കളത്തിലിറങ്ങാൻ റയലും ബയേണും; ഇനി തീപാറും പോരാട്ടങ്ങൾ: ചാമ്പ്യൻസ് ലീഗ് ക്വാർട്ടറിന് ഇന്ന് തുടക്കം

മാഡ്രിഡ്‌ : യുവേഫ ചാമ്പ്യൻസ് ലീഗിലെ തീപാറും പോരാട്ടങ്ങൾക്ക് ഇന്ന് തുടക്കം. ചാമ്പ്യൻസ് ലീ​ഗ് ചരിത്രത്തിലെ ചിരവൈരികളായ റയൽ മാഡ്രിഡ് - ബയേൺ മ്യൂണിക് പോരാട്ടമാണ് ഇന്നുള്ളത്. മാഞ്ചസ്റ്റർ സിറ്റിയെ അനായാസം പരാജയപ്പെടുത്തിയാണ് റയൽ ക്വാർട്ടറിലെത്തിയത്. ഇരുപാദങ്ങളിലുമായി 5–1ന്റെ മുൻതൂക്കത്തോടെയാണ് സ്‌പാനിഷ്‌ വമ്പൻമാർ ബയേണിനെതിരെ ഒരുങ്ങുന്നത്. അതേസമയം അറ്റ്ലാന്റയെ വലിയ മാർജിനിൽ തോൽപ്പിച്ചാണ് ബയേൺ എത്തുന്നത്. ഇരുപാദങ്ങളുമായി രണ്ടിനെതിരെ പത്ത് ​ഗോളാണ് ബയേൺ അടിച്ചുകൂട്ടിയത്. റയലിന്റെ തട്ടകമായ മാഡ്രിഡിലെ സാന്റിയാ​ഗോ ബെർണാബ്യുവിലാണ് മത്സരം. ജർമനിയിലെ മ്യൂണിക്കിൽ ഏപ്രിൽ 15ന് രണ്ടാം പാദ മത്സരം നടക്കും.

മറ്റൊരു മത്സരത്തിൽ സ്പോർട്ടിങ് ലിസ്ബണും അഴ്സണലും ഏറ്റുമുട്ടും. വമ്പൻമാരെ വിറപ്പിച്ചെത്തിയ നോർവെ ക്ലബ് ബോഡോ എഫ്‌കെയെ ഇരുപാദങ്ങളിലുമായി 5-3ന് പരാജയപ്പെടുത്തിയാണ് സ്പോർട്ടിങ്ങിന്റെ ക്വാർട്ടർ പ്രവേശം. ബയേൽ ലെവർകൂസനെ ഒന്നിനെതിരെ മൂന്ന് ​ഗോളിന് പരാജയപ്പെടുത്തിയാണ് അഴ്സണൽ എത്തുന്നത്. ഏപ്രിൽ 15ന് ലണ്ടനിലെ എമിറേറ്റ്സ് സ്റ്റേഡിയത്തിലാണ് രണ്ടാം പാദം.

ബാഴ്സലോണ x അത്‍ലറ്റിക്കോ മാഡ്രിഡ്, പിഎസ്ജി x ലിവർപൂൾ എന്നിവരാണ് ബുധനാഴ്ച നടക്കുന്ന ആദ്യപാദത്തിൽ ഏറ്റുമുട്ടുന്നത്. ന്യൂകാസിൽ യുണെറ്റഡിനെ രണ്ട് പാദങ്ങളിലുമായി 7-2ന് തോൽപ്പിച്ചാണ് ബാഴ്സ ക്വാർട്ടറിൽ എത്തുന്നത്. കഴിഞ്ഞ സീസണുകളിലെ തോൽവിയുടെ ക്ഷീണം മറക്കാൻ സജ്ജമായാണ് സ്പാനിഷ് പട എത്തുന്നത്. രണ്ടാം പാദത്തിൽ തോറ്റെങ്കിലും രണ്ട് പാദങ്ങളിലുമായി 7-5ന്റെ വിജയത്തിലാണ് അത്‍ലറ്റിക്കോയുടെ വരവ്. പ്രീക്വാർട്ടറിൽ ടോട്ടനം ഹോട്സ്പറിനെയാണ് പരാജയപ്പെടുത്തിയത്. ഏപ്രിൽ എട്ടിന് സ്പെയിനിലെ ലൂയിസ് കമ്പനിസ് ഒളിമ്പിക് സ്റ്റേഡിയത്തിൽ ആദ്യപാദവും ഏപ്രിൽ 14ന് മാഡ്രിഡിലെ മെട്രോപൊളിറ്റാനോ സ്റ്റേഡിയത്തിൽ രണ്ടാം പാദ ക്വാർട്ടറും നടക്കും.

