ചെന്നൈ ആരാധകർക്ക് വൻ തിരിച്ചടി; ധോണിക്ക് വീണ്ടും പരിക്ക്, ഹൈദരാബാദിനെതിരായ മത്സരത്തിൽ കളിക്കില്ല

ചെന്നൈ: ഇന്ത്യൻ പ്രീമിയർ ലീഗിൽ സൺറൈസേഴ്‌സ് ഹൈദരാബാദിനെതിരായ നിർണ്ണായക മത്സരത്തിന് മുന്നോടിയായി ചെന്നൈ സൂപ്പർ കിംഗ്സ് ക്യാമ്പിൽ നിന്ന് നിരാശാജനകമായ വാർത്ത. തള്ളവിരലിനേറ്റ പുതിയ പരിക്കിനെ തുടർന്ന് മുൻ ക്യാപ്റ്റൻ എംഎസ് ധോണി തിങ്കളാഴ്ച നടക്കുന്ന മത്സരത്തിൽ കളിക്കില്ലെന്നാണ് റിപ്പോർട്ടുകൾ വ്യക്തമാക്കുന്നത്.

'ദി ഇന്ത്യൻ എക്സ്പ്രസ്' പുറത്തുവിട്ട റിപ്പോർട്ടുകൾ പ്രകാരം, ലഖ്‌നൗ സൂപ്പർ ജയന്റ്‌സിനെതിരെയുള്ള കഴിഞ്ഞ മത്സരത്തിന് തൊട്ടുമുമ്പാണ് ധോണിക്ക് പരിക്കേറ്റത്. താരം ടീമിനൊപ്പം ചേരുമെന്ന് മാനേജ്‌മെന്റ് നേരത്തെ പ്രതീക്ഷിച്ചിരുന്നെങ്കിലും, പരിക്കിനെ തുടർന്ന് അദ്ദേഹം ലഖ്‌നൗവിലേക്ക് യാത്ര ചെയ്തിരുന്നില്ല.

ഐപിഎൽ 2026 സീസൺ ആരംഭിക്കുന്നതിന് തൊട്ടുമുമ്പ് കാൽവണ്ണയ്ക്കേറ്റ പരിക്ക് ധോണിയെ നേരത്തെ തന്നെ അലട്ടുന്നുണ്ടായിരുന്നു. ഇതേത്തുടർന്ന് ടൂർണമെന്റിന്റെ ആദ്യ രണ്ടാഴ്ചത്തെ മത്സരങ്ങളിൽ നിന്ന് അദ്ദേഹത്തെ പൂർണ്ണമായി ഒഴിവാക്കിയിരുന്നു.

എന്നാൽ പരിക്ക് ഭേദമാകാൻ എടുത്ത താമസം, തുടർന്നുണ്ടായ ചില ശാരീരിക ബുദ്ധിമുട്ടുകൾ, കൂടാതെ വിജയകരമായി മുന്നോട്ടുപോകുന്ന ചെന്നൈ ടീമിന്റെ കോമ്പിനേഷനിൽ പെട്ടെന്ന് മാറ്റം വരുത്തേണ്ടതില്ലെന്ന ധോണിയുടെ സ്വന്തം തീരുമാനം എന്നിവയെല്ലാം അദ്ദേഹത്തിന്റെ തിരിച്ചുവരവ് വീണ്ടും വൈകിക്കുകയായിരുന്നു.

ചെപ്പോക്കിലെ ചെന്നൈയുടെ ഹോം ഗ്രൗണ്ടിൽ ഈ സീസണിൽ നടക്കുന്ന അവസാന മത്സരമായ ഹൈദരാബാദിനെതിരെയുള്ള പോരാട്ടത്തിലൂടെ ധോണി പ്ലെയിംഗ് ഇലവനിലേക്ക് ശക്തമായി തിരിച്ചെത്തുമെന്ന വലിയ പ്രതീക്ഷയിലായിരുന്നു ആരാധകർ.

എന്നാൽ അപ്രതീക്ഷിതമായി തള്ളവിരലിനേറ്റ പുതിയ പരിക്ക് താരത്തിന്റെ മടങ്ങിവരവിന് വീണ്ടും തിരിച്ചടിയാവുകയായിരുന്നു. ധോണിയുടെ അഭാവം പ്ലേ-ഓഫ് സാധ്യതകൾ സജീവമാക്കാൻ ഇറങ്ങുന്ന ചെന്നൈ സൂപ്പർ കിംഗ്സിന് വലിയ പ്രതിസന്ധിയാണ് സൃഷ്ടിക്കുന്നത്.