‘250? കൂൾ - 406? കൂൾ’; ഗില്ലിന്റെ ഇൻസ്റ്റഗ്രാം പോസ്റ്റിന് വിൻഡീസ് ക്യാപ്റ്റന്റെ മറുപടി

റാഞ്ചി : ഇന്ത്യൻ നായകൻ ശുഭ്മാൻ ഗില്ലിന്റെ ഇൻസ്റ്റഗ്രാം പോസ്റ്റിന് മറുപടിയുമായി വെസ്റ്റ് ഇൻഡീസ് ക്യാപ്റ്റൻ ഷായ് ഹോപ്പ്. ഇന്ത്യക്കെതിരായ രണ്ടാം ട്വന്റി20യിൽ 45 പന്തിൽ പുറത്താകാതെ 102 റൺസ് നേടി ടീമിനെ വിജയത്തിലെത്തിച്ചതിനു പിന്നാലെയാണ് ഹോപ്പിന്റെ ട്രോൾ. ‘250? കൂൾ’ എന്ന അടിക്കുറിപ്പോടെ സ്വന്തം ചിത്രം ഇൻസ്റ്റഗ്രാമിൽ പങ്കുവെച്ച ഹോപ്പ്, ഗില്ലിന്റെ മുൻപത്തെ പോസ്റ്റിനാണ് മറുപടി നൽകിയത്.

സെപ്തംബർ 30ന് ഗുവാഹത്തിയിൽ നടന്ന രണ്ടാം ഏകദിനത്തിൽ വെസ്റ്റ് ഇൻഡീസ് ഉയർത്തിയ 406 റൺസ് വിജയലക്ഷ്യം ഇന്ത്യ മറികടന്നിരുന്നു. മത്സരത്തിൽ വെസ്റ്റ് ഇൻഡീസ് ഏഴ് വിക്കറ്റ് നഷ്ടത്തിൽ 405 റൺസെടുത്തപ്പോൾ, ശുഭ്മാൻ ഗില്ലിന്റെയും രോഹിത് ശർമയുടെയും മികവിൽ ഇന്ത്യ ആറു വിക്കറ്റിന് വിജയിച്ചു. ഗിൽ പുറത്താകാതെ 223 റൺസും രോഹിത് 101 റൺസും നേടി. 39 പന്തുകൾ ബാക്കിനിൽക്കെയായിരുന്നു ഇന്ത്യയുടെ ജയം.

വിജയത്തിനു പിന്നാലെ സെഞ്ചുറി ആഘോഷിക്കുന്ന ചിത്രം ‘406? കൂൾ’ എന്ന അടിക്കുറിപ്പോടെ ഗിൽ ഇൻസ്റ്റഗ്രാമിൽ പങ്കുവെച്ചിരുന്നു. ഇതിന് സമാനമായ രീതിയിലാണ് ഹോപ്പിന്റെ ‘250? കൂൾ’ എന്ന പോസ്റ്റ്. റാഞ്ചിയിൽ ഇന്ത്യ ഉയർത്തിയ 250 റൺസ് വിജയലക്ഷ്യം വെസ്റ്റ് ഇൻഡീസ് മറികടന്നതിനു പിന്നാലെയായിരുന്നു ഈ പ്രതികരണം.

ഇന്ത്യ ഉയർത്തിയ 250 റൺസ് ലക്ഷ്യം ഒൻപത് പന്തുകൾ ബാക്കിനിൽക്കെ നാല് വിക്കറ്റ് നഷ്ടത്തിൽ മറികടന്ന വിൻഡീസ് അഞ്ചു മത്സരങ്ങളുടെ പരമ്പരയിൽ 1–1ന് ഒപ്പമെത്തി. ബാറ്റിങ്ങിന് അനുകൂലമായ പിച്ചിൽ പന്തെറിയുക പ്രയാസമായിരുന്നു. അഞ്ച് റൺസിന് രണ്ട് വിക്കറ്റ് നഷ്ടമായപ്പോൾ വിജയലക്ഷ്യം പിന്തുടരുക വെല്ലുവിളിയായിരുന്നെന്നും വിൻഡീസ് ക്യാപ്റ്റൻ കൂട്ടിച്ചേർത്തു.