യുഎൻആർഡബ്ല്യുഎയുടെ ഇസ്രായേൽ നിരോധനത്തെ അറബ് പാർലമെന്റ് അപലപിച്ചു

ദുബായ് > പലസ്തീൻ അഭയാർത്ഥികൾക്കായുള്ള ഐക്യരാഷ്ട്ര സംഘടനയുടെ (യുഎൻആർഡബ്ല്യുഎ) പ്രവർത്തനങ്ങൾക്ക് ഇസ്രയേൽ ഏർപ്പെടുത്തിയ നിരോധനത്തെ അറബ് പാർലമെന്റ് ശക്തമായി അപലപിച്ചു. ഈ നടപടി മനുഷ്യത്വത്തിനെതിരായ കുറ്റകൃത്യമാണെന്നും പലസ്തീൻ അഭയാർഥികളുടെ സംരക്ഷണവുമായി ബന്ധപ്പെട്ട എല്ലാ അന്താരാഷ്ട്ര പ്രമേയങ്ങളോടും നിയമങ്ങളോടും ഉള്ള നഗ്നമായ വെല്ലുവിളിയാണെന്നും പാർലമെന്റ് വിശേഷിപ്പിച്ചു.

ഗാസ മുനമ്പിൽ നിലവിൽ അഭൂതപൂർവമായ ആക്രമണവും പട്ടിണിയും നേരിടുന്ന രണ്ട് ദശലക്ഷം അഭയാർത്ഥികൾ ഉൾപ്പെടെ ഏകദേശം 6.4 ദശലക്ഷം പലസ്തീൻ അഭയാർഥികൾക്ക് സഹായവും ആശ്വാസവും നൽകുന്ന യുഎൻആർഡബ്ല്യുഎയുടെ നിർണായക പങ്കിനെക്കുറിച്ച് പാർലമെന്റ് സ്പീക്കർ മുഹമ്മദ് അൽ-യമാഹി  പ്രസ്താവനയിലൂടെ സൂചിപ്പിച്ചു

പലസ്തീൻ അഭയാർത്ഥികൾക്കുള്ള അവശ്യ സേവനങ്ങൾ തുടരുന്നതിന് യുഎൻആർഡബ്ല്യുഎയെ പിന്തുണയ്ക്കാൻ ഇസ്രയേലിൻ്റെ തീരുമാനം പിൻവലിക്കാൻ സമ്മർദം ചെലുത്താൻ അന്താരാഷ്ട്ര സമൂഹം, യുഎൻ സുരക്ഷാ കൗൺസിൽ, അന്താരാഷ്ട്ര ബോഡികൾ, മനുഷ്യാവകാശ സംഘടനകൾ എന്നിവ അടിയന്തര നടപടി സ്വീകരിക്കണമെന്ന് പാർലമെൻ്റ് സ്പീക്കർ ആവശ്യപ്പെട്ടു.