ബാറ്റ് പിടിച്ചില്ല, ഗ്ലൗസ് അണിഞ്ഞില്ല; ധോണി ഇനി വരുമോ? പ്രതികരണവുമായി സിഎസ്‌കെ പരിശീലകൻ

ചെന്നൈ: ഐപിഎല്ലിൽ ചെന്നൈ സൂപ്പർ കിങ്സ് പ്ലേ ഓഫ് കാണാതെ പുറത്താകലിന്റെ നിഴലിൽ നിൽക്കുമ്പോൾ, ആരാധകരെയും ക്രിക്കറ്റ് ലോകത്തെയും ഒരേപോലെ അലട്ടുന്നത് മുൻ നായകൻ എം എസ് ധോണിയുടെ ഭാവിയെക്കുറിച്ചുള്ള ചോദ്യങ്ങളാണ്.

അടുത്ത സീസണിൽ താരം വീണ്ടും മഞ്ഞക്കുപ്പായത്തിൽ കളിക്കാനിറങ്ങുമോ എന്ന ചർച്ചകൾ സജീവമാകുന്നതിനിടെ, വിഷയത്തിൽ പ്രതികരണവുമായി സിഎസ്‌കെ മുഖ്യ പരിശീലകൻ സ്റ്റീഫൻ ഫ്ലെമിങ് രംഗത്തെത്തി. ധോണി അടുത്ത സീസണിൽ തുടരുമോ എന്ന കാര്യം തനിക്കല്ല, മറിച്ച് ടീം മാനേജ്‌മെന്റാണ് തീരുമാനിക്കേണ്ടതെന്നാണ് ഫ്ലെമിങ് വ്യക്തമാക്കിയത്.

യുവതാരങ്ങളെ വാർത്തെടുക്കുക എന്ന ലക്ഷ്യത്തോടെയാണ് ഈ സീസണിൽ സിഎസ്‌കെ ധോണിയെ 'അൺക്യാപ്ഡ് താരം' ആയി ടീമിൽ നിലനിർത്തിയത്. എന്നാൽ പരിക്കിനെ തുടർന്ന് ഈ സീസണിൽ ഒരു മത്സരത്തിൽ പോലും ധോണിക്ക് കളത്തിലിറങ്ങാൻ സാധിച്ചിരുന്നില്ല.

ലീഗ് ഘട്ടത്തിൽ ഇനി ഒരേയൊരു മത്സരം മാത്രം അവശേഷിക്കെ, താരം ഇതുവരെ ബാറ്റ് ചെയ്യുകയോ വിക്കറ്റ് കീപ്പിങ് ഗ്ലൗസ് അണിയുകയോ ചെയ്തിട്ടില്ല. ധോണി മത്സരങ്ങളിൽ ഇറങ്ങിയിട്ടില്ലെങ്കിലും ഡ്രെസ്സിങ് റൂമിലെ അദ്ദേഹത്തിന്റെ സാന്നിധ്യം യുവതാരങ്ങൾക്ക് വലിയ കരുത്തായിരുന്നുവെന്നും, ടീമിൽ ഇപ്പോഴും അദ്ദേഹത്തിന് വലിയ സ്വാധീനമുണ്ടെന്നും ഫ്ലെമിങ് കൂട്ടിച്ചേർത്തു.

ഈ സീസണിലുടനീളം ധോണി കളിക്കാത്തതിനെച്ചൊല്ലി വലിയ അനിശ്ചിതത്വങ്ങളും അഭ്യൂഹങ്ങളും നിലനിന്നിരുന്നു. താരം പരിക്കിന്റെ പിടിയിലാണെന്ന് സിഎസ്‌കെ മാനേജ്‌മെന്റ് ഔദ്യോഗികമായി വ്യക്തമാക്കുമ്പോഴും, യുവതാരങ്ങൾക്ക് കൂടുതൽ അവസരങ്ങൾ ലഭിക്കുന്നതിനായി ധോണി ബോധപൂർവ്വം മാറിനിൽക്കുകയാണെന്ന തരത്തിലുള്ള റിപ്പോർട്ടുകളും പുറത്തുവന്നിരുന്നു.

തിങ്കളാഴ്ച സൺറൈസേഴ്‌സ് ഹൈദരാബാദിനെതിരെയുള്ള മത്സരത്തിൽ ധോണി കളിക്കാൻ ഒരുങ്ങുന്നു എന്ന വാർത്തകൾ വന്നെങ്കിലും, യുവതാരങ്ങൾക്ക് അവസരം നൽകേണ്ട ഘട്ടത്തിൽ ധോണി മടങ്ങിയെത്തുന്നത് ഉചിതമല്ലെന്ന് മുൻ ഇന്ത്യൻ താരം സുനിൽ ഗാവസ്കർ ഉൾപ്പെടെയുള്ളവർ അഭിപ്രായപ്പെട്ടിരുന്നു. അടുത്ത സീസണിൽ ധോണി കളിക്കാരനായി തുടരുമോ എന്ന ചോദ്യത്തിന് വരും ദിവസങ്ങളിൽ മാത്രമേ കൃത്യമായ മറുപടി ലഭിക്കൂ.