8-2 എന്ന ആധികാരിക സ്കോറിൽ ചെൽസിയെ പരാജയപ്പെടുത്തിയാണ് പിഎസ്ജി ക്വാർട്ടർ ടിക്കറ്റ് നേടിയത്. തുർക്കി ക്ലബ്ബായ ഗലാറ്റ്സരെയെ ഇരുപാദങ്ങളിലുമായി 4-1ന് പരാജയപ്പെടുത്തിയാണ് ലിവർപൂളിന്റെ വരവ്. ഒന്നാം പാദത്തിൽ 1 ​ഗോളിന് ഗലാറ്റ്സരെ ജയിച്ചെങ്കിലും രണ്ടാം പാദത്തിൽ 4 ​ഗോൾ തിരിച്ചടിച്ച് ലിവർപൂൽ ക്വാർട്ടർ ടിക്കറ്റുറപ്പിച്ചു. ഏപ്രിൽ എട്ടിന് പാരീസിലെ പാർക്ക് ഡെസ് പ്രിൻസസ് സ്റ്റേഡിയത്തിൽ ഒന്നാംപാദവും ഏപ്രിൽ 14ന് ഇം​ഗ്ലണ്ടിലെ ആൻഫീൽഡിൽ രണ്ടാം പാദവും നടക്കും.

ഏപ്രിൽ 28/29, മെയ് 5/6 ദിവസങ്ങളിലായി സെമി ഫൈനലും ബുഡാപെസ്റ്റിൽ മെയ് 30ന് ഫൈനലും നടക്കും.

ക്വാർട്ടർ മത്സരങ്ങൾ

ആദ്യപാദം

ഏപ്രിൽ 7

സ്പോർട്ടിങ് ലിസ്ബൺ x അഴ്സണൽ

എസ്റ്റാഡിയോ ജോസ് അൽവാലേഡ് (Estádio José Alvalade (Lisbon, Portugal)

റയൽ മാഡ്രിഡ് x ബയേൺ മ്യൂണിക്

സാന്റിയാ​ഗോ ബെർണാബ്യു (Santiago Bernabéu Stadium (Madrid, Spain)

ഏപ്രിൽ 8

ബാഴ്സലോണ x അത്‍ലറ്റിക്കോ മാഡ്രിഡ്

ലൂയിസ് കമ്പനിസ് ഒളിമ്പിക് സ്റ്റേഡിയം Estadi Olímpic Lluís Companys (Barcelona, Spain)

പിഎസ്ജി x ലിവർപൂൾ

പാർക്ക് ഡെസ് പ്രിൻസസ് സ്റ്റേഡിയം Parc des Princes (Paris, France)

രണ്ടാം പാദം

ഏപ്രിൽ 14

അത്‍ലറ്റിക്കോ മാഡ്രിഡ് x ബാഴ്സലോണ

മെട്രോപൊളിറ്റാനോ സ്റ്റേഡിയം Cívitas Metropolitano (Madrid, Spain)

ലിവർപൂൾ x പിഎസ്ജി

ആൻഫീൽഡ് Anfield (Liverpool, England)

ഏപ്രിൽ 15

അഴ്സണൽ x സ്പോർട്ടിങ് ലിസ്ബൺ

എമിറേറ്റ്സ് സ്റ്റേഡിയം Emirates Stadium (London, England)

ബയേൺ മ്യൂണിക് x റയൽ മാഡ്രിഡ്

അലയൻസ് അരീന ( Allianz Arena (Munich, Germany)