സാമ്രാജ്യത്വ കടന്നാക്രമങ്ങൾക്കെതിരെ 19-ാം പാർടി കോൺഗ്രസ്‌: 2008 മാർച്ച്‌ 29 മുതൽ ഏപ്രിൽ രണ്ട്‌ വരെ

കോയമ്പത്തൂർ: കയ്യൂർ രക്തസാക്ഷിത്വത്തിന്റെ 65-ാം വാർഷികത്തിലാണ്‌ കോയമ്പത്തൂരിൽ 2008 മാർച്ച്‌ 29 മുതൽ ഏപ്രിൽ രണ്ടുവരെ 19-ാം പാർടി കോൺഗ്രസ്‌ നടന്നത്‌. സാമ്രാജ്യത്വ ആഗോളവൽക്കരണത്തിലൂടെ പുത്തൻ ഉദാരവൽക്കരണ നയങ്ങൾ കെട്ടിയേൽപ്പിക്കാനും ഉപരോധങ്ങൾ, സൈനിക നടപടികൾ എന്നിവയിലൂടെ തങ്ങളുടെ അധീശത്വം വർധിപ്പിക്കാനും അമേരിക്കയുടെ ശ്രമങ്ങൾ ശക്തിപ്പെട്ടുവെന്ന്‌ രാഷ്‌ട്രീയ പ്രമേയത്തിൽ പറഞ്ഞു. സാമ്രാജ്യത്വ കടന്നാക്രമങ്ങൾക്കെതിരെ ചെറുത്തുനിൽപ്പും വളർന്നുവരികയാണ്‌.

ലാറ്റിൻ അമേരിക്കയിലെ ഇടതുപക്ഷ മുന്നേറ്റം, ലോകബാങ്ക്‌, ഐഎംഎഫ്‌ എന്നിവയ്‌ക്ക്‌ ബദലായി ബ്രസീൽ, വെനസ്വേല, അർജന്റീന തുടങ്ങി ഏഴ്‌ രാജ്യം ചേർന്ന്‌ രൂപീകരിച്ച ബാങ്കും ഇതിന്‌ തെളിവായി. യുപിഎ സർക്കാരിന്റെ ജനവിരുദ്ധ നവഉദാര നയങ്ങൾക്കെതിരെ പ്രതികരിക്കുകയും ഇന്തോ–അമേരിക്കൻ ആണവ കരാറിന്റെ അപകടങ്ങൾ തുറന്നുകാണിക്കുകയും ചെയ്യുന്നതിൽ പാർടി നിർണായക പങ്കുവഹിച്ചു. ജനങ്ങളുടെ ജീവിതപ്രശ്‌നങ്ങൾ, സാമ്പത്തികനയം, വിദേശനയം എന്നീ പ്രശ്‌നങ്ങളിൽ ജനങ്ങളെ അണിനിരത്താൻ പാർടിക്ക്‌ കഴിഞ്ഞു. കർഷക ആത്മഹത്യ വർധിക്കുന്നത്‌ തടയാൻ കേന്ദ്ര സർക്കാരിനു കഴിയുന്നില്ല. ഭക്ഷ്യനയം ഭക്ഷ്യസുരക്ഷയെ തകർക്കുന്നതാണ്‌ എന്നും റിപ്പോർട്ട്‌ വിലയിരുത്തുന്നു.

യുപിഎ സർക്കാരിന്റെ നയങ്ങളിലെ ജനവിരുദ്ധതയും അമേരിക്കൻ വിധേയത്വവും തുറന്നുകാണിക്കുന്നതായിരുന്നു റിപ്പോർട്ട്‌.
18–-ാം പാർടി കോൺഗ്രസ്‌ അംഗീകരിച്ച അടവുനയത്തിന്റെ അവലോകനവും റിപ്പോർട്ടിലുണ്ട്‌. 93 അംഗ കേന്ദ്ര കമ്മിറ്റിയെയും ജനറൽ സെക്രട്ടറിയായി പ്രകാശ്‌ കാരാട്ടിനെയും തെരഞ്ഞെടുത്തു. പിബിയിൽ 15 അംഗങ്ങൾ.