ആശ്വാസം 
തേടി ഇന്ത്യ

മുംബൈ
ആശ്വാസജയം തേടി ഇന്ത്യ ഇന്ന്‌ മുംബൈ വാംഖഡെ  സ്‌റ്റേഡിയത്തിൽ ഇറങ്ങുന്നു. ന്യൂസിലൻഡിനെതിരായ മൂന്നുമത്സര പരമ്പരയിൽ അവസാനത്തേതാണ്‌. രാവിലെ 9.30ന്‌ കളി തുടങ്ങും. ആദ്യ രണ്ട്‌ ടെസ്‌റ്റും ജയിച്ച്‌ കിവീസ്‌ പരമ്പര നേടിയിരുന്നു.

ലോക ടെസ്‌റ്റ്‌ ചാമ്പ്യൻഷിപ്‌ ഫൈനലാണ്‌ ഇന്ത്യയുടെ ലക്ഷ്യം. ഈ ടെസ്‌റ്റും ഓസ്‌ട്രേലിയക്കെതിരായ അഞ്ചെണ്ണവും ബാക്കിയുണ്ട്‌. ആറിൽ നാല്‌ ടെസ്‌റ്റ്‌ ജയിച്ചാൽ മറ്റ്‌ ടീമുകളുടെ പ്രകടനത്തെ ആശ്രയിക്കാതെ ഇന്ത്യക്ക്‌ ഫൈനലിലെത്താം. ബാറ്റർമാരുടെ അപ്രതീക്ഷിത തോൽവിയാണ്‌ ഇന്ത്യക്ക്‌ തിരിച്ചടിയായത്‌. ബംഗളൂരു ടെസ്‌റ്റിൽ എട്ട്‌ വിക്കറ്റിനും പുണെ ടെസ്‌റ്റിൽ 113 റണ്ണിനും തോറ്റു. വിജയത്തിനായി സ്‌പിൻ പിച്ചൊരുക്കിയെങ്കിലും നേട്ടം കൊയ്‌തത്‌ ന്യൂസിലൻഡാണ്‌. ഇന്ത്യൻ ടീമിൽ വലിയമാറ്റങ്ങൾക്ക്‌ സാധ്യതയില്ല. രണ്ടാം പേസറായി ആകാശ്‌ദീപോ മുഹമ്മദ്‌ സിറാജോ വരുന്ന കാര്യത്തിൽമാത്രമാണ്‌ സംശയം.