ഹിറ്റ്‌മാൻ ഈസ് ബാക്ക്! മുംബൈ ഇന്ത്യൻസിന് പുതുജീവൻ

മുംബൈ : പരിക്കിന്റെ ഇടവേളയ്ക്ക് ശേഷം തിരികെ എത്തിയ രോഹിത് ശർമ്മയുടെ തകർപ്പൻ ബാറ്റിങിന്റെ കരുത്തിൽ ലഖ്‌നൗ സൂപ്പർ ജയന്റ്‌സിനെതിരെ മുംബൈ ഇന്ത്യൻസിന് ആവേശകരമായ വിജയം. ഹാംസ്ട്രിംങ് പരിക്ക് മൂലം അഞ്ച് മത്സരങ്ങൾ നഷ്ടമായ രോഹിത്, മടങ്ങിവരവിൽ വെറും 44 പന്തിൽ നിന്ന് 84 റൺസാണ് അടിച്ചുകൂട്ടിയത്.

മുംബൈയുടെ വാംഖഡെ സ്റ്റേഡിയത്തിൽ നടന്ന മത്സരത്തിൽ ടോസ് നഷ്ടപ്പെട്ട് ബാറ്റിങിനിറങ്ങിയ ലഖ്‌നൗ ഉയർത്തിയ കൂറ്റൻ വിജയലക്ഷ്യം പിന്തുടർന്ന മുംബൈയ്ക്ക് വേണ്ടി രോഹിത് ശർമ്മയും റയാൻ റിക്കൽട്ടണും (32 പന്തിൽ 83) ചേർന്ന് വെടിക്കെട്ട് തുടക്കമാണ് നൽകിയത്. വെറും 11 ഓവറിൽ 143 റൺസാണ് ഈ സഖ്യം ബോർഡിൽ ചേർത്തത്.

ഏഴ് സിക്സറുകളാണ് രോഹിത്തിന്റെ ബാറ്റിൽ നിന്ന് പിറന്നത്. മുഹമ്മദ് ഷമി, ആവേശ് ഖാൻ തുടങ്ങിയ പേസർമാരെയും സ്പിന്നർ എം സിദ്ധാർത്ഥിനെയും ഒരുപോലെ കടന്നാക്രമിച്ച രോഹിത്, ട്വന്റി20 ക്രിക്കറ്റിലെ തന്റെ പുതിയ 'അഗ്രസീവ്' ശൈലി ഒരിക്കൽ കൂടി പുറത്തെടുത്തു. ഏപ്രിൽ 12 മുതൽ മെയ് 4 വരെയുള്ള കാലയളവിൽ രോഹിത്തിന്റെ അഭാവം മുംബൈയെ പോയിന്റ് പട്ടികയിൽ ഒൻപതാം സ്ഥാനത്തേക്ക് പിന്തള്ളിയിരുന്നു. രോഹിത്തിന് പകരക്കാരനായി ഇറങ്ങിയ യുവതാരം ഡാനിഷ് മലേവാറിന് തിളങ്ങാൻ കഴിയാതിരുന്നതും, വിദേശ താരങ്ങളുടെ ക്വാട്ട സംബന്ധിച്ച ആശയക്കുഴപ്പങ്ങളും ടീമിന് തിരിച്ചടിയായി. ദീപക് ചഹാർ ഉൾപ്പെടെയുള്ള ഇന്ത്യൻ ബൗളർമാർ ഫോം കണ്ടെത്താൻ പ്രയാസപ്പെട്ടതോടെ ട്രെന്റ് ബോൾട്ടിനെ ടീമിൽ ഉൾപ്പെടുത്തേണ്ടി വന്നു. ഇത് വിദേശ താരങ്ങളുടെ ക്വാട്ട പരിമിതപ്പെടുത്തിയതിനാൽ ക്വിന്റൺ ഡി കോക്കിനെയും റിക്കൽട്ടണിനെയും ഒരുമിച്ച് ഓപ്പണർമാരായി കളിപ്പിക്കാൻ മുംബൈയ്ക്ക് തടസ്സമായി

രോഹിത് ശർമ്മയുടെ ബാറ്റിങ് ശൈലിയിലുണ്ടായ മാറ്റത്തെ മുൻ ഇന്ത്യൻ താരം സഞ്ജയ് ബംഗാർ പ്രശംസിച്ചു. ആദ്യ ആറ് ഓവറുകളിൽ തന്നെ സിക്സറുകൾ നേടി കളി നിയന്ത്രിക്കുന്ന ഓപ്പണർമാരുടെ കാലമാണിതെന്ന് അദ്ദേഹം നിരീക്ഷിച്ചു. 2024 സീസണിൽ 417 റൺസും 2025ൽ 418 റൺസും നേടി മികച്ച ഫോം തുടരുന്ന രോഹിത്, ഒരു സീനിയർ താരം എന്ന നിലയിൽ ആധുനിക ട്വന്റി20 ക്രിക്കറ്റിനനുസരിച്ച് തന്റെ ശൈലി മാറ്റിയത് ടീമിന് വലിയ മുതൽക്കൂട്ടാണെന്നും ബംഗാർ കൂട്ടിച്ചേർത്തു. പ്ലേ ഓഫ് പ്രതീക്ഷകൾ തുലാസിലാണെങ്കിലും, രോഹിത്തിന്റെ ഈ തിരിച്ചുവരവ് വരും മത്സരങ്ങളിൽ മുംബൈയ്ക്ക് വലിയ ആത്മവിശ്വാസം നൽകും. പ്ലേ ഓഫിലെത്താൻ ശേഷിക്കുന്ന മത്സരങ്ങളിൽ വമ്പൻ ജയങ്ങൾ തന്നെ മുംബൈ ഇന്ത്യൻസിന് അനിവാര്യമാണ്.