ചാമ്പ്യൻസ് ലീഗ്: യുണൈറ്റഡിനെ തകർത്ത് അത്‍ലറ്റികോ; ബയേണിന് സമനില കുരുക്ക്, ഇന്ററിന് തോൽവി

ലണ്ടൻ: ചാമ്പ്യൻസ്‌ ലീഗ്‌ ഫുട്‌ബോളിൽ മാഞ്ചസ്റ്റർ യുണൈറ്റഡിനെ മറുപടിയില്ലാത്ത രണ്ട് ​ഗോളിന് തകർത്ത് അത്‍ലറ്റികോ മാഡ്രിഡ് മുന്നേറി. ബയേൺ മ്യൂണിക്കിനെ സമനിലയിൽ പിടിച്ച് വൈക്കിങ് ഞെട്ടിച്ചപ്പോൾ ഇന്റർ മിലാനെ വീഴ്ത്തി ക്ലബ് ബ്രൂ​ഗ് ചരിത്ര വിജയം കുറിച്ചു.

​യുണൈറ്റഡിന് തുടക്കത്തിൽ തന്നെ ഷോക്ക് നൽകിയാണ് അത്‍ലറ്റികോ തുടങ്ങിയത്. ഡീഗോ സിമിയോണിയുടെ ടീം ആദ്യ മിനിറ്റിൽ തന്നെ ലീഡ് നേടി. പാബ്ലോ ബാരിയോസ് ആണ് ടീമിന് ലീഡ് നേടികൊടുത്തത്. 74-ാം മിനിറ്റിൽ യുണൈറ്റഡ് താരം ലെനി യോറോ ചുവപ്പ് കാർഡ് പുറത്തായതോടെ കളി പൂർണ്ണമായും അത്‍ലറ്റികോയുടെ കൈയിലായി. പിന്നാലെ 79-ാം മിനിറ്റിൽ അഡെമോള ലുക്ക്മാൻ ടീം ലീഡ് ഉയർത്തി.

വമ്പന്മാരായ ബയേൺ മ്യൂണിക്കിനെ (3-3) സമനിലയിൽ തളച്ചാണ് വൈക്കിങ് ഞെട്ടിച്ചത്. ​മത്സരത്തിന്റെ തുടക്കത്തിൽ തന്നെ ആക്രമണം അഴിച്ചുവിട്ട വൈക്കിങ് രണ്ടാം മിനിറ്റിൽ തന്നെ ലീഡ് നേടി. സ്റ്റെൻസ്നെസാണ് ടീമിനായി ​ഗോൾ നേടിയത്. 38-ാം മിനിറ്റിൽ ക്രിസ്ത്യൻസെനും ​ഗോൾ നേടിയതോടെ ആദ്യ പകുതയിൽ 2-0ന് വൈക്കിങ് മുന്നിട്ടുനിന്നു. എന്നാൽ രണ്ടാം പകുതിയിൽ ശക്തമായി തിരിച്ചടിച്ച ബയേൺ മ്യൂൺ തുടർച്ചായി മൂന്ന് ​ഗോളുകൾ നേടി. 54-ാം മിനിറ്റിലും 60-ാം മിനിറ്റിലുമായി ഹാരി കെയ്ൻ ഇരട്ട ഗോളുകൾ നേടി. 71-ാം മിനിറ്റിൽ ലൂയിസ് ഡിയാസ് കൂടി ലക്ഷ്യം കണ്ടതോടെ ബയേൺ 3-2ന് മുന്നിലെത്തി. 74 മിനിറ്റിൽ ഒലീസ് റെഡ് കാർഡ് വാങ്ങിയത് ബയേണിന് തിരിച്ചടിയായി. പത്ത് പേരായി ചുരങ്ങിയ ടീമിനെതിരെ വൈക്കിങ് ശക്തമായ ആക്രമണം അഴിച്ചുവിട്ടു. മത്സരം അവസാനിക്കാൻ നിമിഷങ്ങൾ മാത്രം ബാക്കിനിൽക്കെ 90-ാം മിനിറ്റിൽ ഹെർമാൻ ഹൗഗൻ ടീമിനായി നാടകീയമായ സമനില പിടിച്ചെടുക്കുകയായിരുന്നു.

മൂന്നിനെതിരെ നാല് ​ഗോളുകൾക്ക് (3-4) ഇന്ററിനെ അട്ടിമറിച്ചാണ് ക്ലബ് ബ്രൂഗ് ഉജ്ജ്വല വിജയം സ്വന്തമാക്കിയത്. നികൊളോ ട്രെസോൾഡിയുടെ ഹാട്രിക്കാണ് ടീമിനെ വിജയം സമ്മാനിച്ചത്. ഇന്റർ മിലാനായി ലൗതാരോ മാർട്ടിനെസ് ഇരട്ട ​ഗോളുകൾ നേടി. മത്സരത്തിന്റെ 30-ാം മിനിറ്റിൽ പെനാൽറ്റിയിലൂടെ നികൊളോ ട്രെസോൾഡി ക്ലബ് ബ്രൂഗിന് ലീഡ് നേടി കൊടുത്തു. ആദ്യ പകുതി അവസാനിക്കുന്നതിന് തൊട്ടുമുമ്പ് ലൗതാരോ മാർട്ടിനെസ് (44) ഇന്ററിനായി സമനില ഗോൾ നേടി. എന്നാൽ രണ്ടാം പകുതിയിൽ മിന്നുന്ന പ്രകടനം കാഴ്ചവെച്ച ട്രെസോൾഡി 63-ാം മിനിറ്റിലും 74-ാം മിനിറ്റിലും ഗോളുകൾ നേടി ഹാട്രിക് തികച്ചു. തുടർന്ന് 87-ാം മിനിറ്റിൽ വെർമാന്റ് കൂടി ലക്ഷ്യം കണ്ടതോടെ ബ്രൂഗിന്റെ വിജയം ഉറപ്പായി. മാർട്ടിനെസും (81), ബോണിയും (90+3') ഒരോ ഗോളും മടക്കിയെങ്കിലും പരാജയം ഒഴിവാക്കാനായില്ല.