തുടരെ തുടരെയുള്ള ഭൂചലനങ്ങൾക്ക്‌ കാരണം ഇന്ത്യൻ ഫലകം രണ്ടായി പിളരുന്നതോ! ഹിമാലയത്തിനടിയില്‍ സംഭവിക്കുന്നതെന്ത്?

ഭൂമിയിലെ ഏറ്റവും സജീവ ഭൂചലന മേഖലകളിൽ ഒന്നാണ് ഹിമാലയൻ മേഖല. ഇന്ന്‌ ഏറ്റവും കൂടുതൽ ഭൂചലനങ്ങൾ റിപ്പോർട്ട്‌ചെയ്യുന്ന പ്രദേശം കൂടിയാണ്‌ ഹിമാലയം ഉൾപ്പെടുന്ന ടിബറ്റൻ പീഠഭൂമി. ഇവിടെ ധാരാളം ഭൂചലനങ്ങളുണ്ടാകുകയും വിള്ളലുകള്‍ രൂപപ്പെടുകയും ചെയ്യുന്നുണ്ട്. ഈ സംഭവവികാസത്തിന്റെകാരണം കണ്ടെത്തിയിരിക്കുകയാണ്‌ ഭൂകമ്പ ഡാറ്റ ശാസ്ത്രജ്ഞർ.

ഇന്ത്യൻ ഫലകവും യുറേഷ്യൻ ഫലകവും തമ്മിലുണ്ടായ ഒരു വലിയ കൂട്ടിയിടിയുടെ ഫലമായാണ് ഹിമാലയം രൂപംകൊണ്ടിട്ടുള്ളത്‌. ഏകദേശം 6കോടി വർഷങ്ങൾക്ക് മുമ്പായിരുന്നു ശക്തമായ ഈ കൂട്ടിയിടി സംഭവിച്ചത്‌. വളരെക്കാലമായി, ഇന്ത്യൻ ഫലകം യുറേഷ്യൻ ഫലകത്തിനടിയിൽ ക്രമാനുഗതമായി തെന്നിമാറുന്നുവെന്നാണ്‌ ശാസ്‌ത്രജ്ഞർ വിശ്വസിച്ചിരുന്നത്‌. ഈ തെന്നിമാറൽ മൂലം ടിബറ്റൻ പീഠഭൂമി പതുക്കെ ഉയരുകയും ലക്ഷക്കണക്കിന് വർഷങ്ങളായി പർവതങ്ങൾ രൂപംകൊള്ളുകയും ചെയ്യുന്നുവെന്നാണ്‌ കരുതപ്പെട്ടിരുന്നത്‌. എന്നാൽ ആ കണക്കുകൂട്ടലുകളെ മുഴുവനായും തെറ്റിച്ചു കൊണ്ടാണ്‌ പുതിയ കണ്ടുപിടിത്തം നടത്തിയിരിക്കുന്നത്‌.

ഇന്ത്യൻ ടെക്റ്റോണിക് പ്ലേറ്റ് യുറേഷ്യൻ ഫലകത്തിനടിയിൽ തെന്നിമാറുകയല്ല ടിബറ്റിന് താഴെ ആഴത്തിൽ പിളരുകയാണെന്നാണ്‌ പുതിയ കണ്ടെത്തൽ. ഫലകത്തിന്റെ താഴ് ഭാഗം അടർന്ന് ഭൂമിയുടെ ആവരണത്തിലേക്ക് നീങ്ങുകയും അതേസമയം ഭാരം കുറഞ്ഞ മുകള്‍ ഭാഗം ഉപരിതലത്തിന് തൊട്ടുതാഴെയായി നീങ്ങുകയും ചെയ്യുന്നുവെന്നാണ് പഠനം. ഇത് വളരെ അപൂര്‍വമായി നടക്കുന്ന പ്രക്രിയയാണ്. ഈ പ്രക്രിയമൂലം ഭൂമിക്കടിയില്‍ ലംബമായി വിള്ളല്‍ രൂപപ്പെടുകയും ചെയ്യും. സാൻ ഫ്രാൻസിസ്കോയിൽ നടന്ന അമേരിക്കൻ ജിയോഫിസിക്കൽ യൂണിയൻ കോൺഫറൻസിലാണ്‌ ശാസ്‌ത്രജ്ഞർ ഈ കണ്ടെത്തൽ അവതരിപ്പിക്കുന്നത്‌. കൂടാതെ ഇവിടങ്ങളിലെ നീരുറവകളില്‍ ഭൂമിയുടെ ഉള്ളിൽ കാണുന്ന അപൂര്‍വ വാതകമായ ഹീലിയം-3 ഉയർന്ന അളവിൽ ശാസ്ത്രജ്ഞർ കണ്ടെത്തിയിട്ടുണ്ട്.