ഓറഞ്ച് ക്യാപ് പോരാട്ടത്തിൽ ഹെൻറിച്ച് ക്ലാസനും പർപ്പിൾ ക്യാപ്പിൽ ഭുവനേശ്വർ കുമാറും മുന്നിൽ

തിരുവനന്തപുരം : ഐപിഎൽ 2026 സീസണിലെ ആവേശകരമായ മത്സരങ്ങൾ തുടരുമ്പോൾ ഓറഞ്ച്, പർപ്പിൾ ക്യാപ് പട്ടികകളിൽ പോരാട്ടം തുടരുന്നു. വെള്ളിയാഴ്ച നടന്ന മത്സരത്തിൽ ഡൽഹി ക്യാപിറ്റൽസിനെതിരെ കൊൽക്കത്ത നൈറ്റ് റൈഡേഴ്സ് തകർപ്പൻ വിജയം നേടിയതോടെ വ്യക്തിഗത നേട്ടങ്ങളിലും വലിയ മാറ്റങ്ങൾ ഉണ്ടായി. റൺവേട്ടക്കാരുടെ പട്ടികയിൽ 494 റൺസുമായി ഹെൻറിച്ച് ക്ലാസൻ തന്റെ ആധിപത്യം തുടരുകയാണ്. 475 റൺസ് നേടിയ അഭിഷേക് ശർമ്മയാണ് രണ്ടാം സ്ഥാനത്ത്.

ഡൽഹിക്കെതിരായ മത്സരത്തിൽ 23 റൺസ് നേടിയതോടെ കെ എൽ രാഹുൽ ആകെ 468 റൺസുമായി മൂന്നാം സ്ഥാനം ഉറപ്പിച്ചു. വൈഭവ് സൂര്യവംശി (404 റൺസ്), സായ് സുദർശൻ (385 റൺസ്), ശുഭ്മാൻ ഗിൽ (378 റൺസ്) എന്നിവരും ആദ്യ പത്തിൽ ഇടംപിടിച്ചു. വിക്കറ്റ് വേട്ടക്കാരുടെ പട്ടികയിൽ 17 വിക്കറ്റുകൾ വീതം നേടിയ ഭുവനേശ്വർ കുമാറും അൻഷുൽ കംബോജുമാണ് ആദ്യ രണ്ട് സ്ഥാനങ്ങളിൽ. കുറഞ്ഞ ഇക്കോണമി റേറ്റ് ഭുവനേശ്വറിനെ മുന്നിലെത്തിക്കുന്നു. പ്രിൻസ് യാദവ്, കാഗിസോ റബാഡ, ഇഷാൻ മലിംഗ എന്നിവർ 16 വിക്കറ്റുകൾ വീതം നേടി തൊട്ടുപിന്നിലുണ്ട്.

കൊൽക്കത്തയുടെ കാർത്തിക് ത്യാഗി കഴിഞ്ഞ നാല് മത്സരങ്ങളിൽ നിന്ന് എട്ട് വിക്കറ്റുകൾ വീഴ്ത്തി ആകെ 13 വിക്കറ്റുകളുമായി പട്ടികയിൽ മുന്നേറുകയാണ്. 15 വിക്കറ്റുകളുള്ള ജോഫ്ര ആർച്ചറും ശക്തമായ വെല്ലുവിളി ഉയർത്തുന്നുണ്ട്. ശനിയാഴ്ച നടക്കുന്ന രാജസ്ഥാൻ റോയൽസ് - ഗുജറാത്ത് ടൈറ്റൻസ് മത്സരത്തോടെ ഈ പട്ടികയിൽ വലിയ മാറ്റങ്ങൾ ഉണ്ടാകാൻ സാധ്യതയുണ്ട്. കാഗിസോ റബാഡയോ ജോഫ്ര ആർച്ചറോ മികച്ച പ്രകടനം നടത്തിയാൽ പർപ്പിൾ ക്യാപ് സ്വന്തമാക്കാൻ കഴിഞ്ഞേക്കും.