വൈഭവ് സൂര്യവംശിക്ക് അർധസെഞ്ചുറി; മൂന്നാം ട്വന്റി20യിൽ സിംബാബ്‌വെക്കെതിരെ ഇന്ത്യക്ക് മികച്ച സ്കോർ

ഹരാരെ : സിംബാബ്‌വെക്കെതിരായ മൂന്നാം ട്വന്റി 20 മത്സരത്തിൽ ഇന്ത്യക്ക് മികച്ച സ്കോർ. ഹരാരെ സ്പോർട്സ് ക്ലബിൽ നടക്കുന്ന പോരാട്ടത്തിൽ ടോസ് നേടി ബാറ്റിങിനിറങ്ങിയ ഇന്ത്യ നിശ്ചിത ഓവറിൽ 5 വിക്കറ്റ് നഷ്ടത്തിൽ 192 റൺസ് നേടി. 49 പന്തിൽ 81 റൺസെടുത്ത വൈഭവ് സൂര്യവംശിയുടെ തകർപ്പൻ ഇന്നിങ്‌സാണ് ഇന്ത്യൻ സ്കോറിന് കരുത്തായത്.

മത്സരത്തിന്റെ തുടക്കത്തിൽ തന്നെ ഓപ്പണർ അഭിഷേക് ശർമയെ (2) ഇന്ത്യക്ക് നഷ്ടമായി. എന്നാൽ രണ്ടാം വിക്കറ്റിൽ ഒന്നിച്ച വൈഭവ് - ഇഷാൻ കിഷൻ സഖ്യം 75 റൺസ് കൂട്ടിച്ചേർത്ത് ഇന്ത്യയെ മത്സരത്തിലേക്ക് തിരിച്ചുകൊണ്ടുവന്നു. ഇഷാൻ കിഷൻ 26 പന്തിൽ 29 റൺസെടുത്ത് പുറത്തായി. 4 സിക്സറുകളും 8 ഫോറുകളുമടക്കം 81 റൺസെടുത്ത വൈഭവ് സൂര്യവംശി 15-ാം ഓവറിലാണ് വിക്കറ്റായത്.

ക്യാപ്റ്റൻ ശ്രേയസ് അയ്യർ 18 പന്തിൽ 27 റൺസും റിങ്കു സിങ് 25 റൺസും തിലക് വർമ 11 റൺസുമെടുത്ത് പിന്തുണ നൽകി. അവസാന ഓവറുകളിൽ തിലക് വർമ - റിങ്കു സിങ് സഖ്യം കൂട്ടിച്ചേർത്ത 28 റൺസാണ് ഇന്ത്യൻ സ്കോർ 190 കടത്തിയത്. സിംബാബ്‌വെക്ക് വേണ്ടി ബ്രാഡ് ഇവാൻസ് രണ്ട് വിക്കറ്റുകൾ വീഴ്ത്തി.

രണ്ട് മാറ്റങ്ങളോടെയാണ് ഇന്ത്യ ഇന്നിറങ്ങിയത്. പരിക്കേറ്റ പ്രിൻസ് യാദവിന് പകരം അശോക് ശർമയും ശിവം ദുബെയ്ക്ക് പകരം സൂര്യാൻഷ് ഷെഡ്‌ഗെയും പ്ലെയിങ് ഇലവനിൽ ഇടംനേടി. പരമ്പരയിലെ ആദ്യ രണ്ട് മത്സരങ്ങളും ജയിച്ച ഇന്ത്യ ഇതിനോടകം തന്നെ പരമ്പര സ്വന്തമാക്കി. മറുപടി ബാറ്റിങിനിറങ്ങിയ സിംബാബ്‌വെ ഒരു വിക്കറ്റ് നഷ്ടത്തിൽ 34 റൺസ് എടുത്തു.