ഒപ്പമെത്തണം ; ഇന്ത്യ ഇംഗ്ലണ്ട്‌ നാലാം ടെസ്റ്റിന് ഇന്ന്‌ തുടക്കം
ഋഷഭ് പന്ത് പരിശീലനത്തിനിടയിൽ
മാഞ്ചസ്റ്റർ
പരിക്കിന്റെ വെല്ലുവിളികൾ മറികടന്ന്‌ മാഞ്ചസ്റ്ററിൽ ജയംപിടിക്കാൻ ഇന്ത്യക്കാകുമോ. ഇംഗ്ലണ്ടിനെതിരായ നാലാം ക്രിക്കറ്റ്‌ ടെസ്റ്റിന് ഇന്നാണ്‌ തുടക്കം. പരമ്പരയിൽ 2–-1ന്‌ ഇംഗ്ലണ്ട്‌ മുന്നിലാണ്‌. ഒപ്പമെത്താൻ ജയം വേണം. തോറ്റാൽ ശുഭ്‌മാൻ ഗില്ലിനും കൂട്ടർക്കും പരമ്പര നഷ്ടമാകും. പരമ്പരയിൽ ഒരു കളികൂടി ബാക്കിയുണ്ട്‌.
പരിക്കാണ്‌ ഇന്ത്യയെ വലയ്‌ക്കുന്നത്‌. ഓൾ റൗണ്ടർ നിതീഷ്‌ കുമാർ റെഡ്ഡി പരമ്പരയിൽനിന്ന്‌ പുറത്തായി. പേസർമാരായ ആകാശ്‌ ദീപും അർഷ്‌ദീപ്‌ സിങ്ങും പരിക്കുകാരണം നാലാം ടെസ്‌റ്റിനുള്ള ടീമിലില്ല. യുവപേസർ അൻഷുൽ കാംബോജ്‌ അരങ്ങേറിയേക്കും. ബാറ്റിങ്‌ നിരയിൽ ബി സായ്‌ സുദർശൻ തിരിച്ചെത്താൻ സാധ്യതയുണ്ട്‌. വാഷിങ്‌ടൺ സുന്ദറിന്‌ പകരം ശാർദുൽ ഠാക്കൂറും കളിച്ചേക്കും. വിക്കറ്റ്‌ കീപ്പർ ഋഷഭ് പന്ത് കളിക്കുമെന്ന്‌ ഉറപ്പായി. ജസ്‌പ്രീത്‌ ബുമ്രയും ഇറങ്ങും.
ഇംഗ്ലണ്ട്‌ നിരയിൽ പരിക്കേറ്റ ഷോയ്‌ബ്‌ ബഷീറിന്‌ പകരം ലിയാം ഡോസൺ ഇടംപിടിച്ചു. മാഞ്ചസ്റ്ററിൽ മികച്ച റെക്കോഡാണ്‌ ഇംഗ്ലണ്ടിന്‌. ക്യാപ്‌റ്റൻ ബെൻ സ്‌റ്റോക്‌സ്‌ ഏറ്റവും മികച്ച പ്രകടനം പുറത്തെടുത്തതും ഇവിടെയാണ്‌.
ലോർഡ്‌സ്‌ ടെസ്‌റ്റിൽ നിയന്ത്രണം നേടിയിട്ടും അവസാനദിനം ബാറ്റർമാർ മങ്ങിയതാണ്‌ ഇന്ത്യയുടെ തോൽവിക്ക്‌ കാരണമായത്‌.
ഇന്ത്യൻ ടീം: യശസ്വി ജയ്‌സ്വാൾ, കെ എൽ രാഹുൽ, കരുൺ നായർ, ശുഭ്‌മാൻ ഗിൽ, ഋഷഭ് പന്ത്, സായ്‌ സുദർശൻ, രവീന്ദ്ര ജഡേജ, വാഷിങ്‌ടൺ സുന്ദർ/ശാർദുൽ ഠാക്കൂർ, ജസ്‌പ്രീത്‌ ബുമ്ര, മുഹമ്മദ്‌ സിറാജ്‌, പ്രസിദ്ധ്‌ കൃഷ്‌ണ/അൻഷുൽ കാംബോജ്‌.
ഇംഗ്ലണ്ട്‌ ടീം: സാക്ക്‌ ക്രോളി, ബെൻ ഡക്കെറ്റ്‌, ഒല്ലീ പോപ്പ്‌, ജോ റൂട്ട്‌, ഹാരി ബ്രൂക്ക്‌, ബെൻ സ്‌റ്റോക്‌സ്‌, ജാമി സ്‌മിത്ത്‌, ക്രിസ്‌ വോക്‌സ്‌, ലിയാം ഡോസൺ, ബ്രൈഡൻ കാർസീ, ജോഫ്ര ആർച്ചെർ.
Related News
Dont Miss it
0 comments