വിസ കൈമാറ്റ ഇളവ് 30 വരെ; തൊഴിലുടമകൾ നടപടി വേഗത്തിലാക്കണം

​കുവൈത്ത് സിറ്റി: പ്രവാസി തൊഴിലാളികൾക്ക് നിർദിഷ്ട മേഖലകളിൽനിന്ന് സ്പോൺസർഷിപ് മാറ്റാൻ അനുവദിച്ച താൽക്കാലിക ഇളവ്‌ 30ന് അവസാനിക്കുമെന്ന്‌ കുവൈത്ത്‌. തൊഴിലുടമകൾ നടപടി വൈകിക്കാതെ പൂർത്തിയാക്കണമെന്ന് കുവൈത്ത്‌ മാനവശേഷി അതോറിറ്റി നിർദേശിച്ചു. ​തൊഴിൽ വിപണിയിലെ ആവശ്യങ്ങൾ പരിഗണിച്ചാണ് ഈ പ്രത്യേക ഇളവ് നടപ്പാക്കിയത്.

​ചെറുകിട - ഇടത്തരം സംരംഭങ്ങൾ, വ്യവസായം, കൃഷി, മൃഗസംരക്ഷണം, മത്സ്യബന്ധനം തുടങ്ങിയ നിയന്ത്രിത മേഖലകളിൽ ജോലി ചെയ്യുന്ന പ്രവാസി തൊഴിലാളികൾക്ക് നിശ്ചിത വ്യവസ്ഥകൾക്ക് വിധേയമായി മറ്റ് മേഖലകളിലേക്ക് വിസ മാറാനാണ്‌ ഈ അവസരം. എല്ലാ അപേക്ഷകൾക്കും നിലവിലെ തൊഴിലുടമയുടെ അനുമതി നിർബന്ധമാണ്‌. അപേക്ഷകൾ ‘അഷാൽ കമ്പനീസ്’ ഓൺലൈൻ പോർട്ടൽ വഴിയാണ് സമർപ്പിക്കേണ്ടത്.

​തൊഴിൽ വിപണിയിൽ കൂടുതൽ സൗകര്യവും തൊഴിൽ ബന്ധങ്ങളിൽ സ്ഥിരതയും ഉറപ്പാക്കാനാണ് നടപടി. ഇളവ് അവസാനിക്കുംമുമ്പ് അർഹരായ തൊഴിലാളികളുടെ വിസ മാറൽ നടപടികൾ പൂർത്തിയാക്കണമെന്നും അതോറിറ്റി അറിയിച്ചു.