മധുര ചുവപ്പണിഞ്ഞു: പതിനായിരങ്ങൾ ഒഴുകിയെത്തി; സമ്മേളനത്തിന് ആവേശകരമായ സമാപനം

മധുര: മധുരയു‌ടെ മണ്ണിനെ വിപ്ലവത്തിന്റെ ചുവപ്പണിയിച്ച സിപിഐ എം 24-ാം പാർട്ടികോൺ​ഗ്രസിന്റെ ആവേശോജ്വലമായ സമ്മേളനത്തിന് സമാപനം. ചുവപ്പുസേന പരേഡും ഒപ്പം ഇന്ത്യയുടെ ഭാവി വെല്ലുവിളികളെ ഏറ്റെടുക്കാനണിനിരന്ന പുതിയ പ്രവർത്തകർക്കും അഭിവാദ്യമർപ്പിക്കാൻ ജനം എൻ ശങ്കരയ്യ ന​ഗറിലേക്ക് മുദ്രാവാക്യങ്ങളുമായ് ഒഴുകിയെത്തി.

വാച്ചാത്തി സമരപോരാളികൾ ഫ്ലാഗ്‌ ഓഫ്‌ ചെയ്ത പ്രകടനത്തിൽ 10,000 റെഡ്‌ വളന്റിയർമാരാണ് സമാപനത്തിൽ അണിനിരന്നത്. 1.4 കിലോമീറ്റർ ദൂരം മാർച്ച്‌ ചെയ്‌ത്‌ ചുവപ്പുസേന പൊതുസമ്മേളനവേദിയിലെത്തി.

അതേസമയം, പുതിയ ജനറൽ സെക്രട്ടറിയായി പോളിറ്റ് ബ്യൂറോ അം​ഗം എംഎ ബേബിയെ തെരഞ്ഞെടുത്തു. 18 അംഗ പൊളിറ്റ് ബ്യൂറോയേയും 85 അംഗ കേന്ദ്ര കമ്മിറ്റിേയയും തെരഞ്ഞെടുത്തു. ഇതിൽ ഒരു സ്ഥാനം ഒഴിച്ചിട്ടു.

പിബിയിൽ എട്ടുപേർ പുതുമുഖങ്ങളാണ്. 85 അംഗ സെൻട്രൽ കമ്മിറ്റിയിൽ 30 പേർ പുതുമുഖങ്ങളാണ്. ഏഴ് പേർ പ്രത്യേക ക്ഷണിതാക്കൾ. ആറംഗ സെൻട്രൽ കൺട്രോൾ കമ്മീഷനെയും തെരഞ്ഞെടുത്തു.

പിബി അംഗം മുഹമ്മദ് സലീം ജനറൽ സെക്രട്ടറി സ്ഥാനത്തേക്ക് എം എ ബേബിയുടെ പേര് നിർദ്ദേശിച്ചു. അശോക് ധാവ്ളെ പിന്താങ്ങി. പാർടി കോൺഗ്രസ് എം എ ബേബിയെ സെക്രട്ടറിയായി തെരഞ്ഞെടുത്തതായി പിണറായി വിജയൻ സമ്മേളനത്തെ അറിയിച്ചു.