സ്നേഹം മാത്രം, പ്രശ്നങ്ങളൊന്നുമില്ല; നിക്കോളാസ് പുരാനൊപ്പമുള്ള ചിത്രം പങ്കുവെച്ച് ക്രുണാൽ പാണ്ഡ്യ

ബെംഗളൂരു: ഐപിഎൽ 2026-ലെ റോയൽ ചലഞ്ചേഴ്സ് ബെംഗളൂരു, ലഖ്‌നൗ സൂപ്പർ ജയന്റ്‌സ് മത്സരത്തിനിടെ നിക്കോളാസ് പുരാൻ ക്രുണാൽ പാണ്ഡ്യയുടെ കോളറിൽ പിടിക്കുന്ന വീഡിയോ വൈറലായ പശ്ചാത്തലത്തിൽ, സംഭവത്തിൽ വ്യക്തത വരുത്തി ക്രുണാൽ പാണ്ഡ്യ രംഗത്തെത്തി.

തങ്ങൾക്കിടയിൽ യാതൊരുവിധ ശത്രുതയുമില്ലെന്നും ആ ദൃശ്യങ്ങൾ സൗഹൃദപരമായ ഒരു തമാശ മാത്രമായിരുന്നുവെന്നും താരം വ്യക്തമാക്കി.

വ്യാഴാഴ്ച നടന്ന മത്സരത്തിനിടയിൽ ഇരുവരും തമ്മിൽ മൈതാനത്ത് ചെറിയ വാഗ്വാദങ്ങൾ നടന്നിരുന്നു. മത്സരത്തിന് ശേഷം സോഷ്യൽ മീഡിയയിൽ പ്രചരിച്ച വീഡിയോയിൽ പുരാൻ ക്രുണാലിനോട് വൈകാരികമായി സംസാരിക്കുന്നതും അദ്ദേഹത്തിന്റെ കോളറിൽ പിടിക്കുന്നതും കാണാമായിരുന്നു.

എന്നാൽ ഇതിനു പിന്നാലെ ഇരുവരും പരസ്പരം ഹസ്തദാനം ചെയ്തത് സംഭവം ഗൗരവമുള്ളതല്ലെന്ന സൂചന നൽകിയിരുന്നു.

ആരാധകർക്കിടയിൽ ചർച്ച കൊഴുത്തതോടെ, പുരാനൊപ്പമുള്ള ചിത്രം ഇൻസ്റ്റാഗ്രാമിൽ പങ്കുവെച്ചുകൊണ്ട് ക്രുണാൽ അഭ്യൂഹങ്ങൾക്ക് വിരാമമിട്ടു.

"ലഫ്ഡ (പ്രശ്നങ്ങൾ) ഒന്നുമില്ല, സ്നേഹം മാത്രം. 100 ഐപിഎൽ മത്സരങ്ങൾ പൂർത്തിയാക്കിയ എന്റെ സഹോദരൻ നിക്കോളാസ് പുരാന് അഭിനന്ദനങ്ങൾ. നിന്നെക്കുറിച്ച് അഭിമാനിക്കുന്നു," എന്ന് അദ്ദേഹം കുറിച്ചു. ഇതിന് മറുപടിയായി "ഇവിടെ സ്നേഹം മാത്രമേയുള്ളൂ, നീ എന്റെ അടുത്ത സുഹൃത്താണ്" എന്ന് പുരാനും പ്രതികരിച്ചു.