സച്ചിനും ഗവാസ്‌കർക്കും പിന്നാലെ സെവാഗിന്റെ റെക്കോർഡും തകർത്തു; റൺവേട്ടയിൽ ചരിത്രമെഴുതി രോഹിത് ശർമ്മ

ചെന്നൈ: ചെന്നൈയിൽ അഫ്ഗാനിസ്ഥാനെതിരെ നടന്ന മൂന്നാമത്തെയും അവസാനത്തെയും ഏകദിന മത്സരത്തിൽ ഒന്നിലധികം റെക്കോർഡുകൾ തകർത്തെറിഞ്ഞ് ഇന്ത്യൻ ഓപ്പണർ രോഹിത് ശർമ്മ.

മത്സരത്തിൽ വെറും 69 പന്തുകളിൽ നിന്ന് 9 ഫോറുകളും 3 സിക്സറുകളും അടക്കം 79 റൺസാണ് രോഹിത് അടിച്ചുകൂട്ടിയത്. മൂന്ന് മത്സരങ്ങളുടെ പരമ്പരയിൽ അഫ്ഗാനിസ്ഥാനെ പൂർണ്ണമായി തൂത്തുവാരാൻ ഇന്ത്യക്ക് 219 റൺസ് എന്ന ചെറിയ ലക്ഷ്യം മാത്രമാണുണ്ടായിരുന്നത്.

രോഹിതിന്റെ ഈ വെടിക്കെട്ട് ഇന്നിങ്സ് ലക്ഷ്യം എളുപ്പത്തിൽ മറികടക്കാൻ ഇന്ത്യയെ സഹായിച്ചു. ഇതോടൊപ്പം യുവതാരം യശസ്വി ജയ്‌സ്വാൾ പുറത്താകാതെ സെഞ്ച്വറി (86 പന്തിൽ 110) നേടി ഈ അവസരം നന്നായി വിനിയോഗിക്കുകയും ചെയ്തു.

പ്രായത്തെ തോൽപ്പിച്ച റെക്കോർഡും ഓപ്പണർമാരിലെ ഒന്നാം സ്ഥാനവും

തന്റെ 39-ാം വയസ്സിൽ (39 വയസ്സും 51 ദിവസവും) അർദ്ധസെഞ്ച്വറി നേടിയതോടെ ഏകദിന ക്രിക്കറ്റിൽ അർദ്ധസെഞ്ച്വറി നേടുന്ന ഏറ്റവും പ്രായം കൂടിയ ഇന്ത്യൻ താരമെന്ന റെക്കോർഡ് രോഹിത് സ്വന്തമാക്കി.

1989 ഒക്ടോബർ 15-ന് ഷാർജയിൽ പാകിസ്ഥാനെതിരെ 39 വയസ്സും 21 ദിവസവും പ്രായമുള്ളപ്പോൾ 88 റൺസ് നേടിയ മൊഹീന്ദർ അമർനാഥിന്റെ റെക്കോർഡാണ് രോഹിത് മറികടന്നത്.

ഇതിനുപുറമേ മറ്റൊരു ചരിത്ര റെക്കോർഡും രോഹിത് തന്റെ പേരിൽ കുറിച്ചു. അന്താരാഷ്ട്ര ക്രിക്കറ്റിൽ ഏറ്റവും കൂടുതൽ റൺസ് നേടുന്ന ഇന്ത്യൻ ഓപ്പണർമാരുടെ പട്ടികയിൽ സച്ചിൻ ടെണ്ടുൽക്കർ, സുനിൽ ഗാവസ്‌കർ എന്നിവരെ രോഹിത് നേരത്തെ തന്നെ മറികടന്നിരുന്നു. എന്നാൽ ശനിയാഴ്ച നടന്ന മത്സരത്തോടെ വീരേന്ദർ സെവാഗിനെയും പിന്നിലാക്കി രോഹിത് ഈ പട്ടികയിൽ ഒന്നാം സ്ഥാനത്തെത്തി.

അന്താരാഷ്ട്ര ക്രിക്കറ്റിൽ ഏറ്റവും കൂടുതൽ റൺസ് നേടിയ ഇന്ത്യൻ ഓപ്പണർമാർ

രോഹിത് ശർമ്മ: 16,137 റൺസ്

വീരേന്ദർ സെവാഗ്: 16,119 റൺസ്

സച്ചിൻ ടെണ്ടുൽക്കർ: 15,335 റൺസ്

സുനിൽ ഗാവസ്‌കർ: 12,258 റൺസ്

ശിഖർ ധവാൻ: 10,867 റൺസ്