ഓസ്ട്രേലിയയ്ക്ക് തകർപ്പൻ തിരിച്ചുവരവ്; 5 വിക്കറ്റുമായി സ്റ്റാർക്കിന്റെ റെക്കോഡ് പ്രകടനം

മക്കായ് : രണ്ടാം ടെസ്റ്റിൽ ബംഗ്ലാദേശിനെതിരെ ശക്തമായി തിരിച്ചടിച്ച് ഓസ്ട്രേലിയ. ടോസ് നേടി ബോളിങ് തെരഞ്ഞെടുത്ത ഓസ്ട്രേലിയയ്ക്ക് വേണ്ടി മിച്ചൽ സ്റ്റാർക്ക് വെറും 22 പന്തുകളിൽ നിന്ന് 5 വിക്കറ്റുകൾ വീഴ്ത്തി തകർപ്പൻ പ്രകടനം പുറത്തെടുത്തു.

മത്സരത്തിലെ ആദ്യ പന്തിൽ തന്നെ ഷാദ്മാൻ ഇസ്ലാമിനെ ഗോൾഡൻ ഡക്കാക്കി താരം വിക്കറ്റ് വേട്ടയ്ക്ക് തുടക്കമിട്ടു. ടെസ്റ്റ് ക്രിക്കറ്റിന്റെ ചരിത്രത്തിൽ ആദ്യ പന്തിൽ തന്നെ താരം നാലാം തവണയാണ് വിക്കറ്റ് നേടുന്നത്. തൻസിദ് ഹസൻ, ക്യാപ്റ്റൻ നജ്മുൽ ഹുസൈൻ ഷാന്റോ, മൊമിനുൽ ഹഖ്, ലിറ്റൺ ദാസ് എന്നിവരെ പുറത്താക്കി ബംഗ്ലാദേശ് ബാറ്റിങ് നിരയെ സ്റ്റാർക്ക് തകർത്തു.

7 ഓവറിൽ 12 റൺസ് എടുക്കുന്നതിനിടെയാണ് ബംഗ്ലാദേശിന് ആദ്യ 5 വിക്കറ്റുകൾ നഷ്ടമായത്. ഈ പ്രകടനത്തോടെ ദക്ഷിണാഫ്രിക്കൻ മുൻ താരം ഡെയ്ൽ സ്റ്റെയ്‌നിനെ മറികടന്ന് ടെസ്റ്റ് വിക്കറ്റ് വേട്ടക്കാരുടെ പട്ടികയിൽ മുന്നേറാനും സ്റ്റാർക്കിനായി. ഒന്നാം ടെസ്റ്റിൽ മാറ്റ് റെൻഷോയ്ക്ക് അവസരം നൽകിയാണ് ഓസ്ട്രേലിയ ഇറങ്ങിയത്.