എംബാപ്പെയും ബെല്ലിംങാമും വലകുലുക്കി; എൽ ക്ലാസിക്കോയിൽ ബാർസയെ തകർത്ത് റയൽ

മാഡ്രിഡ്: സാന്തിയാഗോ ബെർണബ്യൂവിൽ സ്വന്തം കാണികൾക്കു മുന്നിൽ റയൽ ബാർസലോണയെ ഒന്നിനെതിരേ രണ്ട് ഗോളുകൾക്ക് തകർത്തു .സീസണിലെ ആദ്യ എൽക്ലാസിക്കോയാണിത്. ജയത്തോടെ റയൽ ലാലിഗയിൽ ഒന്നാംസ്ഥാനത്ത് തുടരുന്നു.

22-ാം മിനിറ്റിൽ എംബാപ്പെയാണ് റയലിനെ മുന്നിലെത്തിച്ചത്. എന്നാൽ 38-ാം മിനിറ്റിൽ മാർക്കസ് റാഷ്‌ഫോർഡിന്റെ പാസിൽനിന്ന് ഫെർമിൻ ലോപ്പസ് ബാഴ്സയ്ക്കായി ഗോൾ കണ്ടെത്തിയതോടെ സമനിലയിലായി. പിന്നീട് 43-ാം മിനിറ്റിൽ ജൂഡ് ബെല്ലിങാം റയലിനെ വീണ്ടും മുന്നിലെത്തിച്ചു.

ജയത്തോടെ റയലിന് 10 മത്സരങ്ങളിൽനിന്ന് 27 പോയിന്റായി. 22 പോയിന്റോടെ ബാഴ്‌സലോണ രണ്ടാം സ്ഥാനത്ത് തുടരുന്നു.രണ്ടാംപകുതിയിൽ റയലിന് അനുകൂലമായ പെനാൽറ്റി ലഭിച്ചെങ്കിലും എംബാപ്പെ എടുത്ത കിക്ക് ബാഴ്‌സ ഗോൾക്കീപ്പർ ഷെസ്‌നി തടഞ്ഞു.