അധിക സമയം ഗോൾ മഴ: ബെൻഫിക്കയെ 4–-1ന്‌ തകർത്ത്‌ ചെൽസി
നോർത്ത്‌ കരോളിന
: നാലരമണിക്കൂർ നീണ്ട കളിയിൽ ചെൽസിയുടെ ഗോൾ മഴ.
ക്ലബ്‌ ഫുട്‌ബോൾ ലോകകപ്പിൽ പോർച്ചുഗൽ ക്ലബ്‌ ബെൻഫിക്കയെ 4–-1ന്‌ തകർത്ത്‌ ചെൽസി ക്വാർട്ടറിലേക്ക്‌ മുന്നേറി. അധികസമയത്തായിരുന്നു ഇംഗ്ലീഷുകാരുടെ മൂന്ന്‌ ഗോൾ. ക്വാർട്ടറിൽ ബ്രസീൽ ക്ലബ്‌ പൽമെയ്‌റാസാണ്‌ എതിരാളി. ജൂലൈ അഞ്ചിനാണ്‌ മത്സരം.
മോശം കാലാവസ്ഥ കാരണം കളി രണ്ട്‌ മണിക്കൂറിൽ കൂടുതലാണ്‌ വൈകിയത്‌. നാല്‌ മണിക്കൂർ 39 മിനിറ്റ്‌ ആണ്‌ മത്സരം നീണ്ടത്‌.
ആവേശകരമായ പ്രീ ക്വാർട്ടർ പോരിൽ റീസെ ജയിംസിന്റെ ഒന്നാന്തരം ഫ്രീകിക്ക്‌ ഗോളിൽ ചെൽസിയാണ്‌ ലീഡ്‌ എടുത്തത്‌.
പരിക്കുസമയത്ത്‌ ഏഞ്ചൽ ഡി മരിയ പെനൽറ്റിയിലൂടെ ബെൻഫിക്കയുടെ മറുപടി നൽകി. അധികസമയത്ത്‌ ക്രിസ്‌റ്റഫർ എൻകുങ്കു, പെഡ്രോ നെറ്റൊ, കിയേൺ ഡ്യൂസ്‌ബറിഹാൾ എന്നിവർ ചെൽസിയുടെ ജയം പൂർത്തിയാക്കി.
മികച്ച തുടക്കമായിരുന്നു ചെൽസിക്ക്‌. ആദ്യഘട്ടത്തിൽതന്നെ എൺസോ മറെസ്‌കയുടെ സംഘം ഗോളിന്‌ അരികെയെത്തി. മാർക്‌ കുകുറല്ലയുടെ നീക്കം ബെൻഫിക്ക ഗോൾ കീപ്പർ അനറ്റോലി ട്രുബിനെ മറികടന്നു. ആഘട്ടത്തിൽ വരയ്‌ക്ക്‌ മുന്നിൽവച്ച്‌ അന്റോണിയോ സിൽവ ഹെഡറിലൂടെ അപകടമൊഴിവാക്കുകയായിരുന്നു. കോൾ പാൽമറെയും കുകുറല്ലയെയും ട്രുബിൻ തടഞ്ഞു.
ഇടവേളയ്‌ക്കുശേഷമാണ്‌ ചെൽസിയുടെ പരിശ്രമങ്ങൾക്ക്‌ ഫലംകിട്ടിയത്‌. ഇടതുഭാഗത്തുനിന്ന്‌ ജയിംസ്‌ തൊടുത്ത ഫ്രീകിക്ക്‌ ട്രുബിന്റെ മുന്നിൽകുത്തി വലയിലേക്ക്‌ കയറി. ഗോൾ വഴങ്ങിയതോടെ ബെൻഫിക്ക ഉണർന്നു.
അർഥപൂർണമായ നീക്കങ്ങൾ ചെൽസി ബോക്‌സിലേക്ക്‌ നടത്താൻ പോർച്ചുഗീസുകാർക്ക്‌ കഴിഞ്ഞു. ഈ സമയത്താണ്‌ ഇടിമിന്നൽ കാരണം കളി നിർത്തിവയ്‌ക്കുന്നത്‌. രണ്ട്‌ മണിക്കൂർ കഴിഞ്ഞ്‌ കളി പുനരാരംഭിക്കുകയായിരുന്നു.
പരിക്കുസമയത്തിന്റെ അഞ്ചാം മിനിറ്റിൽ ബെൻഫിക്ക ഒപ്പമെത്തി. ചെൽസി പ്രതിരോധക്കാരൻ മാലോ ഗുസ്‌റ്റോയുടെ കൈയിൽ പന്ത്‌ തട്ടിയതിന്‌ പെനൽറ്റി. ഡി മരിയയുടെ കിക്ക്‌ കൃത്യമായി വര കടന്നു.
അധികസമയത്ത്‌ കളി വീണ്ടും മാറി. പകരക്കാരനായെത്തിയ ജിയാൻലൂക പ്രസ്‌റ്റിയാന്നി രണ്ടാം മഞ്ഞക്കാർഡും വാങ്ങി പുറത്തായതോടെ ബെൻഫിക്ക പത്ത്‌ പേരായി ചുരുങ്ങി. പിന്നാലെ കരെം അക്‌തുർകോഗ്ലു തകർപ്പൻ ഷോട്ടിലൂടെ ബെൻഫിക്കയെ ഉണർത്തി.
പക്ഷേ, ചെൽസി ഗോൾ കീപ്പർ റോബർട്ട്‌ സാഞ്ചെസ്‌ അത്‌ സമർഥമായി പിടിച്ചു.
കളി പിന്നെ ചെൽസിയുടെ വരുതിയിലാവുകയായിരുന്നു. മോയ്‌സെസ്‌ കയ്‌സെദൊയുടെ ഷോട്ട്‌ ട്രുബിന്റെ കൈകളിൽ തട്ടിത്തെറിച്ചപ്പോൾ എൻകുങ്കു അത്‌ വലയിലേക്ക്‌ തിരിച്ചുവിട്ടു. ഒറ്റയ്‌ക്ക്‌ മുന്നേറി നെറ്റൊ ബെൻഫിക്ക ഗോൾ കീപ്പർ തലയ്‌ക്ക്‌ മുകളിലൂടെ പന്ത്‌ കോരിയിട്ടു. ഡ്യൂസ്‌ബറിഹാളിന്റെ മുന്നിലും ബെൻഫിക്കയ്‌ക്ക്‌ മറുപടിയുണ്ടായില്ല.
Related News
Dont Miss it
0 comments