യഗോളിൽതന്നെ പിഎസ്‌ജിയുടെ നിയന്ത്രണം നഷ്ടമായി. ഇടവേളയ്‌ക്ക്‌ പിരിയുംമുമ്പ്‌ പെഡ്രോയുടെ ഗോളിന്‌ വഴിയൊരുക്കി ഇംഗ്ലീഷുകാരൻ ചെൽസിയുടെ ജയം ഉറപ്പാക്കി.

കഥമാറ്റി ചെറുപ്പസംഘം

യുവതയുടെ ഉത്സവമാണ്‌ ചെൽസിയിൽ. 27 വയസാണ്‌ ഉയർന്ന പ്രായം. 2022ൽ ഏകദേശം 1500 കോടി രൂപ മുടക്കിയാണ്‌ യുവകളിക്കാരെ കൊണ്ടുവന്നത്‌. കരാർ ആറുവർഷംതൊട്ട്‌ ഒമ്പതുവർഷംവരെ നീണ്ടു. സഹ ഉടമയായ ടോഡ്‌ ബൊയെഹ്‌ലിയുടെ ഈ നീക്കം ആദ്യം പരിഹസിക്കപ്പെട്ടു. എന്നാൽ, മൂന്നുവർഷം കഴിയുമ്പോൾ കഥ മാറുകയാണ്‌. യുവേഫ കോൺഫറൻസ്‌ ലീഗിന്‌ പിന്നാലെ ക്ലബ്‌ ലോകകപ്പും നേടി ആ യുവനിര ഉയർന്നുവരുന്നു.

ലോകകപ്പ്‌ ജയത്തോടെ ഏകദേശം ആയിരം കോടി രൂപയാണ്‌ ക്ലബ്ബിന്‌ കിട്ടിയത്‌. മോയ്‌സെസ്‌ കയ്‌സെദോയും എൺസോ ഫെർണാണ്ടസും നിലവിൽ ലോകത്തെ ഏറ്റവും മികച്ച മധ്യനിര താരങ്ങളുടെ പട്ടികയിലാണ്‌. മാർക്‌ കുകുറെല്ല ഇംഗ്ലീഷ്‌ പ്രീമിയർ ലീഗിലെ മികച്ച ഇടതുബാക്കും. ലെവി കോൾവിൽ, മാലോ ഗുസ്‌റ്റോ, ആൻഡ്രി സാന്റോസ്‌ തുടങ്ങിയ യുവതാരങ്ങൾ വേറെ. മൂന്ന്‌ ഗോളടിച്ച ജോയോ പെഡ്രോയാണ്‌ മറ്റൊരു ശ്രദ്ധേയ കളിക്കാരൻ. പുതുതായി ടീമിലെത്തിയ ലിയാം ഡെലാപും ലോകകപ്പിൽ തിളങ്ങി. ജാമി ഗിട്ടെൻസ്‌, എസ്‌റ്റവായോ എന്നീ കൗമാരക്കാർ ഉടൻ ടീമിന്റെ ഭാഗമാകും.