വിജയം തേടി കേരളം; രഞ്ജിയിൽ ഇന്ന്‌ സൗരാഷ്ട്രയ്ക്കെതിരെ

തിരുവനന്തപുരം: രഞ്ജി ട്രോഫി ക്രിക്കറ്റിൽ കഴിഞ്ഞ സീസണിൽ ഫൈനലിലെത്തി ചരിത്രം സൃഷ്ടിച്ച കേരളത്തിന് ഇനിയുള്ള മത്സരങ്ങൾ നിർണായകം. കഴിഞ്ഞ മത്സരത്തിൽ കർണാടകത്തോട് ഇന്നിങ്സ് തോൽവി വഴങ്ങിയ കേരളം വിജയവഴി തേടിയാണ് ഇന്ന്‌ സൗരാഷ്ട്രയെ നേരിടാനൊരുങ്ങുന്നത്. തിരുവനന്തപുരം മംഗലപുരത്തെ കെസിഎ സ്റ്റേഡിയത്തിലാണ് മത്സരം.

മൂന്ന് മത്സരങ്ങളിൽ നിന്ന് രണ്ട് പോയിൻ്റ് മാത്രമാണ് കേരളത്തിനുള്ളത്. ആദ്യ രണ്ട് കളികളും സമനിലയിൽ കലാശിച്ചപ്പോൾ കർണാടകയോടെ ദയനീയ തോൽവിയാണ് കേരളം വഴങ്ങിയത്. നിർണായക മത്സരത്തിൽ ടീമിൽ പുതിയ മാറ്റങ്ങൾ വരുത്തിയാണ് കേരളം സൗരാഷ്ട്രയ്ക്കെതിരെ ഇറങ്ങുന്നത്. സി കെ നായിഡു ടൂർണമെൻ്റിൽ മികച്ച പ്രകടനം കാഴ്ച വച്ച വരുൺ നായനാർ, ആകർഷ് എ കൃഷ്ണമൂർത്തി എന്നിവരെ ടീമിൽ ഉൾപ്പെടുത്തി. കെസിഎല്ലിലടക്കം മികവ് തെളിയിച്ച സിബിൻ പി ഗിരീഷും പുതുതായി ടീമിലെത്തി.

മറുവശത്ത് മുൻ ഇന്ത്യൻ താരം ജയ്ദേവ് ഉനദ്ഘട്ടിൻ്റെ നേതൃത്വത്തിലാണ് സൗരാഷ്ട്ര കളിക്കാനിറങ്ങുക. കളിച്ച മൂന്ന് മത്സരങ്ങളും സമനിലയിൽ അവസാനിച്ച സൗരാഷ്ട്രയ്ക്ക് അഞ്ച് പോയിൻ്റാണുള്ളത്

കേരള ടീം: മൊഹമ്മദ് അസറുദ്ദീൻ, ബാബ അപരാജിത്, രോഹൻ എസ് കുന്നുമ്മൽ, കൃഷ്ണപ്രസാദ്, അഹ്മദ് ഇമ്രാൻ, സച്ചിൻ ബേബി, ആകർഷ് എ കൃഷ്ണമൂർത്തി, വരുൺ നായനാർ, അഭിഷേക് പി നായർ, സച്ചിൻ സുരേഷ്, അങ്കിത് ശർമ്മ, ഹരികൃഷ്ണൻ എം യു, നിധീഷ് എം ഡി, ബേസിൽ എൻ പി, ഏദൻ ആപ്പിൾ ടോം, സിബിൻ പി ഗിരീഷ്