മെസിയും സംഘവും ഒക്ടോബറിൽ കേരളത്തിലെത്തും; സൗഹൃദ മത്സരം കൊച്ചിയിൽ

കൊച്ചി: അർജന്റീന ടീം ഒക്ടോബറിൽ കേരളത്തിലെത്തും. കൊച്ചിയിൽ പ്രദർശന മത്സരം കളിക്കുമെന്ന് ടീമിന്റെ ഒഫീഷ്യൽ സ്പോൺസർമാരായ എച്ച്എസ്ബിസി അറിയിച്ചു. മെസി അടക്കമുള്ള ടീം ഒക്ടോബറിൽ ഇന്ത്യയിലെത്തുമെന്ന് എച്ച്എസ്ബിസി പ്രസ്താവനയിൽ പറയുന്നു. അർജന്റീന ടീം കേരളത്തിൽ സൗഹൃദ മത്സരം കളിക്കുമെന്ന് കായിക മന്ത്രി വി അബ്ദുറഹിമാൻ നേരത്തേ പ്രതികരിച്ചിരുന്നു.
ആരാവും അർജന്റീനയോട് ഏറ്റുമുട്ടുക
കൊച്ചി നെഹ്റു സ്റ്റേഡിയത്തിൽ അറ്റകുറ്റപ്പണി നടത്തിയാകും മത്സരത്തിന് സജ്ജമാക്കുക. അർജന്റീനയുടെ എതിരാളി ആരെന്ന് തീരുമാനിച്ചിട്ടില്ല. ഉയർന്ന റാങ്കുള്ള സൗദി അറേബ്യ, ഇറാൻ, ഖത്തർ, യുഎഇ തുടങ്ങിയ അറബ് രാജ്യങ്ങളെയാണ് പരിഗണിക്കുന്നത്. ഫിഫ റാങ്ക് കുറഞ്ഞ ടീമുകളോട് കളിക്കാൻ അർജന്റീനയ്ക്ക് താൽപ്പര്യമില്ല. ഇന്ത്യയുടെ റാങ്ക് 125 ആണ്.
ഇന്ത്യയിലെത്തുന്നത് 14 വർഷങ്ങൾക്കു ശേഷം
2011 സെപ്തംബറിലാണ് ഇതിന് മുമ്പ് അർജന്റീന ഇന്ത്യയിലെത്തി കളിച്ചത്. കൊൽക്കത്തയിൽ വെനസ്വേലക്കെതിരായ ലോകകപ്പ് യോഗ്യത മത്സരത്തിനായിട്ടാണ് ടീം അന്ന് എത്തിയത്. മത്സരത്തിൽ 1-0ത്തിന് അർജന്റീന ജയിച്ചു.









0 comments