അർഷ്ദീപിന് പരിക്ക്; വിൻഡീസിനെതിരായ അവസാന ട്വന്റി20യിൽ ഭുവനേശ്വർ കുമാർ ടീമിൽ

ബംഗളൂരു : വെസ്റ്റ് ഇൻഡീസിനെതിരായ അഞ്ചാം ട്വന്റി20 മത്സരത്തിന് മുന്നോടിയായി ഇന്ത്യൻ ടീമിന് തിരിച്ചടി. പേസർ അർഷ്ദീപ് സിങ്ങിന്റെ തോളിന് പരുക്കേറ്റതിനെത്തുടർന്ന് പകരക്കാരനായി ഭുവനേശ്വർ കുമാറിനെ ടീമിൽ ഉൾപ്പെടുത്തി.

2022ൽ ന്യൂസീലൻഡിനെതിരെയാണ് താരം അവസാനമായി ട്വന്റി20 മത്സരം കളിച്ചത്. 2018ൽ ദക്ഷിണാഫ്രിക്കയ്‌ക്കെതിരെയാണ് അവസാനമായി ടെസ്റ്റ് കളിച്ചത്. 2022ൽ ദക്ഷിണാഫ്രിക്കയ്‌ക്കെതിരെയായിരുന്നു അവസാന ഏകദിനം.

ശനിയാഴ്ച നടക്കുന്ന അവസാന മത്സരം പരമ്പര വിജയികളെ തീരുമാനിക്കുന്ന പോരാട്ടമാണ്. നിലവിൽ പരമ്പര 2–2ന് സമനിലയിലാണ്. ബുധനാഴ്ച ഹൈദരാബാദിൽ നടന്ന നാലാം ട്വന്റി20 മത്സരത്തിനിടെയാണ് അർഷ്ദീപിന് പരിക്കേറ്റത്. താരത്തിന് അവസാന മത്സരത്തിൽ കളിക്കാനാകുമോ എന്ന കാര്യത്തിൽ ഇതുവരെ തീരുമാനമായിട്ടില്ല.

അർഷ്ദീപിന്റെ പരിക്ക് ഭേദമാകുന്നതിന്റെ അടിസ്ഥാനത്തിൽ അവസാന ട്വന്റി20യിൽ താരത്തിന്റെ പങ്കാളിത്തം സംബന്ധിച്ച് മത്സരത്തിന് തൊട്ടുമുമ്പ് തീരുമാനമെടുക്കുമെന്ന് ബിസിസിഐ വെള്ളിയാഴ്ച പുറത്തിറക്കിയ വാർത്താക്കുറിപ്പിൽ അറിയിച്ചു.