അസോസിയേറ്റ് രാജ്യങ്ങളുടെ കരുത്തറിയാൻ ഐസിസി; പ്രഥമ വനിതാ ചലഞ്ച് ട്രോഫി നാളെ മുതൽ

കിഗാലി: റുവാണ്ടയിലെ കിഗാലി ആതിഥേയത്വം വഹിക്കുന്ന പ്രഥമ ഐസിസി വനിതാ ചലഞ്ച് ട്രോഫിക്ക് ഏപ്രിൽ 18 ന് തുടക്കമാകും. ഉദ്ഘാടന മത്സരങ്ങളിൽ ആതിഥേയരായ റുവാണ്ട ഇറ്റലിയെയും നേപ്പാൾ യുഎസ്എയെയും നേരിടും. അസോസിയേറ്റ് രാജ്യങ്ങളിലെ വനിതാ ടീമുകൾക്ക് കൂടുതൽ രാജ്യാന്തര മത്സരപരിചയം നൽകുക എന്ന ലക്ഷ്യത്തോടെ ഐസിസി കലണ്ടറിൽ ഉൾപ്പെടുത്തിയ പുതിയ ടൂർണമെന്റാണിത്.

മെയ് 1 വരെയാണ് മത്സരങ്ങൾ നീണ്ടുനിൽക്കുന്നത്.ആകെ അഞ്ച് ടീമുകളാണ് ഈ ചരിത്ര ടൂർണമെന്റിൽ മാറ്റുരയ്ക്കുന്നത്. റുവാണ്ട, ഇറ്റലി, നേപ്പാൾ, യുഎസ്എ എന്നിവർ ആദ്യ ദിനം ഗഹാംഗ ക്രിക്കറ്റ് സ്റ്റേഡിയത്തിൽ ഇറങ്ങുമ്പോൾ വാനുവാട്ടു രണ്ടാം ദിനം മുതൽ മത്സരങ്ങളുടെ ഭാഗമാകും.

ഡബിൾ റൗണ്ട് റോബിൻ ഫോർമാറ്റിൽ നടക്കുന്ന ടൂർണമെന്റിൽ ഓരോ ടീമിനും പരമാവധി മത്സരങ്ങൾ കളിക്കാനുള്ള അവസരമാണ് ഐസിസി ഒരുക്കിയിരിക്കുന്നത്. ഇത് വരും വർഷങ്ങളിൽ കരുത്തരായ ടീമുകളെ നേരിടാൻ അസോസിയേറ്റ് രാജ്യങ്ങളെ പ്രാപ്തരാക്കും.

2025 ലെ പ്രാദേശിക ട്വന്റി20 ലോകകപ്പ് യോഗ്യതാ മത്സരങ്ങളിലെ പ്രകടനത്തിന്റെ അടിസ്ഥാനത്തിലാണ് ടീമുകളെ ടൂർണമെന്റിലേക്ക് തിരഞ്ഞെടുത്തത്. വനിതാ ക്രിക്കറ്റിനെ ആഗോളതലത്തിൽ വളർത്തുന്നതിന്റെ ഭാഗമായി കഴിഞ്ഞ നവംബറിൽ ആരംഭിച്ച 'എമർജിംഗ് നേഷൻസ് ട്രോഫിക്ക്' പിന്നാലെയാണ് ഐസിസി ചലഞ്ച് ട്രോഫിയും അവതരിപ്പിക്കുന്നത്.

ഈ വർഷം ഇംഗ്ലണ്ടിലും വെയ്ൽസിലുമായി നടക്കാനിരിക്കുന്ന 12 ടീമുകളുടെ വനിതാ ലോകകപ്പിന് മുന്നോടിയായുള്ള നിർണ്ണായക ചുവടുവെപ്പായാണ് ഇതിനെ കായിക ലോകം നോക്കിക്കാണുന്നത്.ഇത്തരമൊരു ആഗോള ടൂർണമെന്റിന് വേദിയാകാൻ കഴിഞ്ഞത് റുവാണ്ടൻ ക്രിക്കറ്റിന്റെ വളർച്ചയുടെ അടയാളമാണെന്ന് റുവാണ്ട ക്രിക്കറ്റ് അസോസിയേഷൻ പ്രസിഡന്റ് സ്റ്റീഫൻ മുസാലെ പറഞ്ഞു.

ടൂർണമെന്റിന് എല്ലാവിധ പിന്തുണയും നൽകിയ കായിക മന്ത്രാലയത്തിനും ഐസിസിക്കും അദ്ദേഹം നന്ദി അറിയിച്ചു. ചരിത്രപരമായ ഈ കായിക മാമാങ്കത്തിന് സാക്ഷ്യം വഹിക്കാൻ ആരാധകർ വലിയതോതിൽ സ്റ്റേഡിയത്തിലേക്ക് എത്തണമെന്നും അദ്ദേഹം അഭ്യർത്ഥിച്ചു.